Runyankore - Rukiga Bible 1964
Zaaburi 139
Oku Ruhanga amanya ebintu byona, kandi oku ataine hu arikwesherekwa
Aha Mukuru w'abeeshongozi. Zaaburi ya Daudi.
Ai MUKAMA, okancaaka, wammanya. 2
Noomanya emishutamire yangye, n'emyimukire yangye,
Omanyiire hare ebiteekateeko byangye. 3
Orondoreza kimwe emigyendere yangye n'emibyamire yangye,
Kandi noomanya emihanda yangye yoona; 4
Ahakuba orurimi rwangye ku ruba rutakashohoize kigambo,
Reeba MUKAMA, iwe oba waakimanyiire kimwe.
Ondi omu maisho n'enyima,
Kandi ontaireho omukono gwawe. 5
Okumanya nk'okwo nikuntangaaza kurengyesereize;
N'okw'ahaiguru munonga, tindikukubaasa. 6
Ndyayetantarira hi Omwoyo waawe?
Nari ndyahungira hi amaisho gaawe? 7
Ku ndaatembe omu iguru, okwo niyo ori;
Ku ndaatinde ekitabo kyangye Okuzimu, reeba nayo oriyo.
Ku ndaagurukise amapapa g'akasheeshe,
Naatuura aha muheru gw'enyanja, 8
N'okwo nayo omukono gwawe guryanyebembera,
Omukono gwawe gwa buryo gunkwate. 9
Ku ndaagire nti: Buzima omwirima nigwija kunshweka,
Kandi n'omushana oguunyehinguririize gube ekiro; 10
Omwirima nagwo tigwine ki gukushereka;
Ahakuba ekiro kihweza nka nyomushana;
Omwirima n'omushana nikyo kimwe ahariiwe.
Ahakuba niiwe waahangire ebicweka by'omunda yangye,
Okanteeranira omunda ya maawe. 11
Ninkuhimbisa ahabw'okumpanga omu muringo gw'eihano kandi ogurikutangaaza;
Ebi waakozire n'eby'okutangaaza,
Kandi eby'omu mutima gwangye noobimanya gye buzima. 12
Ekyemerero kyangye tikirakusherekirwe,
Ubu naabaire nimpangirwa omu mubonano,
Ninkorwa omu muringo ogutarikushobooroka omu myanya y'okuzimu ahansi y'ensi.
Amaisho gaawe gakaba gandeebera omunda, nkiri amaizi;
Omu kitabo kyawe hahandiikirwemu ebiro byangye byona,
Nk'oku byaragiirwe, hatakabaireho na kimwe. 13
Ai Ruhanga, ebiteekateeko byawe ka n'eby'obuguzi bwingi ahariinye!
Ku orikubiteeranira hamwe ni bingi. 14
Ku naakubibara, bikaakira omusheenyi obwingi.
Ku nsisiimuka, mba nkiri hamwe naiwe. 15
Nkaahenwa ki, oita ababi, ai Ruhanga,
Abakunda kusheesha eshagama bandugaho, 16
Abakugambaho kubi,
Abazigu baawe abarahirira busha eiziina ryawe. 17
Ai MUKAMA, abakwanga timbanga?
Tingwerwa kubi abaimuka kukurwanisa?
Nimbangira kimwe buzima;
Mbeeta abazigu bangye. 18
Oncaakye, ai Ruhanga, omanye omutima gwangye;
Ongyeze, omanye ebiteekateeko byangye;
Oreebe omuriinye ku haraabe harimu emitwarize yoona emibi,
Haza onyebembere omu muhanda ogw'ebiro n'ebiro.
Source notes (18)
- Cross-reference Zab 17:3; 44:21; Yer 12:3.
- Cross-reference 2 Bag 19:27; Tonz 3:63; Mat 9:4; Yoh 2:24, 25.
- Cross-reference Yob 31:4.
- Cross-reference Heb 4:13.
- Cross-reference Yob 42:3; Rom 11:33.
- Cross-reference Yer 23:24; Yon 1:3.
- Cross-reference Yob 26:6; Enf 15:11; Amo 9:2.
- Cross-reference Zab 23:3.
- Cross-reference Yob 22:13, 14.
- Cross-reference Yob 34:22; Dan 2:22.
- Cross-reference Yob 5:9.
- Cross-reference Yob 10:8-11.
- Cross-reference Zab 92:5.
- Cross-reference Zab 40:5.
- Cross-reference Zab 6:8; Isa 11:4.
- Cross-reference Kur 20:7; Yud 15.
- Cross-reference Zab 26:5.
- Cross-reference Zab 26:2; Yer 17:10.
Runyankore - Rukiga Bible 1964. Public domain. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · Public domain · SourceEdition imported 2026-11-09.