Runyankore - Rukiga Bible 1964
Zaaburi 58
Okushaba Ruhanga kuba niwe yaahoora ebabi
Aha Mukuru w'abeeshongozi, aha iraka eririkwetwa Otahwerekyereza. Zaaburi ya Daudi
Beitu kwo imwe bantu 'mwe, mugamba eby'amazima?
Mucwera abantu emanja omu buryo?
Ngaaha! Kureka omu mitima yaanyu mucwa obwengye kukora eby'okutahikiirira;
Endwano z'emikono yaanyu nirwo rubanja oru mucwa omu nsi. 1
Ababi bataana na Ruhanga nibakiruga omunda;
Ku bazaarwa, bahaba, nibagamba eby'ebishuba. 2
Obushegu bwabo ni nk'obw'enjoka;
Bari nk'empoma etarikuhurira, eyeitsire amatu, 3
Eyanga kuhurira eiraka ry'abarogi,
N'obu baakuroga n'obwengye buta. 4
Ai Ruhanga, bacwe amaino, ogamare omu kanwa;
Okuure ebigigo by'ebitsigazi by'entare, ai MUKAMA. 5
Ka batuube, boome nk'emaizi agarikuhwererera omu itaka.
Baribatiirirwe nk'obunyaatsi bubisi, bahotokye. 6
Babe nk'ekinyangondokyera, ekiyaga kikahwaho;
Nk'omwana ozaarwa atakahikire, otakareebaga izooba. 7
Enyungu zaanyu zitakatagatsiibwe muriro gw'amahwa,
Ruhanga aryagatwaza omuyaga gw'akasooroora,
amabisi n'agahiire goona. 8
Ohikiriire ku arireeba okwo kuhoora enzigu, aryayesiima;
Aryayogyesa ebigyere bye eshagama y'ababi. 9
Ekirirugamu, abantu baryagira bati:
Buzimazima hariho ebihembo by'abahikiriire;
Buzimazima hariho Ruhanga ocwa emanja omu nsi.
Source notes (9)
- Cross-reference Zab 51:5; Isa 48:8.
- Cross-reference Zab 140:3; Bir 32:33.
- Cross-reference Yer 8:17.
- Cross-reference Zab 3:7; Yob 4:10.
- Cross-reference Zab 112:10.
- Cross-reference Yob 3:16.
- Cross-reference Zab 118:12; Enf 10:25.
- Cross-reference Zab 68:23; Bir 32:43; Yob 22:19.
- Cross-reference Zab 9:8; 67:4; Kut 18:25; Mub 12:14; Isa 3:10.
Runyankore - Rukiga Bible 1964. Public domain. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · Public domain · SourceEdition imported 2026-11-09.