Runyankore - Rukiga Bible 1964
Zekaria 2
Maraika okutumwa kugyera Yerusaalemu
Kandi naimutsya amaisho; ku naagiire kugira nti, naareeba omuntu oine omugoye gw'okugyeresa omu ngaro ze. Naamubuuza nti: Nooza hi? Yangarukamu ati: Ninza kugyera Yerusaalemu kumanya obukiika n'oburaingwa bwayo. Reeba, maraika owaabaire naagamba naanye yaashohora, kandi maraika ondiijo yaija kumubugana; 2 yaamugira ati: Imuka ogambire oriya mutsigazi, noogira oti: Yerusaalemu eryatuurwamu, nk'oku batuura omu birorero ebitaine ngo, ahabw'abantu baamwo n'amatungo gaabo kuba bingi; 3 ahakuba niinye ndiba orugo rwayo rw'omuriro orugyehinguririize, kandi niinye ndiba ekitiinisa omuriyo; nikwo MUKAMA arikugira. 4
MUKAMA naagira ati: Yeimwe! Yeimwe! Nimuhungye, murugye omu nsi y'obukiizi-bwa-bumosho, ahabw'okuba niinyija kubataaruura, mbaihe ei emiyaga ena y'omu iguru ereetwa. Imwe batuuzi ba Babulooni 'mwe, nimuhungire Saayuuni; 5 ahakuba MUKAMA ow'amahe ku yaaherize kuntuma aha mahanga agaabaire nigabanyaga, kumuhaisa ekitiinisa, (ahabw'okuba obakoraho aba akozire aha mboni y'eriisho rye) 6 yangira ati: Reeba, ndyagatigitira omukono, ngubangire, gahindukye eminyago y'abaabaire nibagaheereza. Haza obwo muryamanya ku MUKAMA ow'amahe niwe antumire. 7 Iwe Saayuuni, yeshongore, oshemererwe; ahakuba reeba, niinyija, kandi ndyatuura omuriiwe ahagati; nikwo MUKAMA arikugira. 8 Eryo izooba amahanga maingi garyayehongyera MUKAMA, babe abantu bangye; ndyaguma omuriiwe ahagati. 9 Haza obwo oryamanya ku MUKAMA ow'amahe akuntumireho. Bwanyima MUKAMA aryahungura Yuda ebe omugabo gwe omu nsi erikwera, agarukye atoorane Yuda. 10
Imwe abaine omubiri mwena, mucecekye omu maisho ga MUKAMA, ahabw'okuba ayebandatwire omu butaaho bwe oburikwera.
Source notes (10)
- Cross-reference Ezk 40:3.
- Cross-reference Est 9:19; Isa 49:19.
- Cross-reference Zab 125:2; Isa 4:5.
- Cross-reference Isa 48:20; Ezk 5:10.
- Cross-reference Bir 32:10; Yer 12:14.
- Cross-reference Isa 11:15; 19:16; Ezk 33:33; 39:10.
- Cross-reference Lev 26:12; Ezk 37:27; Zef 3:14, 15; Zek 8:3.
- Cross-reference Isa 2:2.
- Cross-reference Bir 32:9.
- Cross-reference Hab 2:20.
Runyankore - Rukiga Bible 1964. Public domain. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · Public domain · SourceEdition imported 2026-11-09.