Runyankore - Rukiga Bible 1964
Yobu 37
Kandi ebi nabyo bireetera omutima gwangye
Kutetema n'okwesikura.
Yeimwe, nimuhurire okuhinda kw'eiraka rye,
Okurikurigitira omu kanwa ke.
Akwohereza kubuga eiguru ryona,
N'okutyankana kw'emirabyo ye kuhika aha muheru gw'ensi. 1
Bwanyima yaayo eiraka rye rihinda,
Arigitsa eiraka ry'ekitiinisa kye,
Eiraka rye ku rihurirwa, tazibira nkuba. 2
Ruhanga ahindisa eiraka rye omu buryo bw'okutangaaza,
Akora ebikuru ebi tutarikubaasa kushoboorora;
Ahabw'okuba agambira ebirika ati: Gwa ahansi,
Kandi agira orutoonyerera n'enjura ati: Mugire amaani. 3
Azibira abantu kukora,
Ngu boona bamanye ebi arikukora. 4
Obwo enyamaishwa zitaaha omu bweshereko bwazo,
Ziguma omu nyanga zaazo, 5
Omuyaga gw'akasooroora gureetwa obukiizi-bwa-buryo,
N'embeho eruga aha bukiizi-bwa-bumosho. 6
Ahabw'omwitsyo gwa Ruhanga amaizi gakwata,
N'ebiyanja bikwata okuhika ahi birikugarukira.
Ekicu kikwaitse akiijuza amaizi,
Abamba ebicu ebirimu enkuba ze. 7
Biguma nibyehinguririza ahabw'okwebembera kwe,
Ngu bibone kuhikiiriza eki arikubiragiira kukora kyona
Omu nsi etuurwamu abantu. 8
Eki abiikiririza kubaho, n'ahabw'okuhana,
Nari ahabw'ensi ye, nari ahabw'embabazi ze.
Iwe Yobu, hurira ebi; ba orekire,
Obanze oteekateekye aha mirimo ya Ruhanga erikutangaaza.
Noomanya oku Ruhanga ateeraho ebicu bye ebiragiro,
Akaragiira omurabyo gwe kubityankaniramu? 9
Nari shi noomanya okuzeereera kw'ebicu,
Ku guri omurimo ogurikutangaaza ogw'Ogwo oine okumanya okuhikire,
Iwe, ou ebijwaro bitagata,
Ensi ku egira obucureera ahabw'omuyaga gw'obukizi-bwa-buryo? 10
Noobaasa kubamba eiguru nkawe,
Erigumire nk'endeeberwamu eheesirwe? 11
Twegyese ebi turaamugambire;
Ahabw'okuba titurikubaasa kutebeekanisa bigambo byaitu ahabw'omwirima.
Akaagambirwa ku ndikwenda kugamba nawe?
Hariho omuntu oyenda kumirirwa kimwe?
Kandi na hati abantu tibarikubaasa kureeba omushana ogurikumurinkana omu iguru
Omuyaga gwaheza kuhinguraho, gwayeruuraho ebicu. 12
Aha bukiizi-bwa-bumosho harugayo okumurinkana nk'okw'ezaabu;
Ruhanga ajwaire ekitiinisa kirikwitsa obwoba. 13
Ow'obushoboorozi bwona titurikubaasa kumwetegyereza,
Rugambwa omu bushoboorozi, taita manja,
Kandi omu kuhikiirira kwe okuhikire taribonabonesa. 14
N'ahabw'ekyo abantu bamutiina;
Kandi tayeta ha muntu weena orikweyeta omunyabwengye.
Source notes (14)
- Cross-reference Yob 40:9; Zab 18:13; 29:3-9; 68:33.
- Cross-reference Yob 5:9; Zab 147:16, 17.
- Cross-reference Zab 109:27.
- Cross-reference Yob 38:40; Zab 104:22.
- Cross-reference Yob 1:19; 9:9; Isa 21:1.
- Cross-reference Yob 38:29, 30; Zab 147:17.
- Cross-reference Enf 8:31.
- Cross-reference Yob 36:31; 38:23, 26, 27; Ezr 10:9; 1 Bag 18:45; 1 Sam 12:18, 19; Kur 9:18, 23.
- Cross-reference Yob 36:4; 1 Sam 2:3.
- Cross-reference Kut 1:6; Isa 42:5; 44:24.
- Cross-reference Efe 4:18.
- Cross-reference Zab 104:1.
- Cross-reference Zab 99:4; Tonz 3:33; 1 Tim 6:16.
- Cross-reference Zab 130:4; Mat 10:28; 11:25; 1 Kor 1:26.
Runyankore - Rukiga Bible 1964. Public domain. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · Public domain · SourceEdition imported 2026-11-09.