Runyankore - Rukiga Bible 1964

Zaaburi 37

Oku Mukama arinda abantu be, n'oku ababi baricwekyerezibwa Zaaburi ya Daudi

Otaryemereza omutima ahabw'ababi,

N'obu kwakuba okugirira enkozi z'ebibi eihari. 2

Ahakuba baryarahuka kutemwa nk'obunyaatsi,

Bahotokye nk'amababi. 3

Oyesigye MUKAMA, okore ebirungi,

Obwo nibwo orituura omu nsi, nooriira omu mariisizo n'obusingye. 4

Kandi oshemerererwe omuri MUKAMA,

Nawe aryakuha ebi omutima gwawe gurikwetenga. 5

Orugyendo rwawe orwegyekyerere MUKAMA;

Kandi omwesigye; nawe aryaruhikiiriza. 6

Aryayoreka okuhikiirira kwawe nk'omushana,

N'amazima gaawe nk'eihangwe. 7

Huumurira omuri MUKAMA, omutegyereze n'okugumisiriza;

Oteemereza omutima ahabw'omuntu orikuhiirwa omu muhanda gwe,

Akahikiiriza enaama ze embi. 8

Reka kuguubwa kubi, ruga omu kiniga;

Oteemereza omutima; ahakuba ekirugamu n'okukora ekibi. 9

Mumanye ngu ababi baryacwekyerezibwa;

Kwonka abategyereza MUKAMA baryahungura ensi. 10

Bwanyima y'akaanya kakye omubi aryaba atakiriho;

Buzima oryamusherura aha mwanya gwe, oshangye atariho. 11

Kwonka abacureezi baryahungura ensi,

Beesiime ahabw'okugira obusingye bwingi. 12

Omubi agiira ohikiriire omu naama mbi,

Kandi amunenera amaino. 13

Kwonka Mukama ashekyerera omubi,

Ahakuba areeba eizooba rye riri haihi.

Ababi baasyoireyo zaarurara zaabo, batamikire emyambi omu mata gaabo,

Kuteera ahansi enshoberwa n'abakyene,

N'okwita abagyenda baine emitima egororokire. 14

Zaarurara zaabo nibo zirirezya emitima,

Kandi amata gaabo garyahendwa. 15

Ebikye ebi ohikiriire aine

Bikira ebishaagire eby'ababi baingi; 16

Ahakuba emikono y'ababi eryahendeka,

Kwonka MUKAMA akwatirira abahikiriire. 17

MUKAMA amanya ebiro ebi abashugaine barimara,

N'obuhunguzi bwabo buryagumaho ebiro byona; 18

Omu biro by'okureeba enaku tibariitwa nshoni,

Kandi omu biro by'enjara baryaiguta. 19

Kwonka ababi baryahwerekyerera,

Abazigu ba MUKAMA baryaba nk'obunyaatsi burungi obw'omu iriisizo;

Baryahwerekyerera, bahweho nk'omwika.

Omubi ayeguza, taihura;

Kwonka ohikiriire aba efura, kandi agaba. 20

Ahakuba abu MUKAMA aha omugisha baryahungura ensi,

Kwonka abu akyeenire baracwekyerera. 21

Orugyendo rw'omuntu ku ruhamibwa MUKAMA,

Yaasiima emihanda ye, 22

N'obu agwa, tagwera kimwe,

Ahakuba MUKAMA amuramira n'omukono gwe.

Nkaba ndi omutisgazi, mbwenu ndi omurugurusi;

Kwonka tinkareebaga ohikiriire atsigirweho,

N'obu baakuba abaana be nibashaba ak'okurya. 23

Obutoosha agaba n'obufura, kandi aguza abandi,

N'abaana be baryaheebwa omugisha. 24

Ruga omu bibi, okore ebirungi,

Naiwe obwo oryagumaho ebiro byona; 25

Ahakuba MUKAMA akunda eby'oburyo,

Taritsigaho barikwera be.

Baryarindwa ebiro byona;

Kwonka oruzaaro rw'ababi ruryacwekyerezibwa.

Abahikiriire baryahungura ensi,

Bagituuremu ebiro byona.

Akanwa k'ohikiriire kagamba eby'obwengye,

N'orurimi rwe rugamba eby'oburyo; 26

Ebiragiro bya Ruhanga biba omu mutima gwe;

Ebigyere bye tibiterera.

Omubi agyenza ohikiriire,

Naasherura oku araamwitwe. 27

MUKAMA tarimutsiga mu mikono ye,

N'obu kwakuba okumusingisa emanja. 28

Tegyereza MUKAMA, ogume omu muhanda gwe;

Niwe arikutunguura, okahungura ensi;

Oryareeba okuhwerekyerera kw'abasiisi. 29

Nkareeba omubi aine obushoboorozi bwingi,

Agaire nk'omwereezi gwa Lebanooni.

Naagaruka, naarabaho; kwonka eky'okutangaaza, akaba atakiriho;

N'obu ndaabe naamusherwire, tarabonekire. 30

Yetegyereze omuntu oshugaine, kandi oreebe ow'amazima;

ahakuba omuheru gw'omuntu ogwo n'obusingye; 31

Kwonka abasiisi baryahwerekyererezibwa kimwe,

Kandi omuheru gw'omubi n'okucwekyerezibwa. 32

Okujunwa kw'abahikiriire kuruga ahari MUKAMA;

Niwe buhungiro bwabo omu biro by'okureeba enaku. 33

MUKAMA abahwera, kandi abakiza;

Abaiha omu mikono y'ababi, kandi abajuna,

Ahabw'okuba bamuhungiraho.

Source notes (33)

Cross-reference Enf 24:1, 19.
Cross-reference Zab 90:5, 6; 129:6.
Cross-reference Zab 62:8; Isa 26:4.
Cross-reference Yob 22:26; Isa 58:14.
Cross-reference Zab 22:8; 1 Pet 5:7.
Cross-reference Isa 58:8, 10.
Cross-reference Zab 62:1; 73:3; Isa 30:15; Yer 12:1.
Cross-reference Efe 4:26; Yak 1:19.
Cross-reference Enf 2:21; Isa 57:13; 60:21.
Cross-reference Yob 24:24.
Cross-reference Isa 32:17; Mat 5:5.
Cross-reference Zab 31:13.
Cross-reference Zab 2:4.
Cross-reference 1 Sam 2:4.
Cross-reference Enf 15:16; 16:8; 1 Tim 6:6.
Cross-reference Zab 10:15.
Cross-reference Zab 1:6; 37:9.
Cross-reference Zab 33:19; Yob 5:20.
Cross-reference Zab 68:2; Hos 13:3.
Cross-reference Zab 37:9.
Cross-reference Zab 40:2; 1 Sam 2:9.
Cross-reference Enf 24:16; Mik 7:8; 2 Kor 4:9.
Cross-reference Zab 112:5, 9; Bir 15:8, 10; Mat 5:42; Luk 6:34, 35.
Cross-reference Zab 34:14; 102:28.
Cross-reference Zab 11:7; 21:10; Isa 14:20.
Cross-reference Zab 40:8; 119:11; Isa 51:7; Yer 31:33.
Cross-reference Zab 109:31.
Cross-reference Zab 27:14; 91:8.
Cross-reference Zab 52:8; Yob 5:3; 20:5.
Cross-reference Zab 119:165; Isa 32:17.
Cross-reference Enf 2:22.
Cross-reference Zab 3:8; 9:9; Isa 12:2.
Cross-reference 1 Bus 5:20; Isa 31:5; Dan 3:17; Byak 12:11.

Runyankore - Rukiga Bible 1964. Public domain. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · Public domain · SourceEdition imported 2026-11-09.