Runyankore - Rukiga Bible 1964

Zaaburi 76

Okuhimbisibwa kwa Ruhanga ahabw'okujuna Saayuuni

Aha Mukuru w'abeeshongozi, Zaaburi ya Asafu ei baayeshongoroire aha nanga y'emirya

Omuri Yuda Ruhanga naamanywa;

Eiziina rye ni rukuru omuri Israeli. 1

Eihema rye riri omuri Saalemu,

Kandi atuura omuri Saayuuni. 2

Okwo niyo yaahendeire emyambi y'obuta,

Engabo, na rurara, n'eby'okurwanisa omu rugamba.

Ori ow'ekitiinisa, kandi ori murungi okukira boona,

Otabaarukire aha bibungo ebiriho eminyago. 3

Ab'omutima gw'obumanzi banyagirwe,

Bagwejegyeire obutasisiimuka,

Abarwani boona tibabaasize kwerwanaho n'emikono yaabo. 4

Ahabw'okuhana kwawe, ai Ruhanga wa Yakobo,

Embaraasi n'abarikuzigyenderaho bagwejegyeire obutaimutsya mutwe. 5

Kwonka Iwe ori ow'okutiinisa!

N'oha orikubaasa kukwemerera omu maisho waagira ekiniga? 6

Okeema omu iguru, waamanyisa oku waacwire orubanja,

Ensi yaatiina, yaacureera, 7

Ruhanga ku yaimukire kucwa orubanja,

N'okujuna boona abarikubonabonesibwa omu nsi. 8

Buzimazima ekiniga ky'abantu kiryakuhimbisa,

N'ekiniga ekiritsigaraho oryakizibira. 9

Ohigye ahari MUKAMA Ruhanga waawe, kandi ohikiirize okuhiga kwawe;

Boona abamwehinguririize bareete emitoijo

ahari Ogwo oshemereire kutiinwa, 10

Niwe ahwerekyereza amagara g'abanyiginya,

Kandi otiinisa abagabe b'ensi.

Source notes (10)

Cross-reference Zab 9:11; 27:5; Kut 14:18.
Cross-reference Zab 46:9; Ezk 39:9.
Cross-reference Zab 13:3; Yer 51:39; Nah 3:18.
Cross-reference Kur 15:1.
Cross-reference Zab 130:3; Yob 41:10; Nah 1:6.
Cross-reference 2 Bus 20:29, 30; Hab 2:20.
Cross-reference Zab 9:7, 8.
Cross-reference Kur 9:16.
Cross-reference Zab 50:14; 68:29; 89:7; Mub 5:4; Isa 8:13.
Cross-reference Zab 47:2.

Runyankore - Rukiga Bible 1964. Public domain. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · Public domain · SourceEdition imported 2026-11-09.