Runyankore - Rukiga Bible 1964

Zaaburi 102

Okushaba kw'omuntu orikubonabonesibwa, yaaba naataaga, naashuka amaganya omu maisho ga MUKAMA

Hurira okushaba kwangye, ai MUKAMA,

N'okutaka kwangye kukuhikyeho. 2

Otaanyima amaisho aha izooba ry'obusaasi bwangye,

Ontegye okutu kwawe,

Orahukye kungarukamu aha izooba eri ndaakutakirireho; 3

Ahakuba ebiro byangye bihwaho nk'omwika,

N'amagufa gangye nigabugumwamu omuriro nk'ekikoomi. 4

Omutima gwangye guri nk'obunyaatsi obuteirwe omushana, bukahonga;

Mbuzire n'agarya eby'okurya. 5

Ahabw'okutsinda kwingi munonga

Amagufa gangye garamataine n'omubiri. 6

Ndi nka nyamunyonyi y'omu ihamba,

Nari nk'ekihihizi omu myanya etarimu bantu.

Ndaara nindeeba;

Ndi nk'ekiteerankumba ekiteekami kyonka aha mutwe gw'enju. 7

Abazigu bangye banjuma eizooba ryona;

Abangwereire eiraro bampindwire eky'okujumisa abandi; 8

Ahakuba ndiire eiju ry'akashenda nk'omugaati,

Naajwanzya eky'okunywa kyangye n'amarira,

Ahabw'okuguubwa kubi kwawe n'ekiniga kyawe,

Ahabw'okuba ontwaire, wannaga. 9

Ebiro byangye ni nk'ekicuucu ky'omu mwabazyo ekihwaho.

Kandi nyomire nk'obunyaatsi. 10

Kwonka Iwe MUKAMA, oryaguma aha ngoma ebiro byona;

Kandi ab'obusingye bwona baryaguma bakwijukye. 11

Oryaimuka osaasire Saayuuni;

ahakuba nibwo bunaku bw'okugigirira embabazi;

Eego, obunaku obwatairweho buhikire. 12

Ahakuba abairu baawe bakunda amabaare gaayo,

Kandi basaasibwa omucuucu gwayo. 13

Amahanga garyatiina eiziina rya MUKAMA,

N'abagabe boona ab'ensi batiine ekitiinisa kyawe;

Ahabw'okuba MUKAMA aryagaruka ayombekye Saayuuni,

Kandi areeberwe omu kitiinisa kye.

Aryata omutima aha kushaba kw'enshoberwa;

Tarigaya kweshengyereza kwabo. 14

Ekyo ka kihandiikirwe ab'obusingye oburiija,

Ngu abantu abarizaarwa bahimbise MUKAMA; 15

Ahabw'okuba MUKAMA akareeba ahansi, ari ahaiguru omu Mwanya gwe ogurikwera,

Yaareeba n'ensi, naayema omu iguru, 16

Ngu ahurire okutsinda kw'embohe,

Akomorore abacwereirwe orubanja rw'okufa; 17

Ngu abantu bagambe omuri Saayuuni eiziina rya MUKAMA.

N'okuhimbisibwa kwe omuri Yerusaalemu, 18

Abantu bateeraniire hamwe

N'amahanga goona kuramya MUKAMA. 19

Akatuubya amaani gangye nkiri rwagati.

Yaacwa aha biro byangye.

Naagira nti: Ai bambe Ruhanga wangye, otantwara nkiri ahagati y'ebiro byangye,

Haza emyaka yaawe eba ey'obusiingye bwona. 20

Okutaho omusingi gw'ensi iranaira,

N'eiguru rikahangwa emikono yaawe.21 22

Ebyo biryahwaho, kwonka Iwe oryagumaho;

Eego, ebyo byona biryakura nk'ekijwaro,

Oryabihindura nk'omwenda, bihindukye okundi; 23

Kwonka Iwe tohinduka,

Kandi emyaka yaawe terihwaho; 24

Abaana b'abairu baawe baryagumaho;

Kandi oruzaaro rwabo ruryahambibwa omu maisho gaawe.

Source notes (24)

Cross-reference Zab 39:12; Kur 2:23.
Cross-reference Zab 18:6; 27:9; 56:9; 69:17.
Cross-reference Tonz 1:13; Yak 4:14.
Cross-reference 2 Sam 12:17; Isa 40:7; Yak 1:10, 11.
Cross-reference Yob 19:20.
Cross-reference Isa 34:11; Zef 2:14.
Cross-reference Byak 26:11.
Cross-reference Zab 42:3.
Cross-reference Zab 109:23.
Cross-reference Zab 135:13; Kur 3:15.
Cross-reference Isa 60:10; Yer 29:10; Zek 1:12.
Cross-reference Neh 4:2.
Cross-reference Zab 138:4; 1 Bag 8:43; Isa 60:3.
Cross-reference Zab 22:31; Isa 43:21; Rom 15:4; 1 Kor 10:11.
Cross-reference Zab 14:2; Bir 26:15.
Cross-reference Zab 79:11.
Cross-reference Zab 22:22.
Cross-reference Zab 22:27.
Cross-reference Zab 89:45; Yob 36:26; Zab 90:2; Isa 38:10.
Cross-reference Heb 1:10-12.
Cross-reference Kut 1:1; Yob 38:4-7; Isa 42:5.
Cross-reference Isa 34:4; 51:6; Mat 24:35; Kush 20:11.
Cross-reference Isa 41:4; Mal 3:6; Yak 1:17.
Cross-reference Zab 37:29; 69:36.

Runyankore - Rukiga Bible 1964. Public domain. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · Public domain · SourceEdition imported 2026-11-09.