Runyankore - Rukiga Bible 1964
Yobu 28
Yobu okugamba aha bwengye obw'amazima, ku nikwo kutiina Ruhanga
Buzimazima efeeza egira ekiina eki etimbwamu,
N'ezaabu ei bashemeza egira omwanya gwayo;
Ekyoma kiihwa omu itaka,
N'omuringa guyagibwa omu butare.
Abantu tibeeta ha mwirima,
Bagwogamu, bahika aha muheru gwagwo,
Nibasherura obutare omu mwirima gw'ekibunda kya rufu.
Batimba ebiina hare n'ahu abantu batwire;
Beebwa abagyenzi, barereetera hare n'abantu,
Beecunda nibakora oku n'oku. 1
Eitaka ryo rirugwamu eby'okurya,
Kwonka okuzimu oshusha oti eitaka ryayo niritabuurwa omuriro.
Amabaare gaayo garugwamu safiro,
Kandi egira ezaabu y'omucuucu.
Ogwo muhanda tigumanywa mpungu,
N'eriisho ry'eishamba tirikagureebaga; 2
Enyamaishwa z'amaryo tizikaguribatamuga,
N'entare enshaarizi tekagurabamuga. 3
Omuntu akununkirira eibaare ry'enkangabuye,
Arimiirira emizi y'enshozi, azijuumika;
Acwa emikura omu nkiri,
Kandi eriisho rye rireeba ekintu kyona eky'obuguzi bwingi;
Aigarira amaizi ngu garekye kujwa,
Kandi ekituura kisherekirwe, akiihayo kireebwa. 4
Mbwenu obwengye bukaazoorwa hi?
Nari shi okwetegyereza kukaaboneka hi?
Tihariho orikumanya omuhanda ogurikuza ei buri,
Tibuzoorwa mu nsi y'abahuriire.
Okuzimu neegira eti: Tiburi muriinye,
N'enyanja eti: Tiinye mbwine. 5
Tiburikubaasa kutungwa ahabw'ezaabu,
Kandi tihariho feeza erikupimwa ekahitsya obuguzi bwabwo. 6
Tiburikubaasa kwinganisibwa na zaabu ya Ofiri,
Nari shohamu ey'obuguzi bwingi, n'obu yaakuba safiro.
Ezaabu n'ebirahuri tibirikwingana nabwo,
Kandi tiburikubaasa kuhingisibwa bintu by'ezaabu eshemeziibwe; 7
Korali na kristalo nabyo tibikaagambwaho,
Obuguzi bwabwo nibukira obw'eruuru. 8
Topazi ya Esiopia terikubaasa kugyeranisibwa nabwo,
Kandi tiburikubaasa kwinganisibwa n'ezaabu enungi.
Mbwenu shi obwengye buruga hi?
N'omwanya gw'okumanya gurahi?
Ahakuba busherekirwe abahuriire boona,
Kandi bushwekirwe ngu enyonyi z'omu mwanya zitabureeba.
Okuzimu na Rufu nibigira biti:
Tuhuriire nibabugambaho. 9
Ruhanga niwe arikumanya omuhanda ogurikuza ei buri,
Kandi naamanya ahu butaaha; 10
Ahabw'okuba anaga amaisho aha muheru gw'ensi,
Kandi ebiri ahansi y'eiguru byona abireeba.
Obu yaaha omuyaga ekiragiro,
Akarengyesa amaizi endengo, 11
Obu yaateeraho enjura ekiragiro,
Akateeraho emirabyo emihanda,
Obwo nibwo yaabureeba, akabumanyisa,
Akabuhamya, akabucondooza, 12
Akagira omuntu ati: Reeba, okutiina MUKAMA nibwo bwengye,
N'okutaana n'ekibi nikwo kwetegyereza.
Source notes (12)
- Cross-reference Zab 104:14.
- Cross-reference Yob 41:34.
- Cross-reference Bir 8:15; 32:13; Zab 114:8.
- Cross-reference Mub 7:24.
- Cross-reference Enf 3:14; 8:10, 11, 19; 16:16.
- Cross-reference 1 Bag 9:28; Isa 13:12.
- Cross-reference Enf 3:15; Ezk 27:16.
- Cross-reference Kur 28:17; Ezk 28:13.
- Cross-reference Enf 8:22-31.
- Cross-reference Enf 15:3; Zek 4:10.
- Cross-reference Yob 38:25.
- Cross-reference Zab 111:10; Enf 1:7; 3:7; 14:16; 16:6; Mub 12:13.
Runyankore - Rukiga Bible 1964. Public domain. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · Public domain · SourceEdition imported 2026-11-09.