Runyankore - Rukiga Bible 1964

Habakuuki 3:19

Verse 19 is marked below, with the whole chapter around it. Read from the start

Okushaba kwa Habakuuki

Okushaba kwa Habakuuki omu iraka rya Shigionoosi. 1

Ai MUKAMA, mpuriire ebyawe, naatiina,

Ai MUKAMA, garura busya omurimo gwawe omuri egi myaka,

Ahagati y'egi myaka ogumanyise;

Omu kugira ekiniga oijukye okugira embabazi. 2

Ruhanga akaruga Temani,

Orikwera yaaruga aha rushozi Parani,

Ekitiinisa kye kyashweka eiguru,

Kandi ensi yaijura okuhimbisibwa kwe. Sela 3

Okumurinkana kwe kwaba nk'omushana,

Amaranzi gaaturuka omu ngaro ze nigarabya;

Kandi okwo niyo yaasherekire amaani ge. 4

Orufu rwamwebembera,

Emyambi y'omuriro yaamukuratira, emuri omu ntegye. 5

Yaayemerera, yaagyera ensi;

Yaanaga amaisho, yaatengyetsa amahanga;

Obwo enshozi ezituuraho zaataataanisibwa,

N'ebibungo by'ebiro byona byabandama,

Emitwarize ye yaaba nk'eya ira. 6

Naareeba amahema ga Kushani nigabonabona;

Emikingo y'ensi ya Midiani yaatetema. 7

Ai MUKAMA, beitu shi okaba oiniire emigyera ekiniga,

Nari shi egyo migyera niyo waagwereirwe kubi,

Nari shi okagirira enyanja ekiniga,

Obu waagyendera aha mbaraasi zaawe,

N'omu kigaari kyawe ky'obusinguzi? 8

Okashembuura obuta bwawe,

Waatamika emyambi omu rugye. Sela

Ensi waagicwamu emikura y'emigyera. 9

Enshozi zaakureeba, zaatiina,

Emyegyemure y'amaizi yaahimintika,

Eiraka ry'amaizi g'ahagati y'enyanja ryahurirwa,

Ebingozi byayo byanaga emikono. 10

Eizooba n'okwezi byayemerera omu myanya yaabyo,

Ahabw'okumurinkana kw'emyambi yaawe neerashwa,

N'ahabw'okurabya kw'eicumu ryawe eririkutyankana. 11

Okagyenda nooraba omu nsi oine ekiniga kingi,

Waaribatiirira amahanga ogagwereirwe kubi. 12

Okahurura kujuna abantu baawe,

N'okujuna ou waashukireho amajuta.

Waasingyera omutwe gw'omubi,

Waamujweka busha okuruga aha bibero okuhika omu bitsya. Sela

Waacumita emitwe y'abarwani be emango zaawe,

Abaizire nk'akasooroora kuntuntumura,

Nibeesiima nk'abarikwenda kumaraho abooro bwesherekye. 13

Enyanja waagiribatiiriza embaraasi zaawe,

Okwecunda kw'amaizi g'amaani. 14

Ku naahuriire, naagira orutetema omunda,

Eminwa yangye yaagira ekitengo ahabw'eryo iraka;

Okujunda kwantaaha omu magufa,

Amaguru ganjogajogoka.

Ndyategyereza eizooba ry'enaku, ntuurize,

Ku rihika aha bantu abarihurura kututeera.

N'obu emitiini eraabe etarikurabya,

Emizaabibu etaine bijuma,

Emizeituuni ebuzire amajuta,

Emisiri etarikwera by'okurya,

Obusyo bw'entaama buhweire omu kibuga,

N'obw'ente buhweire omuka, 15

Kwonka ndyashemerererwa MUKAMA,

Nyesiimire omuri Ruhanga ow'okujunwa kwangye. 16

RUHANGA Mukama niwe maani gangye;

Ahindura ebigyere byangye nk'eby'empara,

Kandi angyendesa omu myanya yangye etunguukire.

Aha mukuru w'abeeshongozi byeshongorerwe aha nanga y'emirya.

Source notes (16)

Cross-reference Zab 44:1; 85:6.
Cross-reference Bir 33:2.
Cross-reference Ezk 1:27.
Cross-reference 1 Bus 21:11-15; Zab 18:8.
Cross-reference Kut 49:26; Zab 60:6; Isa 51:9; Mik 1:4.
Cross-reference Bar 3:10; 8:12.
Cross-reference Bir 33:26; Zab 18:10; 114:5; Isa 66:15.
Cross-reference Zab 78:15, 16.
Cross-reference Kur 14:22; 19:18; Zab 93:3.
Cross-reference Yos 10:12, 13; 2 Sam 22:15.
Cross-reference Mik 4:12, 13.
Cross-reference Zab 105:15; 110:6.
Cross-reference Zab 77:19.
Cross-reference Isa 14:3, 4; Yer 4:19.
Cross-reference Yob 13:15; Zab 9:14; Luk 1:47.
Cross-reference Bir 32:13; 2 Sam 2:18; Isa 38:20.

Runyankore - Rukiga Bible 1964. Public domain. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · Public domain · SourceEdition imported 2026-11-09.