Skip to content
BibleKenya
RUNYANKO 2 Samueli 7 Verse

Runyankore - Rukiga Bible 1964

2 Samueli 7

Ruhanga okuraganisa Daudi ku arihamya obugabe bwe

1

Atyo omugabe yaaguma omu ka ye, kandi MUKAMA yaamuha okuhuumura abazigu be boona embaju zoona. 2 Bwanyima omugabe yaagira nabi Nasani ati: Reeba hati, ndi omu nju y'emyereezi, kwonka eshanduukye ya Ruhanga eri omu ihema. 3 Nasani yaagira omugabe ati: Irooko okore ekikuri aha mutima kyona, ahakuba MUKAMA ari hamwe naiwe.

Ekyo kiro ekigambo kya MUKAMA kyaizira Nasani nikigira kiti: Irooko ogambire omwiru wangye Daudi oti: MUKAMA naagira ati: Ebyo oryanyombekyera enju y'okutaahamu? 4 Noomanya ku ntakatuuragu mu nju, okwiha obu naiha Abaisraeli Misiri n'okuhitsya hati, kureka nkaba ngyendagyenda nintaaha omu ihema. 5 Nimugira ngu omu myanya yoona ei naabaire ngyendamu n'Abaisraeli boona, nkaba ndagizire omwe aha baramuzi ba Israeli, abu naaragiire kuriisa abantu bangye Israeli nti: Ahabw'enki mutakanyombekyeraga nju y'emyereezi? 6 N'ahabw'ekyo ogire omwiru wangye Daudi oti: MUKAMA ow'amahe naagira ati: Nkakwiha omu iriisizo nooriisa entaama, ngu nkuhindure omutegyeki w'abantu bangye Israeli, 7 kandi nkaba nguma naiwe ahu waabaire oza hoona, ncwekyerereza abazigu baawe omu maisho gaawe; kandi ndyakuha eiziina rikuru nk'ery'abantu rugambwa ab'omu nsi. 8 Ndyatooranira abantu bangye Israeli omwanya, mbabyaremu, babone kugira obutaka bw'okutuuramu, obu batariihwamu bundi. Kandi abantu babi tibarigaruka kubaita kubi nk'obunyakare, 9 obu naabaire ndagiira abaramuzi kutegyeka abantu bangye Israeli; kandi ndyakuha okuhuumura abazigu baawe boona. N'ekindi, MUKAMA naakugambira ku arikuhindura oruganda. 10

Kandi obunaku bwawe ku burihika, waagwejegyera, waashanga baashwenkuru, ndyayemeka omwana waawe ou oryezaarira, akuhungurire, kandi mpamye obugabe bwe. 11 Ogwo niwe aryombekyera eiziina ryangye enju; kandi ndyahamya ekitebe ky'obugabe bwe ebiro byona. 12 Ndyaba ishe, nawe abe omwana wangye; ku aricumura, ndyamuhanisa enkoni z'abantu, babe nibo baamuteera; 13 kwonka embabazi zangye tizirimurugaho, nk'oku naaziihire ahari Saulo, ou naacwire nkaiha omu maisho gaawe. Enju yaawe n'obugabe bwawe biryahamibwa ebiro byona, n'ekitebe ky'obugabe bwawe kiryaba eky'ebiro byona. Ebyo bigambo byona n'okwo kworekwa kwona, Nasani yaabiteekyerereza Daudi nk'oku byabaire biri.

Okushaba kwa Daudi

Bwanyima Daudi omugabe yaataaha omu Ihema, yaashutama omu maisho ga MUKAMA, yaagira ati: Niinye oha, ai MUKAMA Ruhanga? Kandi n'enju yangye nikyo ki, iwe okundinda okampitsya aha? Kwonka ekyo ahariiwe ni kikye, MUKAMA Ruhanga; mbwenu waayongyeraho n'okugamba aha by'enju y'omwiru waawe, oku eriba omu biro bingi munonga ebiriija, nk'oku kiba omu biragiro by'abantu, ai MUKAMA Ruhanga. 14 Mbwenu shi, ekindi Daudi akugambire ki? Ahabw'okuba noomanya omwiru waawe, MUKAMA Ruhanga. Ahabw'endagaano yaawe okakora ebikuru ebyo byona, kubimanyisa omwiru waawe, nk'oku omutima gwawe gwateekateekire. 15 Nikyo obeera mukuru, MUKAMA Ruhanga; ahakuba tihariho orikushushana naiwe, kandi tihariho Ruhanga ondiijo kureka Iwe, nk'ebi twahuriire byona oku biri. 16 Kandi ni ihanga ki omu nsi eriri nk'abantu baawe Israeli, abu Ruhanga yaagiire kwecungurira kuba abantu be, ngu ayetungire eiziina, ahabw'okubakorera ebikuru kandi ebirikutiinisa, naabinga omu maisho gaabo eihanga na baaruhanga baaryo? 17 Bwanyima okeehamiza abantu baawe Israeli, ngu babe eihnaga eri waayetooraniire ebiro byona; naiwe, MUKAMA, okaba Ruhanga waabo. Mbwenu hati, MUKAMA Ruhanga, ekigambo eki waagamba aha mwiru waawe n'aha nju ye, okihamye ebiro byona, kandi okore nk'oku waagamba; n'eiziina ryawe riryahimbisibwa ebiro byona, bagire bati: MUKAMA ow'amahe niwe Ruhanga wa Israeli; kandi enju y'omwiru waawe Daudi eryahamibwa omu maisho gaawe. Ahakuba Iwe, MUKAMA ow'amahe, Ruhanga wa Israeli, oshuuruuriire omwiru waawe, noogira oti: Ndyakwombekyera enju; nikyo omwiru waawe agiriire obumanzi bw'okukushaba ebigambo ebi. 18 Mbwenu hati, ai MUKAMA Ruhanga, niiwe Ruhanga, n'ebigambo byawe n'eby'amazima, kandi oraganiise omwiru waawe, ekigambo ekyo ekirungi. 19 N'ahabw'ekyo hati ikiriza kuha enju y'omwiru waawe omugisha, egumeho ebiro byona omu maisho gaawe, ahakuba niiwe waakigamba, MUKAMA Ruhanga; kandi omugisha gwawe gugume guheebwe enju y'omwiru waawe ebiro byona.

Source notes (19)
  1. Cross-reference 1 Bus 17:1-27; 2 Sam 12:1.
  2. Cross-reference Kur 26:1; 2 Sam 5:11.
  3. Cross-reference 1 Bag 8:17; 1 Bus 22:7; 28:2; Byak 7:46.
  4. Cross-reference Kur 40:34; 1 Bag 8:16.
  5. Cross-reference Lev 26:11, 12; Bir 23:14.
  6. Cross-reference 1 Sam 16:11; Zab 78:70.
  7. Cross-reference 2 Sam 5:10; 8:6, 14.
  8. Cross-reference 2 Bag 21:8; Zab 80:8; Amo 9:15.
  9. Cross-reference Bar 2:11-16; 1 Bag 11:38.
  10. Cross-reference 1 Bag 2:1, 10; 8:20; Zab 132:11; Byak 13:36.
  11. Cross-reference 1 Bag 5:5; 1 Bus 22:10; Zab 89:4, 29, 36, 37.
  12. Cross-reference Zab 89:26, 27; Heb 1:5.
  13. Cross-reference 1 Sam 15:23, 28; 1 Bag 11:13, 34.
  14. Cross-reference Zab 139:1-4.
  15. Cross-reference Kur 15:11; 1 Bus 16:25; Zab 86:10; 96:4; Yer 10:6; 1 Kor 8:5, 6.
  16. Cross-reference Kur 12:51; Bir 4:7, 34.
  17. Cross-reference Bir 26:18.
  18. Cross-reference Yoh 17:17.
  19. Cross-reference Zab 89:28, 29.

Runyankore - Rukiga Bible 1964. Public domain. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · Public domain · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.