Runyankore - Rukiga Bible 1964

Zekaria 4

Zekaria okworekwa ekikondo ky'etabaaza n'emizeituuni ebiri

Bwanyima maraika owaabaire naagamba naanye yaagaruka yansisiimura, nk'oku omuntu asisiimurwa omu turo; 2 yangira ati: Nooreeba ki? Naamugira nti: Nindeeba ekikondo ky'etabaaza eky'ezaabu nsha, ekiteekirweho orwabya, kandi ekiriho amatabaaza mushanju, buri emwe eine eminwa mushanju. 3 Kandi aha rubaju rwakyo hariho emizeituuni ebiri, gumwe aha rubaju rwakyo rwa buryo, n'ogundi aha rwa bumosho. Naabuuza maraika owaabaire naagamba naanye nti: Ebyo amakuru gaabyo niki, Mukama wangye? Maraika owaabaire naagamba naanye yambuuza ati: Ebyo torikumanya amakuru gaabyo? Naagarukamu nti: Ngaaha, Mukama wangye. 4 Bwanyima yangira ati: Eki n'ekigambo eki MUKAMA arikutuma ahari Zerubabeeli, naagira ati: Ti habw'amaani, kandi ti habw'obushoboorozi, kureka n'ahabw'Omwoyo wangye; nikwo MUKAMA ow'amahe arikugira. 5 Iwe rushozi ruraingwa 'we, niiwe oha? Omu maisho ga Zerubabeeli oryahinduka oruhita. Kandi oryareeta eibaare ery'aha mutwe gw'agandi eririkuhamirwaho, obwo abantu nibateera akaari nibagira bati: Nirikagire omugisha! Nirikagire omugisha! Kandi ekigambo kya MUKAMA kyagaruka kyanyijaho nikigira kiti: 6 Emikono ya Zerubabeeli niyo yaataireho omusingi gw'egi nju, kandi emikono ye niyo erigiheza. Haza obwo nibwo murimanya ku MUKAMA ow'amahe abantumireho. 7 Mbwenu n'oha oragayire ebintu nibikitandika? Baryashemererwa, baareeba kariisho omu ngaro za Zerubabeeli. Ago matabaaza nigo maisho ga MUKAMA agarikubuga hoona nigareeba ebiri omu nsi yoona. Bwanyima naamubuuza nti: Eriya mizeituuni ebiri eri aha rubaju rw'ekikondo ky'etabaaza orwa buryo n'orwa bumosho, amakuru gaayo niki? Naagaruka naamubuuza obwa kabiri nti: Kandi gariya mataagi abiri g'emizeituuni agari aha mbaju zombi z'enshekye ibiri z'ezaabu omu amajuta garikushohorera, amakuru gaago niki? Yangarukamu ati: Torikumanya amakuru gaago? Naamugarukamu nti: Ngaaha, Mukama wangye. Yangira ati: Ago mataagi n'abaashukirweho amajuta ababiri abeemerera aha rubaju rwa MUKAMA ow'ensi yoona.

Source notes (7)

Cross-reference Dan 8:18; 10:9, 10.
Cross-reference Kur 25:31, 37; Kush 1:12; 4:5.
Cross-reference Kush 11:4.
Cross-reference Hos 1:7; Hag 1:1.
Cross-reference Isa 40:4.
Cross-reference Ezr 3:10; Zek 2:9.
Cross-reference 2 Bus 16:9; Hag 2:3; Zek 3:9.

Runyankore - Rukiga Bible 1964. Public domain. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · Public domain · SourceEdition imported 2026-11-09.