Runyankore - Rukiga Bible 1964
Yobu 29
Yobu okwijuka obusingye obu yaabaire aine
Bwanyima Yobu yaagumizamu naacwa enfumu ze, naagira ati:
Nkaabaasibwa ki, mba nk'oku naabaire ndi omu meezi agaahingwire,
Nk'omu biro ebi Ruhanga yaabaire andindiramu, 1
Etabaaza ye neeyakira aha mutwe gwangye,
Nindaba omu mwirima ahabw'okuhwezesa kwe, 2
Nk'oku naabaire ndi, ndi omushaija waahamya,
Obu Ruhanga yaabaire akiine omukago n'eka yangye. 3
Obwo Ow'obushoboorozi bwona akaba ari hamwe naanye,
Abaana bangye bankiikize; 4
Ebigyere byangye nibinaabisibwa n'amate,
N'orukiri niruunyitururira emigyera y'amajuta.
Ku naabaire nza aha irembo ry'orurembo,
Naata ekitebe kyangye omu mbuga,
Abatsigazi bakaba bandeeba, bampigiza,
N'abagurusi baimuka, beemerera; 5
Abanyiginya baceceka, bafa mamigye,
Bataire engaro aha munwa; 6
Eiraka ry'abakungu rihunamisibwa,
Endimi zibaramata omu nkanka.
Okutu kwona okwabaire kumpurira,
kuunyeta ohiiriirwe,
N'eriisho eryabaire rindeeba, rikihamya; 7
Ahabw'okuba nkaba njuna omworo
owaabaire ataka,
N'efuuzi etaine kihwera; 8
Orikwenda kufa anshabira omugisha,
Kandi nkaba ndeetera omutima gw'omufaakazi kweshongora ahabw'okushemererwa. 9
Nkaba njwara okuhikiirira, kumpika;
Obwinganisa bwangye bukaba buri nk'omunagiro n'ekikwemba.
Empumi nkaba nzibeera amaisho,
N'ebirema mbibeera amaguru; 10
Nkaba ndi ishe w'abooro,
N'abu ntarikumanya, mbuuririza ekirikubasaasa; 11
Nkaba mpigura emba z'abasiisi,
Mbanagisa ebi baine omu maino. 12
Omu biro ebyo nkaba ngira nti: Ndyagwa omu kyashuri kyangye,
Nkanyise ebiro byangye bibe nk'omusheenyi; 13
Emizi yangye erandire omu maizi,
N'amataagi gangye gatondweho orume, burugyeho busheeshe, 14
Ekitiinisa kyangye kigume kibe kisya,
N'obuta bwangye bugume buri busya omu ngaro zangye.
Obwo abantu bakaba bantega okutu,
Bategyereza eki ndaahanuure bahunami. 15
Ku naabaire mpeza kugamba, bakaba batagarukamu,
Ebigambo byangye bibatoonyereraho. 16
Bakaba bantegyereza nk'abategyereize enjura,
Baashama nk'abategyereize enjura ya katumba. 17
Nkaba mbasherekyera, beehweire amatsiko,
Kandi bakaba batammaraho kushemuuka.
Nkaba mbaihiramu ebi baraakore, nshutama nabo nk'omukuru waabo,
Mbatuuramu nk'omugabe omu ngabo ze,
Kandi nk'orikugumya abarikucura.
Source notes (17)
- Cross-reference Yob 18:6; Zab 18:28.
- Cross-reference Yob 15:8; Zab 25:14; Enf 3:32.
- Cross-reference Zab 128:3.
- Cross-reference Yob 20:17; Bir 32:13, 14.
- Cross-reference Yob 21:5.
- Cross-reference Ezk 3:26.
- Cross-reference Zab 72:12.
- Cross-reference Yob 31:20; Rus 2:20.
- Cross-reference Zab 132:9; Isa 59:17; Zek 3:5; Efe 6:14.
- Cross-reference Enf 29:7.
- Cross-reference Zab 3:7; 58:6.
- Cross-reference Zab 30:6.
- Cross-reference Yob 18:16; Zab 1:3.
- Cross-reference Kut 49:24; Isa 40:31; 41:1.
- Cross-reference Bir 32:2.
- Cross-reference Bir 11:14; Zab 119:131; Enf 16:15; Zek 10:1.
- Cross-reference Kut 4:5; Enf 16:15.
Runyankore - Rukiga Bible 1964. Public domain. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · Public domain · SourceEdition imported 2026-11-09.