Zabuuriiwwan 12

Duʼaa Gargaarsa Barbaachaaf Kadhatame

Dura buʼaa Faarfattootaatiif. Zabuurii Daawud kan akka sirna Shamiiniitiitti faarfatamu.

1Rabbii Allaah, namni Allaah sodaatu hin jiruutii ati na gargaar;

ilmaan namaa keessaas namni amanamu dhabameeraatii.

2Namni hundinuu ollaa isaatti soba dubbata;

isaan nama saadanii garaa lamaan dubbatu.

3Rabbii Allaahan afaan nama saadu hunda,

arraba of tuulu hundas haa kukkutu;

4isaanis, “Nu arraba keenyaan ni moona;

hidhiin keenyas keenyuma;

eenyutu nurratti gooftummaa qaba?” jedhu.

5Rabbii Allaahan, “Ani sababii hacuucamuu hiyyeeyyiitiif,

sababii aaduu rakkattootaatiifis amma nan kaʼa.

Nagaa isaan hawwan keessas isaan nan jiraachisa” jedha.

6Dubbiin Rabbii Allaah hirʼina hin qabu;

innis akka meetii boolla ibiddaa keessatti baqfamee

yeroo torba qulqulleeffamee ti.

7Rabbii Allaah ati nu eegda;

dhaloota akkanaa irraas bara baraan nu oolchita.

8Yeroo wanni faayidaa hin qabne ilmaan namaa gidduutti kabajamutti

hamoonni of dhiibuudhaan kallattii hundaan asii fi achi naannaʼu.