Skip to content
BibleKenya
RUNYANKO Okutonzya kwa Yeremia 3 v. 22

Runyankore - Rukiga Bible 1964

Okutonzya kwa Yeremia 3:22

Verse 22 is marked below, with the whole chapter around it. Read from the start

Amatsiko agu Saayuuni aine ahabw'embabazi za Ruhanga

1

Niinye muntu ori, owaabonabonesiibwe

Enkoni y'ekiniga kye. 2

Akambiga, yampitsya omu mwirima,

Ahataine kuhweza kwona.

Buzimazima akaguma nambangira omukono

Buri kaanya, bwarugaho bwaira. 3

Omubiri gwangye n'oruhu rwagwo abihwereize,

N'amagufa gangye yaagahendagura, 4

Angotsire, yanshweka

Obushaarizi n'okubonabona. 5

Yantuuza omu mwirima

Nk'abaafiire ira. 6

Ankubiise orugo; n'ahabw'ekyo tindikubaasa kucwa;

Yambohesa enjegyere ziremeire; 7

N'obu ndikweta, nkataka,

Tarikwenda kuhurira kushaba kwangye;

Emihanda yangye agiitiise amabaare gabaizire,

N'otuhanda twangye atukiikamize. 8

Ambeereire nk'edubu egwereire,

Kandi nk'entare eyesherekire.

Anteishwire omuhanda, yantaanyagura,

Yampindura enshoberwa. 9

Ananwire obuta,

Yampindura ekimaasho ky'omwambi gwe. 10

Emyambi y'omu mutana gwe

Yaagimarira omu mutima gwangye; 11

Mpindukire eky'okushekyererwa omu ihanga ryangye,

Nibaanyeshongora eizooba ryona. 12

Anyijwize obushaarizi,

Yaanyigutsa apusinto. 13

Amaisho gangye agacwisize amabaare,

Yanshweka eiju rya kashenda.

Omutima gwangye gubuzirwe obusingye,

Naayebwa oku okushemererwa kushusha.

Ntyo naagira nti: Ekitiinisa kyangye

N'amatsiko gangye ahari MUKAMA bihweireho.

Ijuka okubonabona kwangye n'enaku zangye,

Apusinto n'endurwe.

Omutima gwangye gutuura nigubiijuka,

Gweinamiriire omunda yangye.

Kwonka eki nikiijuka;

N'ahabw'ekyo nyine amatsiko. 14

Embabazi za MUKAMA tizihwaho,

N'okusaasira kwe kugumaho ebiro byona. 15

Buri kasheeshe ziba nsya;

Obwesigwa bwawe ni bwingi. 16

Omutima gwangye nigugira guti: MUKAMA niwe mugabo gwangye;

Nikyo ndimugiriraho amatsiko. 17

MUKAMA ni murungi aha barikumutegyereza,

N'aha muntu orikumusherura. 18

Ni kirungi omuntu okutegyereza

Okujuna kwa MUKAMA atuurize. 19

Ni kirungi omuntu okwemera omugamba

Akiri omutsigazi.

Ashutame wenka ahunami,

Ahabw'okuba MUKAMA niwe agumukoreire. 20

Ate eminwa ye omu mucuucu,

Obundi hakaabaho amatsiko. 21

Ategye abateezi omushaya gwe,

Bamwitse ebijumo. 22

Ahakuba MUKAMA taribingira kimwe

Muntu ebiro byona; 23

Kandi, n'obu yaakusaasa omuntu,

Kwonka aryamugirira esaasi,

nk'oku embabazi ze nyingi ziri. 24

Ahabw'okuba tabonabonesa bantu nkana,

N'obu kwakuba okubasaasa. 25

Okusingyera embohe zoona ez'omu nsi, 26

Nari okuzibira omuntu kutunga

Ebimushemereire omu maisho ga Rukira-boona,

Nari okumwitira orubanja,

Ebyo byona MUKAMA tabyenda. 27

N'oha oraragiire kikabaho,

MUKAMA atakiragiire? 28

Ebibi n'ebirungi tibiruga

Omu kanwa ka Rukira-boona? 29

Ahabw'enki omuntu ohuriire

Ayetomboitera okufubirwa ahabw'ebibi bye? 30

Ka tureebe emitwarize yaitu, tugishwijume,

Tugarukye ahari MUKAMA. 31

Ka twimutsye emitima n'emikono yaitu

Ahari Ruhanga omu iguru, tugire tuti: 32

Tukashiisha, kandi twagoma;

Tiwaatusaasira.

Okeehumbika ekiniga kyawe,

Waatuhiiga, waatwita otaine saasi.

Okeeshweka ekicu,

Okushaba kwona kwabura oburabo. 33

Okatuhindura ekumbwe

N'ebisingo omu mahanga.

Abazigu baitu boona nibatujuma; 34

Obwoba n'obusya, okusheenywa n'okucwekyerera,

Byona bituhikireho. 35

Amaisho gangye nigahimintika emigyera y'amarira,

Nindizibwa okucwekyerera kw'eihanga ryangye.

Amaisho gangye nigahimintika amaizi

Obutaitsya, gatarikurereera, 36

Okuhitsya obu MUKAMA aryema omu iguru,

Akareeba ahansi;

Amaisho gangye nigandeetera obujune,

Ku ndikureeba ebiri aha baishiki b'omu rurembo rwangye. 37

Abaanyangiire busha

Bampiigire nk'enyonyi; 38

Bannagire omu busya mpuriire,

Banteereramu amabaare; 39

Amaizi gandengyera aha mutwe;

Naagira nti: Mbwenuho naafeera kimwe. 40

Ai MUKAMA, nkatakira eiziina ryawe,

Ndi okuzimu omu kiina;

Waahurira okweshengyereza kwangye, nti:

Otanga kutega okutu kwawe kuhurira okutaka kwangye. 41

Ku naakutakiire, waanyirira haihi,

Waagira oti: Otatiina. 42

Ai MUKAMA, okantonganira,

Waacungura amagara gangye. 43

Ai MUKAMA, okareeba okukorwa kubi kwangye;

Ba niiwe wancwera orubanja. 44

Okareeba okuhoora enzigu kwabo kwona,

N'enaama yaabo yoona ei bangiriire.

Ai MUKAMA, ohuriire ebigaaniizo byabo,

N'enaama yaabo yoona, ei bangiriire;

Abaanyimukiriire, nibarenzya eizooba nibandwanisa

N'ebigambo byabo kandi n'ebiteekateeko byabo. 45

Reeba emishutamire yaabo n'emiimukire yaabo,

Nibaanyeshongora. 46

Ai MUKAMA, oryabazimuurira

Nk'emirimo y'emikono yaabo oku eri.

Oryabaha omutima gugangaire,

Omukyeeno gwawe gubahikyeho. 47

Ai MUKAMA, oryabahiiga obainiire ekiniga;

Obahwerekyereze, obamare ahansi y'eiguru ryawe.

Source notes (47)
  1. Cross-reference Yer 20:18.
  2. Cross-reference Isa 5:30.
  3. Cross-reference Yer 50:17; Zab 51:8.
  4. Cross-reference Yob 19:7-12.
  5. Cross-reference Zab 143:3.
  6. Cross-reference Zab 88:8.
  7. Cross-reference Yob 30:20; Zab 22:2.
  8. Cross-reference Hos 13:8.
  9. Cross-reference Yob 16:12.
  10. Cross-reference Yob 6:4.
  11. Cross-reference Yer 20:7; Yob 30:9.
  12. Cross-reference Yer 9:15.
  13. Cross-reference Yer 6:26; Enf 20:17.
  14. Cross-reference Mal 3:6.
  15. Cross-reference Zab 36:5.
  16. Cross-reference Zab 16:5.
  17. Cross-reference Zab 130:6; Isa 30:18.
  18. Cross-reference Mik 7:7.
  19. Cross-reference Mub 12:1; Mat 11:29.
  20. Cross-reference Yob 42:6.
  21. Cross-reference Isa 50:6; Mat 5:39.
  22. Cross-reference Zab 103:8, 9.
  23. Cross-reference Zab 106:45.
  24. Cross-reference Heb 12:6-11.
  25. Cross-reference Zab 107:10.
  26. Cross-reference Hab 1:13.
  27. Cross-reference Zab 33:9.
  28. Cross-reference Isa 45:7.
  29. Cross-reference Enf 19:3.
  30. Cross-reference Yoel 2:12, 13.
  31. Cross-reference Zab 119:48.
  32. Cross-reference Dan 9:5.
  33. Cross-reference 1 Kor 4:13.
  34. Cross-reference Isa 24:17; 51:19.
  35. Cross-reference Yer 13:17.
  36. Cross-reference Isa 63:15.
  37. Cross-reference Zab 11:1; 35:19.
  38. Cross-reference Yer 37:16; Dan 6:17.
  39. Cross-reference Zab 69:2; 88:5; Ezk 37:11.
  40. Cross-reference Zab 130:1, 2.
  41. Cross-reference Yos 1:9; Yak 4:8.
  42. Cross-reference 1 Sam 24:15.
  43. Cross-reference Zab 35:22, 23.
  44. Cross-reference Yer 11:19, 20.
  45. Cross-reference Zab 139:2.
  46. Cross-reference Zab 28:4; 2 Tim 4:14.
  47. Cross-reference Bir 25:19.

Runyankore - Rukiga Bible 1964. Public domain. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · Public domain · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.