Kulvi Outer Seraji Bible
1 तिमोथी 3
विश्वासीए टोली दी सैणअ
अह गल्ल आसा शुची बोली दी, “ज़ुंण मसीही टोली सैणें पदबी च़ाहा, सह च़ाहा सोभी का भलअ काम।” तैही लोल़ी मसीही टोलीओ सैणअ नर्दोश अर तेऊए लोल़ी एक्कै लाल़ी हुई अर सह लोल़ी सोभी गल्ला दी सबर करनै आल़अ हुअ, तेऊओ बभार लोल़ी शोभलअ, सोभी लोल़ी तेऊओ अदर किअ, तेऊ लोल़ी आपणैं घअरै एछणैं आल़ै प्राहुंणैंओ अदर किअ अर सह लोल़ी परमेशरे गल्ला राम्बल़ै करै सखाऊंणै आल़अ हुअ। सह नां शराबी अर नां हर बगत च़िखणैं आल़अ लोल़ी हुअ, सह लोल़ी झणैल़ू, मेल़-ज़ोल़ करनै आल़अ हुअ अर नां सह ढब्बैओ मांण करनै आल़अ लोल़ी हुअ।
तेऊए आपणैं टबर लोल़ी तेऊए बशै दी हुऐ अर तेऊ लागा हर गल्ला दी आपणैं लान्हैं शोहरू सखाऊंणै कि तिंयां तेऊओ अदर करे अर तेऊए हर गल्ला मने। ज़ै कुंण मणछ आपणैं घअरो इंतज़ाम निं करी सकदअ, सह निं परमेशरे टोलीए हेर-भाल़ करी सकदअ।
सह निं इहअ लोल़ी हुअ ज़ुंण अज़ी थोल़ै धैल़ै पैहलै ई आसा होए विश्वासा दी आअ द, नांईं ता तेऊ सका घमंड हई अर तेऊ सका तेही सज़ा भेटी ज़ेही राख्सा भेटी। टोली का बागै बी लोल़ी होरी लोगै तेऊ लै भलअ मणछ बोलअ। इहअ निं लोल़ी हुअ कि लोग तेऊए बारै बूरअ बोले अर राख्स तेऊ तिहअ ढाके ज़िहअ लोग बणें ज़ीबा फाही करै ढाका ज़ेता का तिंयां छ़ुटी निं सकदै।
विश्वासीए टोली दी दास
तिहअ ई लोल़ी टोली दी च़ाकरी करनै आल़अ इहअ मणछ हुअ ज़सरअ सोभै अदर करा। तिन्नें गल्ला निं एही लोल़ी हुई कि बोला किज़ै होर अर तेतो मतलब हआ किज़ै होर। नां तिंयां शराबी लोल़ी हुऐ अर नां तिंयां दुजै ठगी करै ढब्बै खटणै आल़ै लोल़ी हुऐ। तिन्नें लोल़ी तिन्नां गल्ला दी पाक्कअ विश्वास करना लै भली सोर हुई कि ज़ुंण शिक्षा परमेशरै प्रगट किई तिंयां आसा शुची। टोली दी च़ाकरी करनै आल़ै हणैं का आजी लोल़ी तिन्नां दी ईंयां सोभै गल्ला परखी कि ईंयां गूण तिन्नां दी आसा कि नांईं। ज़ै कोही तिन्नां दी किछ़ै खोट निं शुझिए। तेखअ सका तिंयां टोली दी च़ाकरीओ काम करी।
ठीक एही ई लोल़ी तिन्नें बेटल़ीए बी लोल़ी सोभी मांझ़ै इज़त हुई। तिंयां निं होरीए बारै बूरअ बोल़णैं आल़ी लोल़ी हुई। तिन्नों बभार लोल़ी शोभलअ हुअ अर तिंयां लोल़ी सोभी गल्ला दी शुची-पाक्की हुई।
तिहअ ई लोल़ी टोली दी मज़त आल़ै दासे एक्कै ई लाल़ी हुई ज़सरअ सोभै अदर करा, अर लान्हैंओ अर आपणैं घअरो इंतज़ाम करनअ बी लोल़ी तिन्नैं ज़ाणअ द हुअ। किल्हैकि ज़ुंण च़ाकरीओ काम राम्बल़ै करै सका करी, तिन्नें करा होर लोग इज़त अर तिन्नां हआ मसीहा ईशू दी आपणैं विश्वासे बारै होरी का खोज़णें हिम्मत बी।
महान भेद
हुंह करा ताह सेटा छ़ेक्कै एछणें आशा, पर तैबी लिखा हुंह ताल्है इना गल्ला एते तैणीं कि ज़ै मुंह एछणा लै बल़ैग बी पल़े, ताखा लोल़ी ऐहा गल्ले समझ़ हुई कि परमेशरे परिबारे होरी विश्वासी संघै किहअ बर्ताअ लागा करनअ। ऐहा टोली दी आसा तिंयां सोभै लोग ज़ुंण मसीहा दी विश्वास करा अर तिंयां सोभै आसा ज़िऊंदै परमेशरे। ईंयां विश्वासी करा मज़त अर ईंयां डाहा शुची शिक्षा पाक्की ज़िहअ घअरे आथरी अर थाम्ह घअरे मज़त करा अर पाक्कै डाहा टकैल़ी।
एथ निं किछ़ै बैहम आथी कि अह गल्ल आसा पाक्की, ज़ुंण गल्ला परमेशरै प्रगट किई तिंयां आसा सारी शुची मतलब,
मसीहा हुअ मणछ देही दी प्रगट,
पबित्र आत्मां किई अह गल्ल साबत कि ज़ुंण गल्ला तेऊ किई तिंयां आसा भली,
सह भाल़अ स्वर्ग दूतै बी,
सह च़कअ स्वर्गे प्रतप्पा दी उझै।
लोगै खोज़अ तेऊए बारै सारै संसारे सोभी लोगा का।
सारै संसारे मणछै किअ तेऊ दी विश्वास।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.