Runyankore - Rukiga Bible 1964
Miika 2
Ruhanga okufubira abantu ahabw'okukora kubi enshoberwa
Baryakareeba, abacuma enaama z'obubi,
Bakakora kubi bakiri aha bitabo byabo!
Kandi bukisheesha, bakabikora,
Ahabw'okuba biri omu bushoboorozi bwabo. 2
Nibeetenga ebibanja by'abandi, babikwata;
Kandi beetenga n'amaju, baganyaga;
Bahata omuntu n'eka ye,
Omuntu n'obuhunguzi bwe. 3
Nikyo MUKAMA arikugirira ati:
Reeba, nincumira oru ruganda enaama y'okurureetaho akabi,
Aku mutaribaasa kwiha mu bitsya byanyu;
Kandi timurigyenda na myekuniko,
Ahabw'okuba obunaku obwo buryaba bubi. 4
Eryo izooba baryayeshongora ekyeshongoro ky'okubagaaniiza,
Baboroogye, nibatonzya n'obusaasi bwingi,
Nibagira bati: Tumariirweho kimwe;
Yaahingisa omugabo gw'abantu bangye;
Mbwenu ka yaaguunyaka!
Emisiri yaitu agibaganisiize abarikutunyaga.
Nikyo muriburira ow'okubaganisisa omugoye
Emigabo y'omu ihanga rya MUKAMA. 5
Batyo nibahanuura bati: Mutahanuura!
Omuntu tashemereire kuhanuura ebigambo nk'ebi;
Okuhemuka tikurituhikaho.
Iwe nju ya Yakobo 'we, eki kikaagambirwe?
Omwoyo wa MUKAMA takiine kugumisiriza?
Ebi niwe arikubikora?
Ebigambo byangye tibirikugasira
Orikugyenda n'omutima gugororokire? 6
Kwonka mwimukire kurwanisa abantu bangye nk'omuzigu;
Abarikuba nibahingura baine obusingye
Batarikwenda kurwana,
Mubaaka eminagiro yaabo.
Abakazi b'abantu bangye mubabinga
Omu maju gaabo marungi,
N'abaana baabo abato mubaihiraho kimwe ekitiinisa kyangye. 7
Nimwimukye mugyende;
Ahabw'okuba ogu ti mwanya gw'okuhuumuriramu,
Ahabw'oburofa bwagwo oburikucwekyereza
Okucwekyereza kubi munonga. 8
Omuntu orikugyendagyenda, naagamba eby'omwoyo n'eby'ebishuba,
Naagira ati: Niinyija kubahanuurira ebya viinyo n'ebirikusinza;
Ogwo niwe yaakuba nabi w'aba bantu! 9
Iwe Yakobo, abaawe boona ndyabataaruura,
Ntaaruure Abaisraeli abatsigaireho;
Ndyabateeranira hamwe
Nk'entaama eziri omu kibuga kyazo,
Nk'obusyo oburi omu iriisizo ryabwo,
Bagire akaari kaingi ahabw'okuba baingi. 10
Orikusheenya ah'okuraba, aryabeebembera;
Bahabandanire, bashohore
Nibaraba omu irembo.
Omugabe waabo aryarabaho, abaze omu maisho,
MUKAMA abeebembeire.
Source notes (10)
- Cross-reference Zab 36:4.
- Cross-reference Isa 5:8.
- Cross-reference Amo 3:1, 2; 5:13; Yer 8:3.
- Cross-reference Hab 2:6.
- Cross-reference Amo 2:12.
- Cross-reference 2 Bus 28:8.
- Cross-reference Lev 18:25; Bir 12:9; Heb 13:14.
- Cross-reference Amo 2:12; Yer 5:13.
- Cross-reference 2 Bag 25:11; Yer 31:10; Mik 4:7.
- Cross-reference 2 Bag 25:10; Isa 52:12; Mik 4:6-7.
Runyankore - Rukiga Bible 1964. Public domain. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · Public domain · SourceEdition imported 2026-11-09.