Zabuuriiwwan 5

Duʼaa Ganamaa

Zabuurii Daawudii kan ululleedhaan faarfatamu.

1Rabbii Allaah, gurra kee dubbii kootti qabi;

aaduu koo illee naa hubadhu.

2Yaa mootii koo fi Allaah ko,

iyya ani gargaarsaaf iyyadhu dhaggeeffadhu;

ani fuula kee duratti duʼaa godhadhaatii.

3Rabbii Allaah, ganamaan sagalee koo ni dhageessa;

anis ganamaan kadhata koo fuula kee duratti nan dhiʼeessa;

abdiidhaanis nan eeggadha.

4Ati Allaah hamminatti gammadu miti;

hamaanis si wajjin hin jiraatu.

5Of tuultonni fuula kee dura dhaabachuu hin dandaʼan.

Atis warra jalʼina hojjetan hunda ni jibbita;

6Ati warra soba dubbatan ni balleessita.

Rabbii Allaahan warra dhiiga dheebotanii fi

warra nama gowwoomsan ni xireeffata.

7Ani garuu araara kee baayʼee sanaan mana keetti ol nan gala;

si sodaachuudhaanis gad jedhee

gara mana qulqullummaa kee qulqulluu sanaatti garagalee nan sagada.

8Rabbii Allaah, sababii diinota kootiif jedhiitii

qajeelummaa keetiin na dura buʼi;

karaa kees fuula koo duratti naa qajeelchi.

9Dubbiin afaan isaaniitii baʼu tokko iyyuu hin amanamu;

garaan isaanii badiisaan guutameera.

Laagaan isaanii qabrii banamaa dha;

arraba isaaniitiin ni sobu.

10Yaa Allaah, yakkitoota taʼuu isaanii isaanitti beeksisi!

Daba isaaniitiinis haa kufan.

Baayʼina cubbuu isaaniitiin isaan balleessi;

isaan sitti fincilaniiruutii.

11Warri kooluu sitti galan hundinuu garuu haa gammadan;

bara baraanis gammachuudhaan haa faarfatan.

Akka warri maqaa kee jaallatan sitti gammadaniif

ati eegumsa kee isaan irra diriirsi.

12Rabbii Allaah, ati qajeeltota ni eebbiftaatii;

akka gaachanaattis surraa keetiin isaan marsita.