Skip to content
BibleKenya

TRADUCTION BILBE EN KINYANGA

Yohana 7

Banachabo Yesu ntíbamusimira

Kuruma nambyo, Yesu weta mu chuo cha ku Ngariraya. Ntíwashimanga ieta mu chuo cha ku Yundea bushwa eBayuta básondanga imushura. Kibimbi kima ch'eBayuta inchi chabikirwa mbu kibimbi ch'eHema charekia ngie kirikwihi, banachabo Yesu bamwire mbu: «Tuka hano, enda mu chuo cha ku Yundea kongo ebanafunsi babe nabo basunga emikorere nji ironjange ǒngo. Kusira mwea ngu uronjange kinwa mukwibisa kuba usondange isibwa n'ebea bati. Bushwa mbu ǒngo uronjange mikorere buri ino, ishee kuri ebea.» Banachabo mbo bebanga mbo, bushwa mbu nabo hotu babesenga ntíbamusimira. Nampo, Yesu were bo mbu: «Entambi yani ntinensi yarumira, ina banu, mumenda entambi nji yashima banu. Ebea b'echuo batakochi ibubaa, ina banibaa ani bushwa mbu n'ebange mbu emikorere yabo yema. Banu bisine, mwendi ku Yerusaremu mu kibimbi. Ani ntangenda nensi, bushwa mbu entambi yani ntinensi yarumira.» Warekia wamere bo ebinwa mbyo, wasia mu chuo cha ku Ngariraya.

Yesu wenda mu kibimbi ch'eHema

Banachabo Yesu bakianga bamenda mu kibimbi ncho, Yesu nae wenda ko, ina wendanga ko mukwibisa, n'ebea ntitíbosi. eBayuta babesenga bámusondange mu kibimbi ncho, n'ishisha mbu: «Mbeni kuni nge kuri we?» Mu kikembe ncho, kwabesenga buhaka bwingi bushwa nae. Bima beba mbu: «Iwe mwea wakonda», na bampe mbu: «Anga, ntímbo, iwe uhusange ebea.» Ina ntíkwabesenga mwea ngu weba bushwa nae bushwa mbu basubahanga ebakwakare b'eBayuta.

Yesu uhanange ebea mu Numba ya Ongo

Nampo mu kibimbi, Yesu wákime mu Numba ya Ongo n'ibucha ihana. eBayuta bashishara, beba mbu: «Mbeni emwea uno wamasiba ebinwa biti bino buni na ntwasoma?» Yesu wasako bo mbu: «Emahano ahanange ani ntí ani, ina angu ewakunituma. Kuba mwea usondange ikora ebyasasa Ongo, wǎteerera mbu emahano ani atuka kwa Ongo, abe kuba n'ebange na bukwakare bwani kisine. Emwea ngu webange mu bukwakare bwae kisine, wisondengi busime bwae. Ina ingu usondange ebusime bwa ngu ewakumutuma, iwe weba iira, na usira bubi buti-buti. Mbeni Musa ntwabuninkanga Myomba? Nakiro mbo, kusira uma mu banu wasimira eMyomba. Mbeni banu musondange inishura bushwanki ke?» Ebea mbo basako mbu: «Ǒngo uri na kifwasi. Mbeni inye ng'usondange ikushura?» Yesu wasako bo mbu: «Nakukora kengeko kima ho hano erotu rw'eSabato, na banu bati mukushisharanga. Mukai, Musa wabwirenga mbu mumoneshe ebana binu b'ebabume. Ntíieba mbu entungo njo yatuka kuri Musa wisine, ina yatuka kuri batitanku binu baroso. Ina ngie banu mumoneshange ebana binu n'erotu rw'eSabato. Kuba banu mumoneshange mwea murotu rw'eSabato kongo mutunoi eMyomba ya Musa, mbeni bushwanki munisubuke entambi yaramya ani mwea murotu rw'eSabato? Mureki ihukumu emwea bushwa nambi ebisungange banu ho, ina muhukumu muriira.»

Yesu nge Kirisitu

Ngebumbo, bea bima ba ku Yerusaremu, beba mbu: «Mbeni uno ntí nge mwea ngu usondange ishura bo? Mukai, wameba ebiti munkati n'ebea, na ntíbakumwere kinwa kiti-kiti! Rasungwa buri ebakwakare bamateerera eriira mbu iwe nge Kirisitu. Ina bate tosi kwakusaire emwea uno. Muriya ra Kirisitu, kusira mwea usesibayo mpi hasesaire we.» Yesu wakianga uhanange mu Numba ya Ongo, weba mu murenge mukiri mbu: «Muriira, banu mwebange mbu banu munosi, na banu mosi ekwakusaire ani. Ntínakweya mu bukwakare bwani kisine, ina ngu warenituma iwe nge mine eriira. Ntíbanu mumosi. Ina ani nimosi bushwa mbu nakutuka kuri we, nae ngwakunituma.» Nampo basonda imumina, ina kusira mwea ngu werekanga imutinge, bushwa mbu entambi yae yabesenga ntinensi yarumira. Bea bingi mu kikembe nchi chabesenga mpo bámusimira, bêba mbu: «Kirisitu wasekiyayo weya, mbeni washeayo biteerere bingi irenga emwea uno?»

Basura batumwa itinge Yesu

Bafarisayo barukira ebinwa mbi byabesenga byebange ebea bushwa na Yesu. Nampo, ebakwakare b'ebakuhani n'eBafarisayo, batuma ebasura babo kamumina. Yesu weba mbu: «Nikiri hima ninu mu ntambi sikeke. Kuruma nampo, nakuruka kuri ngu ewakunituma. Mǔnisonda, ina mutunisungi, bushwa mbu mutukochi ieya mpi ehasebese ani.» eBayuta bashishana ibo mubo mbu: «Mbeni emwea uno usenda kuni nku kutamukocha imusunga bate? Mbeni wasenda kuri eBayuta mbi barekindi isanswa munkati n'eBakiriki, n'ihana eBakiriki?» Iwe weba mbu bate twasemusonda, ina tutamusungi, bushwa mbu tutamakocha ieya nku kusenda we. Mbeni ngerieba buni?

Yesu weba bushwa n'eMutima wa Shurukara

Erotu rwahende rw'ekibimbi ndu rwabesenga erotu rukiri, Yesu wasimana n'ieba mu murenge mukiri mbu: «Emwea ngu uri na mbusha, weye kuri ani womu. Itukana nambu bweba eMitiro ya Shurukara mbu: ‹Ngesi sandusi s'ekaramo sisehita ituka kumunda n'emwea ngu wanisimira.›» Wakweba mbo bushwa n'eMutima wa Shurukara, ingu useyayo kuri mbi ebasimirayo Yesu. Mu matu ngo, eMutima wa Shurukara wabesenga nensi ntwatumwa, bushwa mbu Yesu wabesenga nensi ntwatatwa.

Ebea bibanya bushwa na Yesu

Bea bima mu kikembe ncho, bakianga bamarukira ebinwa mbyo, beba mbu: «Muriira, emwea uno nge emutahwa ngu wahwanga ieya!»

Na bampe beba mbu: «Uno nge Kirisitu.»

Ina bampe beba mbu: «Mbeni Kirisitu wamusaa ku Ngariraya? Mbeni eMitiro Yashurukara ntíyeba mbu, Kirisitu wasebutwa muruanda rw'emwami Ndauti, murubungu rwa ku Beterehemu inku kwabutwanga Ndauti?» Nampo, ebea bibanya bushwa na Yesu. Bima basonda imutinge, ina ntíkwabesenga ngu wamutingenga.

Ebakwakare b'eBayuta ntíbasimira Yesu

Kuruma nampo, ebasura mbo bakuruka kuri ebakwakare b'ebakuhani n'eBafarisayo. Nabo bashisha ebasura mbu: «Mbeni ntímurisha Yesu bushwanki?» Ebasura basako mbu: «Tutanga rukiranga umpe mwea weba imbu bwebange we!» Nampo, eBafarisayo bashisha bo mbu: «Mbeni nabanu hotu mumakidi ihuswa? Mbeni inye munkati n'ebakwakare bitu, abe munkati n'eBafarisayo ingu wamakindi imusimira? Ina bano mbi entíbosi eMyomba ya Musa, bamakindi iherwa.»

Nikondemu, uma mu bakwakare w'eBafarisayo ingu wenderenga Yesu otu ruma mutu, were bo mbu: «Itukana n'eMyomba tutakochi ihukumu emwea kuba ntinensi watondesa n'isiba echakuronja we.» Bamusako mbu: «Mbeni na ǒngo mwisa ku Ngariraya? Enda kasoma ishu eMitiro Yashurkara, na ǔteerera mbu, kusira mutahwa ngu wamutuka ku Ngariraya.» [ Kuruma nampo, kira mwea wakuruka kukwae.

TRADUCTION BILBE EN KINYANGA. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.