Kulvi Outer Seraji Bible
2 इतिहास 13
यहूदा मुल्खै राज़ै अबियाहो राज़
(1 राज़ै 15:1-8)
उतरा बाखा इज़राईल मुल्खै थिअ नबातो शोहरू जरोबाम राज़अ, तेऊए राज़ा दी ठार्हुई साला बणअ यहूदा मुल्खै अबियाह राज़अ। तेऊ किअ चिई साला तैणीं एरुशलेम नगरी दी राज़। तेऊए ईज ती गिबा नगरी का ऊरीएले शोहरी मिकाया।
खास्सअ बगत निं हुअ कि यहूदा मुल्खे राज़ै अबियाह अर इज़राईल मुल्खे राज़ै जरोबामा गअ आप्पू मांझ़ै जुध लागी। अबियाह का थिई च़ार लाख सैना अर दुजी बाखा ती जरोबामा का आठ लाख सैना।
दुहै सैना हुई एप्रैम गोत्रे धारा बाखे मुल्खै आर-पार स्मोहरी। राज़अ अबियाह डेऊअ ज़मरीम धारा संघा बोलअ जरोबाम अर उतरा बाखे इज़राईली लै हाक्का पाई इहअ, “जरोबाम अर इज़राईलीओ, शूणां कि हुंह कै बोला! तम्हां का ऐहा गल्लो थोघ निं आथी कि इज़राईले परमेशर बिधाता आसा राज़ै दाबेदा संघै अटल़ करार किई दी कि तेऊए ई आद-लुआदा मांझ़ै हणअ सदा इज़राईली प्रैंदै राज़अ? नबाते शोहरू जरोबामै किअ आपणैं मालक दाबेदे शोहरू राज़ै सुलैमाना लै द्रोह। बादा का ज़ुल़ै तेऊ संघै उपद्रभी लोग रहबामा संघै मकाबलै करदै! सुलैमानो शोहरू रहबाम त अज़ी बेघै खारकअ अर कज़ाण अर सह निं तिन्नों मकाबलअ करी सकअ!
“ऐबै तम्हैं कै सोठा कि तम्हैं अर थारी एतरी खास्सी सैना बिधाते राज़ा संघै मकाबलअ करी सका ज़ुंण राज़ तेऊ दाबेदे आद-लुआदा लै आसा दैनअ द? तम्हां संघै आसा सिधी तिंयां सुन्नें बल्द अर बाछ़ूए मुहुर्ती ज़ुंण जरोबामै थारै कुल़ज देबतै डाहै बणाईं! तम्हां बाखा निं हारणे आद-लुआद बी आथी! किल्हैकि तम्हैं काढै तिंयां बिधाते प्रोहत अर लेबी आप्पू जैंदरा का ज़ोरा-ज़ोरी दरल़ाऊई। तिन्नें ज़ैगा डाहै तम्हैं होरी देशा ज़िहै पज़ैरै। बेदी सेटा ज़ुंण बाछ़ू अर सात गाभू आणी बल़ीदान करा, सह जाआ थारै तिन्नां देअओ प्रोहत बणी!
“पर हाम्हैं करा अज़ी बी बिधाते च़ाकरी अर हाम्हैं निं तेऊ का दूर डेऊऐ। म्हारै करा आझ़ बी हारणे आद-लुआदा मांझ़ै ई प्रोहतो काम अर होर लेबी बी करा तिन्नां संघै च़ाकरी। हर धैल़ै दोत्ती अर उडै ज़ाल़ा तिंयां बिधाता सेटा धूप अर धैल़ करा तिंयां बल़ीदान करी हूम। तिंयां छ़ाडा बिधाता लै पबित्र मेज़ा प्रैंदै भोज़न, हर धैल़ै ज़ाल़ा तिंयां सुन्नें सदीऐ दी दीऐ। हाम्हैं करा आझ़ बी तिहअ ई ज़िहअ बिधाता हुकम करा अर तम्हैं आसा बिधाता का दूर हुऐ दै। हाम्हां प्रैंदै सैणअ आसा आझ़ बी बिधाता ई अर तेऊए प्रोहत आसा इधी नर्शिंगै बाज़णा लै तैर कि हाम्हैं तम्हां संघै जुध छ़ेल़े। इज़राईलीओ, आपणैं दादा-बाबे तेऊ परमेशर बिधाता संघै मकाबलै करदै निं लागा! तेऊ का निं तम्हैं ज़िती सकदै!”
अबियाह त इना गल्ला बोल्दअ लागअ द अर पोरी हेरअ जरोबामै एक दल यहूदे सैना मारदअ छ़ाडी कि तिंयां पिछ़ू बाखा घेरअ बाही तिन्नां लै चुटी पल़े अर बाकी सैना डाही मोहरै बाखा मकाबलै लै। यहूदी सैना हेरअ भाल़ी कि तिंयां गोटै पिछ़ू बाखा। तिंयां लागै ज़ोरै-ज़ोरै लैल़ा लाई बिधाता का मज़त मांगदै अर प्रोहतै बाज़ै जुध शुरू करना लै नर्शिंगै। यहूदी सैना पाअ सोभी एकी शाहै ज़ोरै हाल्लअ संघा निंयैं अबियाह तिंयां इज़राईली संघै मकाबलै करदै। बिधाता दैनअ तिन्नां लै इहअ बल कि इज़राईली सैना अर जरोबाम हारै तिन्नां का पठी। इज़राईली ठुर्है यहूदी डरै बापस अर यहूदी सैना लैऊई तिन्नां लै काट-फणाटी। अबियाह अर तेऊए सैना का हारै इज़राईली इहै कि तिन्नें हुई बूरी दशा। तिन्नें सैना मांझ़ै पाऐ तिन्नैं कोई पांज़ लाख मारी, कि कोई डाहै खास्सै ज़खमी करी। इहअ करै ज़ितै इज़राईली का यहूदी किल्हैकि तिंयां रहै तेऊ परमेशर बिधाते आसरै ज़हा तिन्नें दाद-बाब मना तै।
अबियाह किअ जरोबामे सैनो पिछ़अ संघा किअ तिन्नें कई नगरी दी कबज़अ। तिंयां नगरी ती बेतेल, जेशाना, एप्रोन अर तिन्नां सोभी नगरी फेर-फिरदै गराअं। तेखअ निं जरोबाम अबियाहे राज़ा दी भिई तेऊ संघै मकाबलै करदअ आअ। खिरी दैनी बिधाता तेऊ लै एही सज़ा कि तेऊए हुई मौत। पर यहूदा मुल्खो राज़अ अबियाह हुअ होर बी बलबान।
अबियाह ती पठी च़ौदा बेटल़ी आणी दी, तिन्नां का थिऐ तेऊए बाई शोहरू अर सोल़ा शोहरी हुई दी। अबियाह राज़ै बाकी होर किज़ै बोलअ अर होर किज़ै-किज़ै किअ, तिंयां आसा पठी गल्ला ईदू गूरै लिखै दै इतिहासा दी लिखी डाही दी।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.