2 इतिहास 14

यहूदा राज़ै आसाहो राज़

1खिरी मूंअ राज़अ अबियाह संघा डाहअ सह दाबेदपूर नगरी दाबी। तेखअ बणअ तेऊओ शोहरू आसाह यहूदा मुल्खो राज़अ। तेऊए राज़ा दी रही दसा साला तैणीं यहूदा मुल्खै शांती। 2आसाह किअ तिहअ ई भलअ ज़िहअ बिधाता च़ाहा त कि सह करे। 3पराऐ देअए मुहुर्ती, गान-स्तान अर तिन्‍नें बेदी किई तेऊ खतम। तिन्‍नें पूज़णे ओडै अर अशेरा देबीए डौंड पाऐ तेऊ ढोल़ी अर फाल़ी। 4तेऊ किअ यहूदा मुल्खे परज़ा लै हुकम कि सिधी बिधाते पूज़ा-गाज़ा करा ज़िहअ तिन्‍नें दादै-बाबै किअ अर बधाने साबै ज़िऊआ ज़िहअ बिधाता च़ाहा। 5ज़ेतरै बी यहूदा मुल्खै मुहुर्ती पूज़णे गान-स्तान अर धूपा दैणें बेदी थिई, तिंयां किई तेऊ खतम। इहअ करै रहअ आसाहे राज़ा दी यहूदा मुल्खै सोभी नगरी सुख-चैन। 6राज़ै आसाहै बणाऐं आपणैं राज़ा दी यहूदा मुल्खै कई नगरी फेर फिरदै गहल़। इहअ करै निं कई साला तैणीं यहूदा मुल्खा संघै कोही जुध छ़ेल़अ किल्हैकि बिधाता ती यहूदा मुल्खै शांती डाही दी। 7राज़ै आसाहै बोलअ यहूदा मुल्खे परज़ा लै, “हाम्हां च़िणनै यहूदा मुल्खै सोभी नगरी फेर गहल़, बडी-बडी दुआली, बडै-बडै कोट। बडी-बडी लाणीं प्रऊल़ी ज़ेथ बडी-बडी आगल़ी होए। अह ज़ैगा आसा आझ़ बी म्हारी किल्हैकि हाम्हैं किअ तिहअ ई ज़िहअ म्हारअ परमेशर बिधाता च़ाहा। बिधाता आसा हाम्हैं फेरा-फेर सोभी दुशमणा का राज्ज़ी-राम्बल़ै बच़ाऊई डाहै दै।”

ज़िहअ राज़ै आसाह हुकम किअ, सारी परज़ा किअ तिहअ ई। 8यहूदा का थिई राज़ै आसाह सेटा बर्छ़ै अर ढाल़ा च़लाऊंणैं आल़ी सज़ाण चअन लाख शूरबीरे सैना। बिन्यामीन गोत्रा मांझ़ै थिई तेऊ का ढाल़ अर कतीर-कबाणे सज़ाण दूई लाख अश्शी हज़ार सैना।

9कूश1 देशे जेराह छ़ेल़अ यहूदा मुल्खा संघै जुध। तेऊ आणी आप्पू संघै दस लाख सैना अर चअन शौ रथ संघा पुजअ मारेशा नगरी तैणीं। 10राज़अ आसाह निखल़अ तेऊए मकाबलै करदअ संघा खल़्हुई मारेशा नगरी नेल़ सापता नाओंए खागै दुहै सैना आर-पार स्मोहरी। 11आसाह किई बिधाता सेटा अरज़, “हे बिधाता, तूह करा थोल़ै बला आल़ी सैने मज़त बी तेही ई ज़ेही तूह बलबान सैने मज़त करा। ए म्हारै परमेशर बिधाता, ऐबै कर म्हारी मज़त तूह ई, किल्हैकि हाम्हैं आसा तेरै ई आसरै। हाम्हैं आसा तेरै नाओंऐं दुशमणे एतरी बडी सैने मकाबलै करदै आऐ दै। हे बिधाता, तूह आसा म्हारअ परमेशर, ताखा निं कोहै मणछ ज़िती सकदअ।”

12तेखअ पल़ी यहूदी सैना तिन्‍नां लै चुटी अर बिधाता ज़ताऊऐ तिंयां कूश देशे सैना का अर कूश देशे सैना ठुर्है तिधा का च़ऊ पाओऐ। 13राज़अ आसाह अर तेऊए सैना डेऊई तिन्‍नां पिछ़ू गरार नगरी तैणीं। तेथ मारी एतरी कूशी सैना कि तधा बाद निं तिंयां खल़ै उझ़दै डाहै किल्हैकि तिंयां हारै बिधाता अर तेऊए सैना का अर यहूदी सैना लुटी तिन्‍नें सारी च़िज़ा। 14गरार नगरी ओरी-पोरी ज़ेतरी नगरी थिई, तिंयां किई यहूदी सैना पठी बरैबाद, तेथ बस्सै दै लोगे दिलै पल़ी तेखअ बिधाते डअर। तिन्‍नां नगरी ती खास्सी धन-माया, सह लुटी यहूदी सैना पठी। 15तिन्‍नें कई फुआले डेरै लै बी पल़ै यहूदी चुटी संघा लुटी तिन्‍नें खास्सै डागै, भेडा-बाकरीए हेल़्ही अर ऊँट अर खिरी पुजै राज़धानी एरुशलेम बापस फिरी।