Runyankore - Rukiga Bible 1964
Yobu 3
Okutonzya kwa Yobu ahabw'obusaasi
Bwanyima y'ebyo Yobu yaayashamya akanwa ke, yaagamba, yaakyeena eizooba eri yaazaariirweho, naagira ati: 1
Nkaahenwa ki, eizooba eri naazaariirweho ricwekyerezibwa,
N'ekiro eki baagambiireho ngu,
Maawe abakira enda y'omwana w'omwojo.
Eryo izooba rihinduka omwirima!
Ruhanga ow'ahaiguru areka kuryetaho,
Kandi rireka kujwerwa omushana; 2
Omwirima n'ekibunda kya rufu birihindura eryabyo,
Ebicu birikondakondera,
Obwira-kabiri bwona buritiinisa,
Ekyo kiro kikwatwa omwirima ndindindi,
Kireka kushemererwa omu biro by'omwaka,
N'obu kwakuba okubarirwa omu gandi meezi;
Eego, ekyo kiro kiba engumba,
Kireka kuhurirwamu akaari k'okushemererwa; 3
Rikyeenwa abakyeena ebiro,
Abarikumanya kwimutsya Leviasaani; 4
Enyonyoozi z'omu buturuturu bwaryo zireka kujwa,
Ritegyereza omushana, guriburira,
Kandi ribura kureeba okujuguta kw'omushekye;
Ahabw'okuba tiriragaize nda ya maawe,
N'obu kwakuba okuzibira amaisho gangye kureeba obusaasi.
Ahabw'enki ntarafiire ninzaarwa,
Nkabura kwitsya ninkishohora nti? 5
Ahabw'enki naashangire ebibero by'okukiikirwaho,
N'amabeere g'okwonka?
Kuri kyabaire kityo, nkaabaire mbyami, mpunami;
Nkaabaire ngwejegyeire, nyehuumuriire, 6
Ndi hamwe n'abagabe b'ensi n'abahi b'obwengye baabo,
Abaayeyombekyeire ebituuro by'ekitiinisa by'okuziikwamu;
Nari shi, n'abanyiginya abaabaire baine ezaabu,
Baijwize amaka gaabo efeeza. 7
Kuri naabaire nk'enda erugamu etamanyirwe,
Nk'abeereere abatarareebire mushana; 8
Okwo niyo abasiisi baba batakiitira kubi bantu,
Kandi niyo abaruhire baruhuukira. 9
Niyo enkwatwa zihuumurira hamwe, zituurize,
Zitakihurira iraka ry'orikuzikoresa kubi.
Omuto n'omukuru niyo bataaha,
Kandi omuhuuku tategyekyerwayo mukama we. 10
Ahabw'enki Ruhanga ajwisiza enshoberwa omushana,
N'abaine entimba aha mutima akabagumyaho? 11
Ahabw'okuba beetenga rufu, tibagibona;
Bagitimba okukira oku abantu batimba ezaabu esherekirwe.
Ku bahika aha kituuro, bashemererwa munonga, beesiima. 12
Ahabw'enki Ruhanga ajwisiza omuntu omushana,
Otaine butooro, kandi ou akubiire hamwe? 13
Manya okutsinda kwangye kumbeereire eby'okurya,
N'okuborooga kwangye nikweshuka nk'amaizi; 14
Ahabw'okuba eki ndikutiina, nikyo kirikumpikaho,
Kandi ekirikuunyitsa obwoba nikyo kirikungwaho.
Tiinyine busingye, tintuurize, kandi tiinyine buhuumure,
Kureka enaku nizo zirikuunyeshukyera.
Source notes (14)
- Cross-reference Yer 20:14-18.
- Cross-reference Yob 10:21, 22; Zab 23:4; Isa 9:2; Luk 1:79.
- Cross-reference Yob 41:1.
- Cross-reference Yob 41:18.
- Cross-reference Kut 30:3; 50:23.
- Cross-reference Isa 58:12.
- Cross-reference Zab 58:8; Mub 6:3; 1 Kor 15:8.
- Cross-reference Yob 17:16.
- Cross-reference Kur 5:13, 14.
- Cross-reference Yob 10:1; 2 Bag 4:27; 1 Sam 1:10.
- Cross-reference Enf 2:4; Kush 9:6.
- Cross-reference Yob 19:8; Isa 40:27.
- Cross-reference Zab 22:1; 38:8; 42:3; 80:5; 102:9.
- Cross-reference Enf 10:24.
Runyankore - Rukiga Bible 1964. Public domain. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · Public domain · SourceEdition imported 2026-11-09.