Runyankore - Rukiga Bible 1964
Yobu 11
Okugarukamu kwa Zofari
Bwanyima Zofari Omunaamasi yaagarukamu ati: 1
Ebigambo bingi bityo tibishemereire kugarukwamu?
Nari shi, engambi y'amaingi eshemereire kwihwaho orubanja?
Abantu bashemereire kuhunamisibwa emyehimbiso yaawe?
Kandi ku oraateere enaku, tihariho orikukukwatsa enshoni? 2
Ahabw'okuba noogira oti: Ebi ndikwegyesa bihikire,
Ndi mwere omu maisho ga Ruhanga.
Nkaabasibwa ki, Ruhanga agamba,
Ayashamya akanwa ke, akwomesereza. 3
Akugambira emibonano y'obwengye,
Ahabw'okuba n'obw'emiringo mingi.
Mbwenu omanye ku Ruhanga atarikufubira,
Nk'oku ebibi byawe biri. 4
Noogira ngu okaabaasa kucondooza Ruhanga, omumanya?
Okaabaasa kumanya Ow'obushoboorozi bwona, omumarayo? 5
Kiri ahaiguru okukira eiguru; nooyenda kukigira ota?
Kiri okuzimu okukira owa Nyamuteza; nookimanya ota?
Oburaingwa bwakyo nibukira ensi,
N'obukiika bwakyo nibukira enyanja. 6
Ku yaakuraba omu nsi, yaata abantu omu kihome,
Yaabeeta omu rubanja, n'oha owaakumuzibira?
Ahabw'okuba naamanya abantu entakimazire;
Ku araareebe okutahikiirira, noogira ngu naakwehuzya?
Enturegye ku yaakuzaara omuntu,
Entakimazire akaagira obwengye. 7
Ku oraashemeze omutima gwawe,
Omutegye emikono.
Ku haraabe hariho okutahikiirira omu ngaro zaawe, okute hare;
Otaikiriza obubi kuguma omu ka yaawe. 8
Buzimazima obwo nibwo oriimutsya amaisho gaawe otaine kamogo,
Oryahama, kandi toritiina. 9
Oryayebwa obujune bwawe,
Obwijukye nk'amaizi agaheza kurabaho. 10
Amagara gaawe garyayaka okukira eihangwe;
N'obu gariba garimu omwirima, garyaba nk'akasheeshe. 11
Oryagira obwesigye, ahabw'okugira amatsiko;
Oryarindwa, ohuumure buhooro;
Oryabyama, tiharigira owaakutiinisa;
Eego, baingi baryakuhakwaho. 12
Kwonka amaisho g'ababi garyabwerabwera,
Baryabura obuhungiro,
Kandi amatsiko gaabo garyaba okuhwamu omwitsyo.
Source notes (12)
- Cross-reference Enf 10:19; Mub 5:3.
- Cross-reference Yob 10:7.
- Cross-reference Ezr 9:13.
- Cross-reference Yob 5:9; Zab 145:3; Mub 3:11; 8:17; Rom 11:33.
- Cross-reference Yob 22:12; Zab 139:8.
- Cross-reference Yob 9:12; 12:14.
- Cross-reference 1 Sam 7:3; Zab 78:8; 88:9; 143:6.
- Cross-reference Yob 22:26; 31:7; 2 Pet 3:14; 1 Yoh 3:21.
- Cross-reference Isa 65:16.
- Cross-reference Zab 37:6; Isa 58:8, 10.
- Cross-reference Zab 4:8; Enf 3:24.
- Cross-reference Yob 17:5; Yer 15:9.
Runyankore - Rukiga Bible 1964. Public domain. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · Public domain · SourceEdition imported 2026-11-09.