1 तिमोथी 4

झ़ुठै गूरू

1पर पबित्र आत्मां बोला साफ इहअ कि खिरीए धैल़ै छ़ाडणअ कई लोगा मसीहे शिक्षा दी विश्वास करनअ। तिन्‍नां मनणै भूत आत्मां ज़हा तिंयां कबाता पाणै अर तिन्‍नां करनअ तिन्‍नां झ़ुठी शिक्षा दी विश्वास ज़ुंण भूत आत्मां का एछा। 2ईंयां झ़ुठी गूरू आसा झ़ुठै अर ठगणै आल़ै। तिन्‍नां का निं थोघै लागदअ कि तिंयां ठीक करा कि गलत करदै आसा लागै दै। तिन्‍नें सोर आसा एही मूंईं दी ज़ेही ल्हासा कुंण तात्तै लोहै करै बी दहई पाए, तेता निं किछ़ै फरक पल़दअ।

3इना इहै झ़ुठै लोगे हआ एही शिक्षा कि बैह करनअ निं ठीक आथी अर इहअ खाणअ निं ठीक आथी। पर परमेशरै आसा ईंयां खाणैं-पिणें च़िज़ा आसा विश्वासी लै बणाईं दी ज़हा का शूकर करी खाणें बारै शुची शिक्षो थोघ आसा।

4किल्हैकि परमेशरै बणाईं दी हर च़िज़ा आसा भली। हाम्हैं सका सोभी रंगे खाणैं पिणें च़िज़ा खाई पर परमेशरो शूकर करनअ ज़रूरी।1

5किल्हैकि सह हआ परमेशरे बैण अर प्राथणां करै खाणां लै शुचअ।

मसीहा ईशूओ बधिया दास

6ज़ुंण गल्‍ला मंऐं ताखा एभै बोली ज़ै तूह कबल्‍लअ होरी विश्वासी भाई-बैहणी का आद फरेओए, तै आसा तूह विश्वासे बैणा करै पाक्‍कअ लागअ द हंदअ अर ज़ुंण भली शिक्षा तंऐं मनी तेता करै हणअ तूह मसीहा ईशूओ बधिया दास। 7पर मणछै आप्पै बणाईं दी एही ऐडी कथ्या दी निं आपणअ बगत ज़ांऐं करी ज़ेता करै परमेशरो अदर निं हंदअ। तूह शिखल़ै आप्पू एही ज़िन्दगी ज़िऊंणीं ज़ेता करै परमेशरो अदर हआ। 8देही दी राम्बल़अ भैस्स पाणअ हआ देही लै भलअ पर च़ाकरी करै हआ सोभी गल्‍ला दी फाईदअ, किल्हैकि ऐहा ज़िन्दगी अर आजू भेटणीं तम्हां सह ज़िन्दगी ज़ेते परमेशरै आसा करार किई दी।

9अह गल्‍ल आसा शुची बोली दी अर अह गल्‍ल लागा सोभी मनणी। 10हाम्हैं करा मैन्थ अर कठण काम ऐहा ज़िन्दगी पाणें तैणीं किल्हैकि हाम्हैं डाहा ज़िऊंदै परमेशरा दी आशा ज़ुंण सोभी मणछो उद्धार करनै आल़अ आसा अर खासकर तिन्‍नों आसा ज़ुंण तेऊ दी विश्वास करा।

11इना गल्‍ला सखाऊ सोभी विश्वासी का अर ऐहा गल्‍लो बी डाह धैन कि तिंयां तिहअ ई मना कि नांईं।

12तेरअ बभार लोल़ी इहअ हुअ कि कुंण ताह बृथा नां समझ़े, किल्हैकि तूह आसा ज़ुआन। पर तूह लोल़ी होरी विश्वासी लै आदर्श हुअ कि तिंयां ज़ुंण बैण तूह बोला, तेरअ बभार, तेरी होरी संघै झ़ूरी डाहणीं, मसीहा दी तेरअ विश्वास अर तेरी नर्दोश ज़िन्दगी का तिंयां बी शिखल़े। 13ज़ेभै तैणीं हुंह निं एछूं, तेभै तैणीं रह शास्त्रा का पहल़दअ, सखाऊंदअ अर शिक्षा दैंदअ धैल़ी-राची लागी।

14तैहा गल्‍ला कर आद ज़ेभै विश्वासी सैणैं तेरै मुंडै हाथ डाही प्राथणां किई अर परमेशरै दैनअ तिन्‍नां का तेऊ आत्मिक बरदाने बारै समाद कि तिंयां ताखा खोज़े ज़ुंण तेऊ ताल्है आसा दैनअ द। तेऊ बरदाना दी डाह धैन। 15तिन्‍नां गल्‍लो डाह हर बगत धैन अर तंऐं डाहणअ सिधअ सह ई धैन ताकि सोभी का शुझिए कि तूह आसा तेरी विश्वासी ज़िन्दगी दी बढदअ लागअ द। 16ऐहा गल्‍लो बी डाहै धैन कि तूह केही ज़िन्दगी ज़िऊआ अर तूह किज़ै शिक्षा दैआ। तै करनअ परमेशरा तेरअ अर तेरै शुणनै आल़ै दुहीओ उद्धार।