Runyankore - Rukiga Bible 1964

Zaaburi 68

Ekyeshongoro ky'okusiima ahabw'obusinguzi bwa Mukama

Aha Mukuru w'abeeshongozi. Zaaburi ya Daudi ei yaayeshongoire

Ka Ruhanga aimukye, abazigu be bataataane!

N'abarikumwanga bamuhungye. 2

Obatuntumure nk'omwika;

Ababi bahwerekyererere omu maisho ga Ruhanga,

Nk'oku entsinda eyagira aha muriro;

Kwonka abahikiriire bo bananukye;

Beesime munonga omu maisho ge;

Eego, bashemererwe n'okunanuka. 3

Mweshongorere Ruhanga, mweshongore eby'okuhimbisa eiziina rye;

Mwimutsye amaraka, mweshongorere Ogwo ogyendera aha bicu;

Eiziina rye ni Yehova; mwesiimire munonga omu maisho ge! 4

Ruhanga omu mwanya gwe ogurikwera ogu atuuramu

N'ishe w'efuuzi kandi omucwi w'emanja w'abafaakazi. 5

Ruhanga aha amaka abataine ifo na ruguru;

Abohoorora embohe, ngu zitungye ebirungi,

Kwonka abagomi batuura omu nsi eyomire. 6

Ai Ruhanga, obu waayebembera abantu baawe,

Nooraba omu ihamba, 7

Ensi ekatengyeta, eiguru ryagwisa enjura ahabw'okwija kwawe,

Na Sinai yaatengyeta ahabw'okwija kwawe, iwe Ruhanga wa Israeli. 8

Ai Ruhanga, okagwisa enjura y'omugisha aha buhunguzi bwawe,

Waabugaruramu amaani buruhire.

Abantu baawe baabubonamu obutaaho;

Omu burungi bwawe, ai Ruhanga, waatungira abakyene eby'okubahwera. 9

Mukama aha ekiragiro,

Abakazi abarikutwara amakuru n'eihe rihango. 10

Abagabe b'amahe bahunga, eego bahunga;

Abakazi abatsigara omuka babagana eminyago. 11

Ahabw'enki muraara omu kibuga ky'entaama,

Nk'amapapa g'enkombe agashwekirwe efeeza,

N'ebyoya byayo ebishwekirwe ezaabu?

Obu Ow'obushoboorozi bwona yaabinga abakama baabo, bakataataana,

Orubaare rukaba nirugwa ahari Salumooni.

Iwe orushozi rw'amaani, orushozi rwa Bashani,

Iwe orushozi rwa Bashani orwine emitwe mingi, 12

Imwe enshozi ndaingwa, ahabw'enki mureebesa eihari

Orushozi oru Ruhanga yaasiimire kutuuraho?

N'ekya buzima, MUKAMA aryarutuuraho ebiro byona. 13

Ebigaari bya Ruhanga n'obukumi bubiri,

Enkumi n'enkumi;

Mukama akaija omu Mwanya ogurikwera, naaruga Sinai. 14

Okatemba orushozi ruraingwa,

Nootwara abu waanyagire bakukuratiire,

N'abandi bantu baakureetera emitoijo,

Nangwa n'omu bagomi nabo,

Ngu MUKAMA Ruhanga abone kutuura omuribo. 15

Mukama asiimwe, otwekorerera emitwaro obutoosha,

Ruhanga ow'okujunwa kwaitu. 16

Ruhanga waitu ni Ruhanga orikujuna;

Ahari Yehova Mukama niho haruga okukira okufa. 17

Kwonka Ruhanga aryayatagura emitwe y'abazigu be,

Kandi ahutaaze ekikoba ky'omutwe gw'ogwo orikugumira omu kushobya kwe. 18

Mukama akagira ati: Ndyabagarura barugye Bashani,

Ndyabagarura mbaihe okuzimu ahagati y'enyanja, 19

Ngu obone kwozya ebigyere byawe omu shagama,

Kandi ngu endimi z'embwa zaawe zitungye omugabo gwazo omu bazigu.

Bareebire emigyendere yaawe, ai Ruhanga, Ruhanga wangye kandi Mukama wangye,

Okuratiirwe abantu baawe nootaaha omu Mwanya ogurikwera; 20

Abeeshongozi beebembeire, abateezi b'enanga bari enyima;

N'ahagati yaabo hariho abaishiki nibateera ebitaasa. 21

Muhimbise Ruhanga omu iteeraniro rihango ry'abantu;

Muhimbise MUKAMA, imwe abaakomookire omu ihanga rya Israeli! 22

Benyamiini bucuracuriro abari omu mutwe,

Abanyiginya ba Yuda n'omutwe muhango,

Abanyiginya ba Zebuluuni, abanyiginya ba Nafutaali.

Ragiira amaani gaawe, ai Ruhanga;

Ohamye ebi waatukoreire. 23

Abagabe bakureetera emitoijo,

ahabwa hekalu yaawe, eri omuri Yerusaalemu, 24

Hana n'amaani enyamaishwa z'omu rufunjo,

Eigana ry'enimi n'enyana z'amahanga;

Oribatiirire abantu abaine omururu gw'okutoijesa agandi mahanga;

Otaataanise amahanga agakunda kurwana.

Abanyiginya baryaruga Misiri;

Na Esiopia eryarahuka kutega Ruhanga emikono.

Imwe obugabe bwona obw'ensi, mweshongorere Ruhanga,

Mweshongore eby'okuhimbisa Mukama, 25

Orikutemba ahaiguru y'eiguru omu iguru erya ira.

Reeba, naagamba n'eiraka rihango, n'eiraka rye ery'amaani.

Mugambe ku Ruhanga aine amaani;

Ategyeka Israeli omu kitiinisa ky'obukama bwe,

Kandi amaani ge gari omu bicu. 26

Ruhanga n'Ow'okutiinisa omu Mwanya gwe ogurikwera;

Ruhanga wa Israeli niwe aha abantu be obushoboorozi n'amaani.

Ruhanga asiimwe!

Source notes (26)

Cross-reference Zab 92:9; Kub 10:35; Isa 33:3.
Cross-reference Zab 97:5; Mik 1:4.
Cross-reference Zab 66:4; 89:8; Isa 40:3; 57:14; Hab 3:8.
Cross-reference Zab 10:14; Bir 10:18.
Cross-reference Zab 107:33; 146:7; 1 Sam 2:5; Byak 12:7; 16:26.
Cross-reference Kur 13:21; Bar 4:14.
Cross-reference Kur 19:18; Bar 5:4.
Cross-reference Zab 65:9, 10.
Cross-reference Zab 33:9; 1 Sam 18:6; Kur 15:20.
Cross-reference Yos 10:16; Bar 5:30.
Cross-reference Bar 5:16.
Cross-reference Zab 132:13, 14.
Cross-reference 2 Bag 6:17.
Cross-reference Bar 5:12; Byak 1:9; Efe 4:8; Kush 21:3.
Cross-reference Isa 46:4.
Cross-reference Bir 32:39; Kush 1:18.
Cross-reference Zab 110:6.
Cross-reference Kub 21:33-35.
Cross-reference Zab 58:10; 1 Bag 22:38.
Cross-reference Kur 15:20; 1 Bus 13:8; 15:16.
Cross-reference Zab 26:12; Isa 48:1; Bir 33:28.
Cross-reference Bar 5:18; 1 Sam 9:21.
Cross-reference 2 Bus 32:23; Isa 18:7.
Cross-reference Zab 22:12; Yob 40:21; 2 Sam 8:2, 6.
Cross-reference Zab 29:1, 4; 150:1; Bir 10:14; 33:26.
Cross-reference Zab 29:11; Isa 40:29.

Runyankore - Rukiga Bible 1964. Public domain. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · Public domain · SourceEdition imported 2026-11-09.