Runyankore - Rukiga Bible 1964
Yobu 4
Okugarukamu kwa Elifaazi
Bwanyima Elifaazi Omutemaani yaagarukamu ati:
Omuntu ku yaakuteeraho kugamba naiwe, okaaguubwa kubi?
Beitu shi hoona n'oha orikubaasa kwezibira kugamba? 1
Reeba, okaba oyegyesa baingi,
Kandi okaba ohamya emikono etaine maani.
Ebigambo byawe bikaba biramira orikwenda kugwa,
Kandi okaba ohamya entegye ezirikubonda.
Kwonka mbwenu niiwe bihikireho, kandi tiwaagumisiriza!
Bikukozireho, waahahaaza omutima! 2
Obwesigye bwawe tiburi omu kutiina Ruhanga,
Kandi amatsiko gaawe tigari omu kuhikiirira kw'emitwarize yaawe? 3
Mbwenu ijuka; n'oha oracwekyereire ataine rubanja?
Nari shi, abahikiriire baramazirweho? 4
Nyowe nk'oku ndareebire, abahinga okutahikiirira,
Bakabiba obubi, nibyo bagyesha. 5
Bacwekyerezibwa omwitsyo gwa Ruhanga,
Bamarwaho okuhoorera kw'ekiniga kye. 6
Okutsinda kw'entare, n'eiraka ry'entare enshaarizi bihunama,
N'amaino g'emigunju y'entare gacweka.
Ekisimba ky'entare kifa ahabw'okubura omuhiigo,
Kandi n'obwana bw'entare enkazi butaataana. 7
Mbwenu hariho ekigambo eki naagambiirwe bwesherekye,
Okutu kwangye kukakihurira nikiija mpora, 8
Omu biteekateeko ebyarugire omu kworekwa kwa nyekiro,
Abantu baahirwayo.
Naagira obwoba, naatetema,
Kyareetera amagufa gangye goona kukomangana.
Omuzimu gwandaba omu maisho,
Ekikoba kyampwa aha mutwe; 9
Gwayemerera aho, kwonka tinaamanya oku gurikushusha;
Omu maisho gangye haabamu waringa.
Haabaho akaceceko, bwanyima naahurira eiraka eririkugira riti: 10
Omuntu ofa naabaasa kuba ohikiriire omu maisho ga Ruhanga?
Naabaasa kuba oshugaine omu maisho g'Owaamuhangire? 11
Nangwa n'abagaragwa be tabeesiga,
Na baamaraika be aboomesereza ebishobyo; 12
Kaashwa abo abatuura omu maka g'eitaka,
Agu omusingi gwago guri omu mucuucu;
Abarikuribatwa bakatanga ekiyenje kubaruka. 13
Bacwekyererera ahagati y'akasheeshe n'omwabazyo;
Bahweraho kimwe, hataine okyetaireho. 14
Omurunga gw'eihema ryabo ku gubaihwamu,
Tibafa, kandi bakafa bataine bwengye?
Source notes (14)
- Cross-reference Isa 35:3; Heb 12:12.
- Cross-reference Yob 1:1; 31:24.
- Cross-reference Zab 37:25.
- Cross-reference Enf 22:8; Hos 10:13; Gal 6:7, 8.
- Cross-reference Kur 15:8; Zab 18:15; Isa 11:4; 30:33; 2 Tes 2:8.
- Cross-reference Zab 58:6.
- Cross-reference Yob 26:14.
- Cross-reference Yob 33:15; Isa 29:10; 1 Sam 26:12; Kut 15:12.
- Cross-reference Kub 12:8; 1 Bag 19:12; Zab 17:15.
- Cross-reference Yob 9:2; 25:4; 32:2.
- Cross-reference Yob 15:15.
- Cross-reference Yob 10:9; 13:28; 33:6; Isa 64:8; 2 Kor 4:7; 5:1.
- Cross-reference Zab 90:5, 6; Isa 38:12; 57:1.
- Cross-reference Yob 36:12; Enf 5:23; 10:21; Hos 4:6.
Runyankore - Rukiga Bible 1964. Public domain. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · Public domain · SourceEdition imported 2026-11-09.