Runyankore - Rukiga Bible 1964
Miika 5
Mbwenu oyehinguririziibwe orugo rw'amabaare;
Twagotwa;
Nibateeza omutegyeki wa Israeli
Enkono aha matama.
Okuzaarwa kwa Kristo n'obukama bwe
Kwonka iwe, Betelehemu eya Efuraata,
Ori mukye kubarirwa omu nganda za Yuda,
Omuriiwe nimwo hariruga
Orimbeera omutegyeki wa Israeli,
Ou obukomooko bwe buri obwa iranaira
Omu biro ebitakimanywa. 2
Nikyo aribaheerayo okuhitsya obunaku
Obu orikurumwa arizaariramu;
Obwo ab'omuri beene ishe abariba batsigaireho
Baryagarukira Abaisraeli. 3
Nawe aryahama, ariise obusyo bwe
Aine amaani ga MUKAMA,
N'ekitiinisa ky'eiziina rya MUKAMA Ruhanga we.
Kandi nabo baryatuura buhooro,
Ahabw'okuba aryaba mukuru okuhitsya aha muheru gw'ensi,
Kandi omuntu ogwo aryaba obusingye bwaitu. 4
Omuasiria ku ariteera ensi yaitu,
Yaagiribatiirira,
Turyaimutsya abariisa mushanju
N'abanyiginya munaana, bamurwanise. 5
Bwanyima baryategyekyesa ensi ya Asiria rurara,
N'ensi ya Nimuroodi bagitegyekyese rurara esyoirweyo.
Kandi Omuasirira ku arirenga emyatano yaitu,
Yaateera ensi yaitu, yaagiribatiirira,
Nibo barimutujuna.
Batyo aba Yakobo abariba batsigaireho
Baryaba ahagati y'amahanga maingi,
Nk'orume orurugire ahari MUKAMA,
Nari nk'orutoonyerera orurikugwa aha bunyaatsi,
Orutarinda muntu, n'obu kwakuba okutegyereza abantu. 6
Kandi aba Yakobo abariba batsigaireho
Baryaba omu mahanga ahagati y'amahanga maingi,
Nk'entare eri ahagati y'enyamaishwa z'omu kibira,
Kandi nk'omugunju gw'entare oguri omu busyo bw'entaama,
Oguba niguzirabamu, gukaziribatiirira,
Gukazitaagataagura, hakabura ow'okuzijuna. 7
Omukono gwawe guryabangirwa abazigu baawe,
N'abarikukwanga boona bamarweho. 8
Kandi MUKAMA naagira ati: Eryo izooba
Ndyakumaraho embaraasi zaawe,
N'ebigaari byawe by'orugamba mbicwekyereze. 9
Ndyamaraho endembo z'omu nsi yaawe,
N'ebigo byawe byona mbisheenye. 10
Ndyamaraho oburugo oburi omu ngaro zaawe,
Kandi torigira barangi bundi. 11
Ndyakumaramu ebishushani byawe n'enyomyo zaawe,
Kandi torigaruka kuramya bikozirwe emikono yaawe. 12
Ndyakuranduramu za Ashera zaawe,
Ncwekyereze endembo zaawe; 13
Kandi amahanga agataroorobire
Ndyagahoora enzigu ngwirwe kubi, ngainiire ekiniga.
Source notes (13)
- Cross-reference Kut 35:19; Zab 90:2; Enf 8:22, 23; Isa 9:6, 7; Hos 6:3; Mat 2:6; Yoh 1:1; 7:42; Heb 7:14.
- Cross-reference Mik 4:7, 9, 10.
- Cross-reference Zab 72:8; Isa 11:3-5; 40:11; Mik 7:14; Luk 1:32.
- Cross-reference 2 Bag 18:13; Efe 2:14.
- Cross-reference Kut 10:8, 10, 11.
- Cross-reference Hos 5:14.
- Cross-reference Isa 26:11.
- Cross-reference Isa 2:7; Zek 9:10.
- Cross-reference Isa 17:9; Hos 8:14.
- Cross-reference Bir 18:10.
- Cross-reference Bir 16:22; Isa 17:8; Hos 3:4; Zek 13:2.
- Cross-reference Bir 16:21.
- Cross-reference Zab 149:7; 2 Tes 1:8.
Runyankore - Rukiga Bible 1964. Public domain. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · Public domain · SourceEdition imported 2026-11-09.