Zabuuriiwwan 6

Duʼaa Yeroo Dhiphinaa

Dura buʼaa faarfattootaatiif. Zabuurii Baganaadhaan faarfatamu. Zabuurii Daawud kan akka sirna Shamiiniitiitti faarfatamu.

1Rabbii Allaah aarii keetiin na hin ifatin;

yookaan dheekkamsa keetiin na hin adabin.

2Naa gameeraatii yaa Rabbii Allaah naaf araarami;

lafeen koos jeeqameeraatii yaa Rabbii Allaah na fayyisi.

3Lubbuun koo akka malee jeeqameera;

kun hamma yoomiitti? Rabbii Allaah, hamma yoomiitti?

4Rabbii Allaah, deebiʼiitii lubbuu koo oolchi;

araara keetiif jedhiitii na fayyisi.

5Namni duʼe si hin yaadatu.

Siiʼool keessatti eenyutu si galateeffata?

6Ani aaduu kootiin bututeera.

Halkan hunda booʼichaan siree koo nan dhiqa;

imimmaaniinis iddoo ciisichaa koo nan tortorsa.

7Iji koo gaddaan fajajeera;

sababii diinota koo hundaatiifis dadhabeera.

8Warri hamaa hojjettan hundinuu narraa fagaadhaa;

Rabbii Allaahan sagalee booʼicha koo dhagaʼeeraatii.

9Rabbii Allaahan waammata koo dhagaʼeera;

Rabbii Allaahan duʼaa koo ni fudhata.

10Diinonni koo hundinuu haa qaanaʼan; akka malees haa rifatan;

qaanii tasaatiinis of irra haa garagalan.