Runyankore - Rukiga Bible 1964

Zaaburi 77

Okwijuka oku Ruhanga yaakozire eby'okutangaaza omu biro ebya ira

Aha Mukuru w'abeeshongozi omu muringo gwa Yedusuuni. Zaaburi ya Asafu

Ka ntakire Ruhanga n'eiraka ryangye,

Ka mmutakire n'eiraka rihango, naija kumpurira. 2

Aha izooba eri naareebeireho enaku, nkasherura Mukama;

Naimutsya emikono yangye nyekiro, tinaaruha;

amagara gangye gaayanga kuhuumuzibwa. 3

Ku nyijuka Ruhanga, nyemereza omutima,

Ngira amaganya, omutima gwangye gugwa enshazi.

Ozibira amaisho gangye kuteerana;

Nyine enaku; tindikubaasa kugamba. 4

Nteekateekire ebiro ebya ira,

N'emyaka eya iranaira. 5

Naijuka ekyeshongoro kyangye kya nyekiro;

Naateekateeka munonga, omutima gwangye gwayezirika kwecaaka. 6

Mukama aryanagira kimwe?

Tarigaruka kugira embabazi obundi? 7

Okusaasira kwe kuhwereireho kimwe ebiro byona?

Ebi yaaraganiise biryaguma bibuzire obutwire bwona? 8

Ruhanga ayebirwe okugira embabazi?

Aimire embabazi ze nyingi ahabw'ekiniga? 9

Bwanyima naagira nti:

Ebyo nibiruga omu bweremwa bwangye;

Okuteekateeka ngu omukono gwa buryo ogwa Rukira-boona niguhinduka! 10

Ndyaijutsya abantu ebi MUKAMA yaakozire.

Kandi ndyaijuka eby'okutangaaza byawe ebya ira.

Ndyateekateeka munonga aha murimo gwawe gwona,

Ngumye ebiteekateeko byangye aha bikuru ebi waakozire. 11

Omuhanda gwawe, ai Ruhanga, nigwera.

N'oha ruhanga omukuru orukwingana na Ruhanga waitu? 12

Niiwe wenka Ruhanga okora eby'okutangaaza;

Okooreka amaani gaawe omu mahanga;

Waacungura abantu baawe n'omukono gwawe,

Nibo baana ba Yakobo na Yosefu. 13

Amaizi gakakureeba, ai Ruhanga;

Ku gaakureebire, gaatiina; ahagati omu maizi maingi haatetema. 14

Ebicu byashuka amaizi, eiguru ryahinda;

Emyambi yaawe yamurinkana hoona; 15

Eiraka ry'okuhinda kwawe ryaizira omu kasooroora;

Emirabyo yaawe yaamurika ensi yoona;

Ensi yaatetema, yaatengyeta. 16

Omuhanda gwawe gukaba guri omu nyanja,

N'otuhanda twawe nituraba omu maizi maingi;

Ahi ebigyere byawe byarabire, tiharamanyirwe. 17

Ahabw'omukono gwa Musa na Arooni

Okeebembera abantu baawe nk'obusyo bw'entaama.

Source notes (17)

Cross-reference Zab 3:4.
Cross-reference Zab 50:15; 86:7; 143:6; Isa 26:9.
Cross-reference Zab 43:5; 61:2; 142:3; 143:4.
Cross-reference Zab 143:5; Bir 32:7; Isa 51:9.
Cross-reference Zab 4:4; 42:8.
Cross-reference Zab 44:9.
Cross-reference Yer 15:18; Rom 9:6.
Cross-reference Isa 49:15; Hab 3:2.
Cross-reference Yer 10:19.
Cross-reference Zab 105:5.
Cross-reference Zab 35:10.
Cross-reference Zab 72:18; 106:8.
Cross-reference Zab 114:3; Hab 3:10; Yos 3:15, 16; Kur 14:21.
Cross-reference Zab 18:14.
Cross-reference Zab 97:4; 104:7.
Cross-reference Hab 3:15.
Cross-reference Kur 13:21; Isa 63:11, 12.

Runyankore - Rukiga Bible 1964. Public domain. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · Public domain · SourceEdition imported 2026-11-09.