Runyankore - Rukiga Bible 1964
Zaaburi 38
Okushaba kw'omuntu ori omu busaasi ahabw'ekibi kye, bwanyima akeeteisa Zaaburi ya Daudi ey'okwijutsya
Ai MUKAMA, otanteisa onyiniire ekiniga,
N'obu kwakuba okumpana ongwereirwe kubi munonga; 2
Ahakuba emyambi yaawe empwereiremu,
N'omukono gwawe gumpingamiire munonga. 3
Tihariho hahuriire omu mubiri gwangye ahabw'ekiniga kyawe;
N'amagufa gangye tigari gye ahabw'ekibi kyangye. 4
Ahakuba eby'okushiisha byangye bindengyeire aha mutwe,
Bindemire nk'omutwaro guremeire.
Obuhuta bwangye nibunuuka, bujunzire,
ahabw'obushema bwangye. 5
Mpetami omugongo, nyeinamiriire;
Ngyendagyenda nincura okurenzya eizooba; 6
Ahakuba nimbabiirirwa munonga omu manyaanya;
Kandi omu mubiri gwangye tiharimu hahuriire.
Ninkabaakaba mpendagurikire;
Nintsinda ahabw'omutima gwangye kutatuuza.
Ai MUKAMA, noomanya ebi nyetenga byona,
Kandi tosherekirwe kutsinda kwangye. 7
Omutima gwangye niguteera munonga enkuratima, amaani gampweiremu;
amaisho gangye nago tigakihweza. 8
Banywani bangye na bagyenzi bangye nibanyetantara ahabw'okubonabona kwangye,
N'abanyaruganda baanyemereire hare. 9
Kandi abarikwenda kuunyita nibantega emitego;
N'abarikwenda kunkora kubi nibagamba eby'okumpwerekyereza,
Kandi bateekateeka eby'okundeebya eizooba ryona. 10
Kwonka nyowe ndi nk'ekifa-matu, tindikuhurira;
Ndi nk'ekiteta ekitarikugamba.
Eego, ndi nk'omuntu otarikuhurira,
Otaine bigambo by'okuteisa abandi. 11
Kandi ai MUKAMA, niiwe ndikutegyereza;
Oryangarukamu, Mukama Ruhanga wangye. 12
N'ahabw'ekyo ninkushaba, otaikiriza abarikwesiimira okuterera kwangye
Kuunyehimbisizaho. 13
Ndaariire kugwa,
Kandi obusaasi bwangye tindikubaasa kubwehuzya obutoosha. 14
Ahakuba niinyatura eby'okushiisha byangye,
Ninshaasha ahabw'ekibi kyangye.
Kwonka abazigu bangye abanyangira busha baine amaani;
N'abanyangira ebitahikire bakanyire. 15
Abazimuurira ekibi ahabw'ekirungi nabo n'abazigu bangye,
ahakuba ninkuratira ebirungi. 16
Otantsigaho, ai MUKAMA;
Ruhanga wangye, otanza hare! 17
Rahuka kumpwera, ai Mukama, okujunwa kwangye.
Source notes (17)
- Cross-reference Zab 6:1.
- Cross-reference Zab 32:4; Yob 6:4.
- Cross-reference Zab 31:10; Isa 1:6.
- Cross-reference Ezr 9:6.
- Cross-reference Zab 35:14; Isa 21:3.
- Cross-reference Zab 38:3.
- Cross-reference Zab 6:7.
- Cross-reference Zab 88:18; Mak 15:40; Luk 10:31, 32.
- Cross-reference Zab 35:20; Mak 12:13; 2 Sam 16:7, 8; 17:1-3.
- Cross-reference Zab 39:2, 9; Isa 53:7; 1 Pet 2:23.
- Cross-reference Zab 39:7; 2 Sam 16:12.
- Cross-reference Zab 13:4.
- Cross-reference Yer 20:10.
- Cross-reference Zab 32:5; 2 Kor 7:9, 10.
- Cross-reference Zab 35:12; 109:4.
- Cross-reference Zab 22:11.
- Cross-reference Zab 40:13; Kur 15:2; Isa 12:2.
Runyankore - Rukiga Bible 1964. Public domain. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · Public domain · SourceEdition imported 2026-11-09.