Runyankore - Rukiga Bible 1964
Zekaria 3
Yoshua okwihwaho ebibi n'okuheebwa obushoboorozi bw'okwehikira
Bwanyima yaanyoreka Yoshua omunyamurwa omukuru ayemereire omu maisho ga maraika wa MUKAMA, na Sitaane amwemereire aha rubaju rwa buryo kumutabaariza. 2 MUKAMA yaagira Sitaane ati: Iwe Sitaane, MUKAMA akuhane! Torikumanya ogu ku ari ekicumurwa ekiihirwe omu muriro? 3 Obwo Yoshua akaba ayemereire omu maisho ga maraika, ajwaire ebijwaro bisiisikaire munonga. 4 Maraika yaagira abaamwemereire omu maisho ati: Mumujuure ebyo bijwaro bisiisikaire munonga. Kandi yaagira ati: Reeba, naakwihaho okutahikiirira kwawe, niinyija kukujweka ebijwaro birungi munonga. 5 Naanye naagira nti: Bamute ekikwemba kishemeire aha mutwe. Batyo baamuta ekikwemba kishemeire aha mutwe, baamujweka ebijwaro; obwo maraika wa MUKAMA ayemereire aho.
Maraika wa MUKAMA yaayehanangiriza Yoshua ati: 6 Oku nikwo MUKAMA ow'amahe arikugamba naagira ati: Ku oraagyendere omu mihanda yangye, waarinda gye ebi naakukwatsize, oryategyeka enju yangye, orinde n'ebikaari byangye; naanye ndyakuha obushoboorozi bw'okwehikira omuri aba abeemereire aha. 7 Mbwenu, iwe Yoshua omunyamurwa omukuru, hurira, iwe na bagyenzi baawe abashutama omu maisho gaawe, ahabw'okuba abo bantu n'akamanyiso. Reeba, ndyareeta omuheereza wangye Itaagi. 8 Reeba, aha ibaare eri ntaire omu maisho ga Yoshua, eibaare rimwe eriine embaju mushanju, ndyasharuraho ebihandiiko byaryo; nikwo MUKAMA ow'amahe arikugira; kandi orubanja rw'egi nsi ndyarwihaho omu izooba rimwe. 9 Eryo izooba buri muntu omuriimwe aryayeta mutaahi we kushutama ahansi y'omuzaabibu gwe n'ahansi y'omutiini gwe; nikwo MUKAMA ow'amahe arikugira.
Source notes (9)
- Cross-reference 1 Bus 21:1; Zab 109:6; Ezr 3:2.
- Cross-reference Amo 4:11; Yud 9.
- Cross-reference Isa 64:6; Yud 23.
- Cross-reference Isa 6:7; 61:10; Luk 1:19; 15:22; Kush 7:14; 19:8.
- Cross-reference Yob 29:14.
- Cross-reference Lev 8:35; Bir 17:9.
- Cross-reference Isa 11:1; 42:1; Yer 23:5; Ezk 12:11; Zek 6:12.
- Cross-reference Zab 118:22; Isa 28:16; Zek 4:10; Kush 5:6.
- Cross-reference 1 Bag 4:25.
Runyankore - Rukiga Bible 1964. Public domain. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · Public domain · SourceEdition imported 2026-11-09.