Runyankore - Rukiga Bible 1964
Habakuuki 2
Abahikiriire okubaisibwaho okwikiriza
Niinyija kwemerera kureeba,
Nyemerere aha munaara gw'okurindiraho,
Nnagye amaisho, ndeebe eki arangambire,
N'eki ndaagarukyemu ahabw'ebi ndikwetonganira. 2
MUKAMA yangarukamu ati:
Handiika ebi waayorekwa,
Obihandiikye gye aha bishate,
Oraabishome abishome naarahutsya. 3
Ahabw'okuba ebi waayorekwa ebyo biine obunaku bwabyo obwatairweho;
Tibirituuraho kuhikiirizibwa,
Kandi tibiribeiha.
N'obu byakutuuraho, obitegyereze;
Buzimazima biryaija, tibirikyerererwa. 4
Reeba, ow'omutima ogutagororokire aryaremwa;
Kwonka ohikiriire aryaba ohuriire ahabw'okwikiriza kwe.
Okuhanuura aha bi Abakaludaaya barizimuurirwa
Kandi buzimazima viinyo eba bareebyana,
Kandi omunyamaryo otaikara muka.
Omururu gwe ni mwingi nk'Okuzimu;
Ni nka rufu, tahaaga.
Ayeteeraniraho amahanga goona,
Ayeshangururizaho enganda zoona. 6
Abo boona tibarimugaaniiza,
bakamuteerera enaku? Nibagira bati:
Eshi oyerundira ebitari bye, aryakareeba!
Mbwenu aryahitsya hi?
Orikwerundaho emikwato nawe aryakareeba!
Abu orikwihuza tibariimuka kitaraariire,
N'abarikutetemesa bakasisiimuka?
Obwo oryaba omunyago gwabo. 7
Ahabw'okunyaga amahanga maingi,
Amahanga goona agatsigaireho naiwe garyakunyaga,
Nigakutura eshagama y'abantu n'obubisha,
Obu waagiriire ensi n'endembo n'abazitwiremu boona. 8
Aryakareeba, otunga amagoba mabi ahabw'eka ye,
Ngu ayeyarikire ekyashuri kye ahaiguru,
Akabi koona karekye kumuhikaho. 9
Enaama ei waagizire, okamaraho amahanga maingi,
Okahemura eka yaawe;
Waareebya amagara gaawe. 10
Ahabw'okuba eibaare riryaboroogyera omu kisiika,
N'omutambiko gw'omu biti by'enju gurigarukyemu. 11
Orikwombekyesa tauni eshagama,
Akahamisa orurembo okutahikiirira, aryakareeba! 12
Mbwenu, eki tikirikuruga ahari MUKAMA ow'amahe,
Abantu okuhendekyera omuriro gwonka,
N'amahanga okwerusya ahabw'ebitaine mugasho? 13
Ahabw'okuba ensi eryabugwa
Okumanya ekitiinisa kya MUKAMA,
Nk'oku amaizi gabuga hoona omu nyanja. 14
Aryakareeba, orikunywaisa mutaahi we ekikopo ky'ekiniga kye,
Akakimusinzisa, ngu areebe enjuuro ye. 15
Oryaiguta enshoni omu mwanya gw'ekitiinisa.
Naiwe nywa, otaruze!
Ekikopo ekiri omu ngaro ya MUKAMA eya buryo
Nikiija kurugaho kikuhikyeho,
Enshoni zize aha ktiinisa kyawe. 16
Obubisha obwagiriirwe Lebanooni buryakumaraho,
Okucwekyereza enyamaishwa kwawe kukwitse obwoba,
Ahabw'eshagama y'abantu ei waaseesire,
N'obubisha obu waagiriire ensi,
N'endembo n'abazitwiremu boona. 17
Ekishushani ekirikuramibwa nikigasha ki,
Omukozi waakyo yaaheza kukikora,
Ekishushani ky'ekyoma ekirikwegyesa ebishuba?
Ahakuba omukozi ku aba naakora ebishushani bitarikugamba,
Aba naayesiga ebi ayekoreire n'emikono ye. 18
Aryakareeba, orikugira ekiti ati: Sisiimuka!
N'eibaare eritarikugamba ati: Imuka!
Nimugira ngu ebyo nibibasa kwegyesa?
Reeba, bishwekirwe ezaabu n'efeeza,
Kandi tibirimu mwitsyo gwona. 19
Kwonka MUKAMA ari omuri hekalu ye erikwera;
Ensi yoona ececekye omu maisho ge.
Source notes (19)
- Cross-reference Zab 85:8; Isa 21:8.
- Cross-reference Isa 30:8.
- Cross-reference Isa 8:17; Dan 10:14; Heb 10:37; 2 Pet 3:9.
- Cross-reference Rom 1:17; Gal 3:11; Heb 10:38.
- Cross-reference Enf 27:20; Isa 5:14; Dan 2:37, 38.
- Cross-reference Isa 5:8; Mik 2:4; Zek 1:12.
- Cross-reference Isa 33:1.
- Cross-reference Isa 14:13; Yer 22:13; 49:16.
- Cross-reference Kub 16:38.
- Cross-reference Luk 19:40.
- Cross-reference Mik 3:10.
- Cross-reference Yer 51:58.
- Cross-reference Zab 72:19; Isa 11:9.
- Cross-reference Yer 51:7; Tonz 4:21.
- Cross-reference Yer 25:15; Nah 3:5, 6.
- Cross-reference Yer 22:23.
- Cross-reference Isa 44:10; Yer 10:8; 14; 1 Kor 12:2.
- Cross-reference 1 Bag 18:26, 27; Zab 135:17.
- Cross-reference Zab 11:4; Zek 2:13.
Runyankore - Rukiga Bible 1964. Public domain. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · Public domain · SourceEdition imported 2026-11-09.