Runyankore - Rukiga Bible 1964
Zaaburi 74
Okushaba kw'ab'omu nsi ecwekyereziibwe. Ruhanga okubagarura obusya
Zaaburi ya Asafu eyaagunzirwe n'obwengye
Ai Ruhanga, ahabw'enki otunagire ebiro byona?
Ahanki ekiniga kyawe nikibuguma aha ntaama z'omu iriisizo ryawe? 2
Ijuka omutwe gw'abantu baawe abu waaguzire ira,
Abu waacungwire kuba oruganda rw'obuhunguzi bwawe,
N'orushozi Saayuuni oru waatwireho.
Imuka oze omu mwanya ogwahindukiire kimwe amatongo,
Oreebe obubi bwona obu abazigu baakozire omu Mwanya ogurikwera. 3
Ababisha baawe bakatontomera ahagati y'enju yaawe ey'okuteeraniramu;
Baahanika endango zaabo kuba obumanyiso. 4
Aha irembo rya ruguru baatemagura
Orugo rw'obubaaho bwogainemu n'empango zaabo. 5
Nk'abantu abakwaitse empango nibatema emiti y'omu kibira,
Nikwo baashatagwire n'empango n'enyondo ebintu ebisharwire; 6
Baayotsya Omwanya gwawe ogurikwera,
Kandi ahi Eiziina ryawe rituura baahashiisha nibahasheenyagura.
Baagira omu mitima yaabo bati: Ka tubahwerekyerereze kimwe!
Baayotsya sinagogi za Ruhanga zoona omu nsi. 7
Titukireeba bumanyiso bwaitu;
Tihaakiriho nabi n'omwe,
Kandi tihariho n'omwe ahariitwe orikumanya ahi ebi birigarukira.
Ai Ruhanga, ababisha baryahitsya hi okutujuma?
Abazigu baryaguma barogote aha Iziina ryawe ebiro byona? 8
Ahabw'enki ohinyire omukono gwawe, omukono gwawe gwa buryo?
Gwihe omu kifuba kyawe, obahwerekyereze. 9
Kwonka Ruhanga niwe Mukama wangye okwiha ira ryona,
Otuura naakora eby'okujuna omu nsi. 10
Okabaganisa enyanja n'amaani gaawe,
Waayatagurira kimwe emitwe y'ebijoka omu maizi; 11
Niiwe waayatagwire emitwe ya Leviasaani,
Okagiha enyamaishwa z'omu ihamba kugirya. 12
Okaigura enshuro n'obugyera,
Waayomya emigyera etooma. 13
Nyomushana n'eyaawe, kandi na nyekiro n'eyaawe;
Niiwe waataireho omushana n'eizooba. 14
Niiwe waataireho emyatano yoona ey'ensi.
Kandi okataho ekyanda n'eitumba. 15
Ijuka eki, ai Ruhanga, oku abazigu barikukujuma,
Nk'oku abantu abashema barikurogota aha Iziina ryawe.
Otaha enyamaishwa amagara g'enkombe yaawe;
Oteebwa amagara g'abooro baawe ebiro byona. 16
Ta omutima aha ndagaano yaawe;
ahabw'okuba emyanya y'omwirima omu nsi eijwire obutaaho bw'abanyamwaga. 17
Otaikiriza abarikubonabonesibwa kuhemurwa;
Abooro n'abakyene bahimbise Eiziina ryawe. 18
Imuka, ai Ruhanga, oyetonganire;
Oijukye oku abashema barikukujuma okurenzya eizooba. 19
Oteebwa orwari rw'abazigu baawe,
N'okujagarara kw'abakugomeire oku baimutsya obutoosha.
Source notes (19)
- Cross-reference Zab 44:9; 95:7; 100:3; Bir 29:20; Yer 23:1; Ezk 34:31.
- Cross-reference Zab 9:11; Kur 15:16; Isa 63:9, 17.
- Cross-reference Tonz 2:7.
- Cross-reference Yer 46:22.
- Cross-reference 1 Bag 6:18, 29-35.
- Cross-reference Zab 79:1; 2 Bag 25:9.
- Cross-reference 1 Sam 3:1; Tonz 2:9; Mik 3:6; Mat 16:4.
- Cross-reference Tonz 2:3.
- Cross-reference Zab 44:4.
- Cross-reference Kur 14:21; Isa 51:9.
- Cross-reference Yob 41:1; Isa 27:1.
- Cross-reference Zab 105:41; Isa 48:21; 51:10; Kur 17:5, 6; Kub 20:11; Yos 4:23.
- Cross-reference Kut 1:14-16.
- Cross-reference Kut 8:22; Bir 32:8; Byak 17:26.
- Cross-reference Zab 89:50.
- Cross-reference Zab 106:45; Kut 17:7; Lev 26:44, 45; Yer 33:21.
- Cross-reference Zab 6:10; 9:9.
- Cross-reference 1 Sam 24:15.
- Cross-reference Zab 65:7.
Runyankore - Rukiga Bible 1964. Public domain. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · Public domain · SourceEdition imported 2026-11-09.