Runyankore - Rukiga Bible 1964

Zaaburi 103

Okusiima Mukama ahabw'emigisha ye yoona

Zaaburi ya Daudi

Singiza MUKAMA, iwe magara gangye!

Na byona ebiri omuriinye bisingize eiziina rye eririkwera! 2

Singiza MUKAMA, iwe magara gangye,

Kandi oteebwa ebirungi byona ebi yaakukoreire. 3

Niwe asaasira eby'okutahikiirira byawe byona,

Akakiza endwara zaawe zoona; 4

Akacungura amagara gaawe, ngu garekye kuhwerekyerera,

Akakujweka embabazi n'okusaasirwa nk'ekirunga; 5

Akakuhaazya ebirungi,

Ngu obutsigazi bwawe bugarukye busya nk'empungu. 6

MUKAMA akora eby'okuhikiirira;

Boona abarikubonabonesibwa abakorera eby'oburyo. 7

Akamanyisa Musa emitwarize ye,

N'Abaisraeli yaabooreka ebi yaakozire. 8

MUKAMA n'omunyambabazi, kandi omusaasizi;

Tarahuka kuguubwa kubi, kureka agira okusaasira kwingi. 9

Tariguma naahana obutoosha,

N'obu kwakuba okuguma n'ekiniga ebiro byona. 10

Tatugira nk'ebibi byaitu oku biri,

N'obu kwakuba okutuzimuurira nk'okutahikiirira kwaitu oku kuri. 11

Ahakuba nk'eiguru oku riri ahaiguru munonga okuruga ahansi,

N'embabazi ezi agirira abarikumutiina nikwo ziri nyingi. 12

Nk'oburugwa-izooba oku eri hare n'oburengyerwa-izooba,

Nikwo atwaire atyo hare eby'okushiisha byaitu. 13

Nka ishe w'abaana oku asaasira abaana be,

Nikwo MUKAMA asaasira abarikumutiina; 14

Ahakuba naamanya obuhangwa bwaitu,

Naijuka ku turi omucuucu. 15

Eby'omuntu, ebiro bye biri nk'obunyaatsi;

Aba gye, nk'ekirabyo ky'omu ishwa; 16

Ahakuba omuyaga ku gukihuuha, kihwaho,

Omwanya gwakyo gutsigara gutakikimanya.

Kwonka embabazi za MUKAMA ziguma aha barikumutiina okwiha iranaira, okuhitsya obusingye bwona,

N'okuhikiirira kwe kuhika aha baijukuru. 17

Aha barinda endagaano ye,

Bakaijuka ebiragiro bye, bakabyorobera. 18

MUKAMA akahamya ekitebe kye eky'obukama omu iguru,

N'obukama bwe butegyeka byona. 19

Musingize MUKAMA, imwe baamaraika be,

Imwe amamanzi g'amaani, abarikukora ebi yaaragiire,

mukahurira eiraka ry'ekigambo kye. 20

Musingize MUKAMA, imwe amahe ge goona,

Abaheereza be abakora ebi akunda. 21

Musingize MUKAMA, imwe emirimo ye yoona omu myanya yoona ei arikutegyeka.

Singiza MUKAMA, iwe magara gangye!

Source notes (21)

Cross-reference Zab 104:1.
Cross-reference Bir 6:12.
Cross-reference Kur 15:26; 34:7; Isa 33:24; Yer 17:14; Mak 2:5; Luk 7:47.
Cross-reference Zab 56:13.
Cross-reference Zab 107:9; Isa 40:31.
Cross-reference Zab 147:7.
Cross-reference Kur 33:13; 34:10.
Cross-reference Zab 86:15.
Cross-reference Isa 57:6; Yer 3:5, 12; Mik 7:18.
Cross-reference Ezr 9:13.
Cross-reference Zab 117:2; Luk 1:50.
Cross-reference Isa 38:17; Mik 7:19.
Cross-reference Mal 3:17.
Cross-reference Zab 78:39; Kut 3:19; Mub 12:7.
Cross-reference Zab 90:5; Yob 14:2.
Cross-reference Yob 7:10; Isa 40:7.
Cross-reference Bir 7:9.
Cross-reference Zab 47:2; 93:2; Dan 4:17.
Cross-reference Zab 148:2; Mat 6:10; Luk 2:13.
Cross-reference Kut 32:2; Dan 7:10; Heb 1:14.
Cross-reference Zab 103:1; 145:10.

Runyankore - Rukiga Bible 1964. Public domain. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · Public domain · SourceEdition imported 2026-11-09.