Skip to content
BibleKenya

TRADUCTION BILBE EN KINYANGA

Yohana 8:32

Verse 32 is marked below, with the whole chapter around it. Read from the start

Mumina musingirani

Kuruma nampo, Yesu wenda murou rw'eMiseituni. Muricha r'ebutu, mu muranga-ranga, Yesu wakuruka tu mu Numba ya Ongo. Ebea bati beya hari we, nae warekia wamarika, wabucha ihana bo. Nampo, ebahani b'eMyomba hima n'eBafarisayo, bamurishie mumina uma ingu wakutingirwa mu busingirani. Basimanya emumina ngo kubusondori n'ebea bati. Bere Yesu mbu: «eMuhani, emumina uno wamatingirwa mu busingirani.» Itukana n'eMyomba, Musa watwerenga mbu emumina buri uno, wakomenwa ishurwa na makoi. Mbeni na ǒngo weba buni?

Ibo bakweba mbo mwimuereka, kongo bashee kinwa ch'imusongere. Ina Yesu windama n'ibucha iandika muroto n'emurimba. Barekia bamamushishirisha ringi, Yesu wasimana n'iere bo mbu: «Ingu eutangakoranga nsambi munkati ninu, wabesi waroso imurekera ikoi.»

Kuruma nampo, windama tu n'iandika muroto. Bakianga bamarukira ibinwa mbyo, ebati benda kira mwea murwae, ibuchie mu bakungu n'ieya na mu misike. Yesu wasia mpo iwe kisine n'emumina ngo ingu wabesenga wasimana habusondori nae. Yesu wakianga wamasimana, washisha emumina ngo mbu: «Ekoyo, mbeni ebea mbi ebakukusongere bari kuni? Mbeni kusira nangu wamasia hano muri kuhukumu?»

Emumina ngo wamusako mbu: «eNyere Kuritu, kusira na uma.»

Nampo, Yesu wamwire mbu: «Ani hotu ntakuhukumu. Enda rabe, ina itukire runotu, ang'ironja tu nsambi.»]

Yesu nge chaka ch'echuo

Yesu were ebea tu mbu: «Ani nge ckaka ch'echuo. Kinsi ngu wanimisa, watakoche ienda tu mu mwirimya, ina usebese n'echaka ch'ekaramo.»

eBafarisayo bamwire mbu: «Ebukariho bwabe ntíbwiira bushwa mbu ǒngo webange byo ǒngo kisine.» Yesu wasako bo mbu: «Nakiro mbu n'ebange bushwa nani kisine, ebukariho bwani bwiira. Bushwa mbu nosi kwakusaa ani nanku kwendange ani. Ina ntíbanu mwosi kusaange ani nanku ekwendange ani. Banu muhukumungi itukana n'emyanikiri yinu, ina ani ntangahukumu mwea uti-uti. Nakiro mbu namahukumungi, ehukumu yani yamabesengi y'iira, bushwa mbu ntangahukumu ani kisine, ina Tita ngu wakunituma uri hima nani. Na mu myomba yinu hotu raandikwa mbu, ebukariho bw'ebea babi bwiira. Ani kariho kani, na Tita ngu ewakunituma nae kariho kani hotu.»

Nampo, eBafarisayo bamushisha mbu: «Mbeni Iso uri ke kuni?»

Yesu wasako mbu: «Ntíbanu munosi, na ntíbanu mosi hotu Tita. Kuba mumanisibange, mumasibange Tita hotu.»

Yesu wakweba ebinwa biti mbyo entambi nji yabesenga ihanange we mu Numba ya Ongo, kwihi nampi habesenga esanduku y'ebisabo. Kusira ngu wamuminanga bushwa mbu entambi yae yabesenga ntinensi yarumira.

Mutumakocha ienda ekwendange ani

Yesu were ebea tu mbu: «Ani nenda rani, nabanu mukunisonda, ina mukukwa musansambi sinu. Na mutukochi ieya mpi hendange ani.»

Ebakwakare b'eBayuta bashishana mbu: «Iwe weba mbu tutamukocha ieya inku kwendange we. Mbeni ngerieba mbu wasenda kishura?»

Yesu wasako bo mbu: «Banu ba hano hansi, ina ani natuka kokwiyo. Banu bisa echuo kino, ina ani ntíw'echuo kino. Ngerakusingwa nabuire mbu mukukwa mu sansambi sinu. Kuba ntímusimira mbu: ‹Ani nge Niriho1›, muriira, mukukwa mu sansambi sinu.»

Nampo bamushisha mbu: «Mbeni ǒngo ng'inye?»

Yesu wasako bo mbu: «Ani nge ingu wabwerenga ani itukire kare-kare. Niri na binwa bingi bieba bushwa ninu n'ibuhukumu. Ina ewakunituma wiira, nani niturengi ebea ebinwa mbi ebyakuniere we.»

Ntíbasibanga mbu webange bushwa n'ishe. Nampo, Yesu were bo mbu: «Mukiayo mutarisha eMwana w'eMwea ko kwiyo, mukuteererayo mbu ‹Ani nge niriho.› Nampo mukuteerera hotu mbu ntángaronja kinwa kiti-kiti mwisasa rani, ina nebange ho ebyakuhanwa ani na Tita. Ingu ewakunituma uri hima nani. Ntwakunisierere, bushwa mbu kirotu nironjange binwa mbi ebyashima we.» Warekia webange ebinwa mbyo, bea bingi bamusimira.

Eriborwa r'eriira

Yesu were eBayuta mbi ebakumusimira mbu: «Mumasimira emahano ani, muriira mukubese banafunsi bani. Nampo mukusiba eriira, n'eriira risebubora.» Bamusako mbu: «Bate bana ba Iburahimu, na tutangabesenga tuhungu twamwea uti-uti. Mbeni bushwanki ǒngo webange mbu tus'oborwa?»

Yesu wasako bo mbu: «Muriira nibwirengi mbu, nkisi ngu uronjange nsambi, iwe kahungu k'ensambi. Ekahungu katanswanga mu bana b'ekisasa ematu ati, ina emwana iwe uma mu banakisasa ematu ati. Kuba ani musike wa Ongo nabuobora ituka musansambi sinu, mutubesi tu tuhungu ina mukubese nti mumooborwa muriira. Nosi mbu banu bana ba Iburahimu, ina banu musondange inishura bushwa mbu mutina isimira emahano ani. Ani nebange mbi byakusunga ani kwa Tita, ina banu muronjange mbi ebyakurukira banu kuri batitanku binu.» Bamusako mbu: «Tita witu nge Iburahimu.»

Yesu were bo mbu: «Kuba mumabesengi bana ba Iburahimu, mumuronjange emikorere inji yaronjanga Iburahimu. Ina banu musondange inishura na namakinda ibuere eriira erarukiranga ani kwa Ongo. Iburahimu ntwaronjanga mbo. Banu mukorange ebironjanga tita winu.»

Bamusako mbu: «Bate ntíbana ba buhanga. Turi na Tita uma, nae nge Ongo.»

Yesu were bo mbu: «Kuba Ongo wamabesengi Tita winu, mumunishimange, bushwa mbu namatuka kwa Ongo, na ngie nirihano. Ntínakweya mu bukwakare bwani, ina iwe ngwakunituma. Mbeni bushwanki mutungateerera ebinwa bibwirengi ani? Bushwa mbu ntímuhuna irukira ebinwa byani. Mushumbu nge tita winu, na banu musondange ibereresha imbu bushimangǎ tita winu. Iwe muyeri wa bea kirotu na watebanga iira bushwa mbu kumunda nae kusira iira. Entambi yebange we manko, ebinwa byae bitukananga n'emwenjo wae, bushwa mbu iwe mushukishuki na tita w'ebushukishuki. Ina ani nibwirengi eriira, nangerasingwa mutunganisimira. Mbeni inye munkati ninu wamushea mbu nakuronja nsambi? Kuba n'ebange iira, bushwanki mutunga nisimira? Kinsi mwea wa Ongo urukirange ebinwa bya Ongo. Mutungarukira bushwa mbu banu ntí bea ba Ongo.»

Yesu mukwakare irenga Iburahimu

eBayuta bamusako mbu: «Akese turi ho n'eriira rerieba mbu ǒngo Musamaria na ǒngo uri na kifwasi.»

Yesu wasako mbu: «Ani nsira kifwasi, ina nasubaha Tita wani, nabanu muninena. Ani ntangasonda itatwa, ina kuri ngu unisondengi ro, nae nguri n'ebukwakare bwerihukumu. Muriira nibwirengi mbu: kuba emwea waranga ebinwa byani, watakwiyo.» Nampo eBayuta bamwire mbu: «Twasiba ke mbu ǒngo uri na kifwasi! Iburahimu wakwire, n'ebatahwa hotu bakwire, na ǒngo webange mbu emwea wamitingire mu binwa byabe, watakwiyo karankuso. Mbeni ǒngo mukwakare irenga titanku witu Iburahimu? Iwe wakwire, n'ebatahwa nabo hotu bakwire. Mbeni ǒngo wisungange mbu ǒngo ng'inye?»

Yesu wasako mbu: «Kuba nisondange kwitata ani kisine, erikwitata ndo risira mufa. Tita ng'unitatange, ingu witatengi banu mbu nge Ongo winu! Ntíbanu mumosi, ina ani nimosi. Kuba namwebange mbu ntínimosi, namubesengi mushukishuki buri banu. Ina nimosi na nironjange ebweba ekinwa chae. Tita winu Iburahimu washimanga nguru erisunga erieya rani, warekia wamasunga ro, wáshima nguru.»

Nampo eBayuta bamwire mbu: «Tinensi urumisha myaka makumi asanu, mbeni ukusunga Iburahimu?»

Yesu wasako bo mbu: «Nibwirengi muriira mbu: ‹Kubusondori n'eributwa ra Iburahimu, nabesenga niriho.›»

Bushwa nancho, basombo makoi mwimurekera o. Ina Yesu wibisa n'ituka mu Numba ya Ongo.

Source notes (1)
  1. Footnote Ani nge Niriho: Hano Yesu webange binwa mbi byasusa erina ndi rininkanga Ongo mukitabu ch'erituka 3.14, soma hotu Yohana 8.28, 58; 13.19.

TRADUCTION BILBE EN KINYANGA. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.