Runyankore - Rukiga Bible 1964
Hosea 3
Ebya rukundo ei Ruhanga akunda Abaisraeli
Bwanyima MUKAMA yangira ati: Irooko, ogarukye okunde ogwo mukazi orikukundwa nkunzi ye endiijo, kandi enshambani, nk'oku MUKAMA akunda Abaisraeli, n'obu baraabe bakuratira baaruhanga abandi, bakakunda ebiihuro by'emizaabibu eyomire. 2 Nikwo kumucunguza shekeli z'efeeza ikumi na itaano, na homeri ya sayiri. 3 Naamugira nti: Noija kumara ebiro bingi ori owangye; torigaruka kuraaya, n'obu kwakuba okuba omukazi w'ondiijo mushaija; kandi naanye nikwo ndiba ahariiwe. 4 Ahabw'okuba Abaisraeli baryamara ebiro bingi bataine mugabe nari omutegyeki, bataine bitambo n'obu yaakuba enyomyo, kandi bataine efodi, n'obu zaakuba terafiimu. 5 Bwanyima Abaisraeli baryagaruka, basherure MUKAMA Ruhanga waabo n'omugabe waabo Daudi, baije ahari MUKAMA n'obwoba, n'aha burungi bwe omu biro by'aha muheru.
Source notes (5)
- Cross-reference Kyesh 2:5.
- Cross-reference Lev 27:16.
- Cross-reference Bir 21:13.
- Cross-reference Bar 17:5; Hos 10:1, 2.
- Cross-reference Yer 23:5; 50:4; Ezk 34:24; Hos 1:11; Mik 7:17.
Runyankore - Rukiga Bible 1964. Public domain. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · Public domain · SourceEdition imported 2026-11-09.