TRADUCTION BILBE EN KINYANGA
Yohana 6
Yesu warɨsha bea erefu isanu
(Mat 14.13-21; Mar 6.30-44; Ruk 9.10-17)
Kuruma nambyo, Yesu wasoka muo mwiri w'enyansa Ngariraya, eyabikirwa tu mbu Tiberia. Kikembe kikiri cha bea bamumisa, bushwa mbu ebea mbo bakusunga biteerere byabishisharo mbi ebyakushea we muriramya ebakoni. Yesu wataya mu rou, n'irika nko hima n'ebanafunsi bae. N'ekibimbi ch'ePasaka ch'eBayuta ntikiri keya. Yesu wakianga wararama ekwiyo, wasunga kikembe kikiri cha bea bamumisange. Nampo washisha Firipo mbu: «Mbeni kuni nge kwamuchure bate bio byeririsha ebea bano?» Yesu webanga mbo mwiereka Firipo, bushwa mbu iwe wisine wabesenga osi ebiseronja we.
Firipo wamusako mbu: «Nakiro mbu twamuchura bio bya bikoroto mana abi a behe, bitamukocha bo nakiro ntwaninka bo kake-kake.»
Umpe mwanafunsi wae uma ewabikirwa mbu Nderea, musikyabo Simoni Petero, wamwire mbu: «Hano hari mwana uma ingu uri na mikati isano yatunganyiwa mu shayiri1 na bikwa bibí. Ina ebio bino bitamukocha bea bingi buri bano.»
Yesu weba mbu: «Mweri ebea mbu barike kwasi.» Nampo habesenga nti hari bisu bingi. Barika kwansi. Munkati nabo mwabesenga babume buna erefu isano. Kuruma nampo, Yesu wáringa emikati njo, watata Ongo n'ibanya yo kuri ebea mbi babesenga mpo. Waninka tu bo ebikwa. Ebea bati barisa n'isukuta. Bakianga bamasukuta, Yesu were ebanafunsi bae mbu: «Musonje ebyamasia, kongo kutarimini kikai kiti-kiti.» Ngebumbo, basonja byo, barisia mitundu ikumi na ibi mu byunda-byunda by'emikati mbi ebyakusia mu mikati isanu eyatunganyiwanga mu shayiri eyakurisa bo.
Ebea barekia bamasunga ekiteerere nchi chamashea Yesu, beba mbu: «Muriira emwea uno nge mutahwa ngu ewahwanga ieya mu chuo!» Yesu wakianga wamateerera mbu basondange ieya kamutinge n'imusimika mu bwami ra kamimo, watuka mpo, n'ienda tu mu rou iwe kisine.
Yesu wendange hiyo n'enyansa
(Mat 14.22-33; Mar 6.45-52)
Bwarekia bwamaoroba, ebanafunsi ba Yesu bahita n'ienda mu nyansa. Bakime mu mutumbu n'isoka enyansa n'ienda ku Kaperenaumu. Mu ntambi njo ebutu bwabesenga bwamasira, ina Yesu wabesenga ntitínensi wakuruka kakumana bo. Iyuhu rasuma rabesenga rifufange n'irisha mibimbi mu nyansa. Barekia bamenda buna birometere bisanu abe mutuba, basunga Yesu ntwendange hiyo n'enyansa, na ntingie uri kwihi n'emutumbu. Nampo, batingirwa na boba. Ina Yesu were bo mbu: «Ani uno, kiro mukwa boba!» Ibo bahuna imutarisha mu mtumbu. Hiha-hiha emutumbu weya hansoncho mpi habesenga hendange bo.
Ebea basondange Yesu
Muricha r'ebutu, ebea mbi bakusia muo mwiri w'enyansa, báteerera mbu kwakubesenga ho mutumbu uma mpo. Báteerera hotu mbu Yesu ntwakukime mu mutumbu hima n'ebanafunsi bae, ina ebanafunsi bae bakwenda ibo bisine. Ngebumbo hotu, eimpe mitumbu eyakutuka murubungu rwa ku Tiberia, yeya kwihi nampi hakianga barɨsa emikati na nti Nyere Kuritu wamakinda itata Ongo. Barekia bamasunga Yesu ntíuri mpo hima n'ebanafunsi bae, bikimire mu mitumbu njo, n'ienda ku Kaperenaumu kasonda Yesu.
Yesu nge mukati w'ekaramo
Ebea mbo bakumana Yesu muo mwiri w'enyansa n'imushisha mbu: «eMuhani, mbeni ukweya hano inintambi?» Yesu wasako bo mbu: «Muriira nibwirengi mbu: mutunganisonda bushwa mbu mukusunga biteerere, ina bushwa mbu mukurisa mikati n'isukuta. Anga mukore ebio mbi ebyamubiha, ina mukori bio mbi bitamubiha n'irisha ekaramo k'ematu ati. eMwana w'eMwea wasebuninka ebio mbyo, bushwa mbu Ongo Tita wameba bushwa nae.»
Nampo bamushisha mbu: «Mbeni tukie buni kongo twakora emurimo wa Ongo?»
Yesu wasako bo mbu: «Uno nge murimo wa Ongo: musimire ngu ewakutuma we.»
Bamushisha mbu: «Mbeni ukutushea kini kiteerere echasunga bate kongo twakusimira? Kinki nge chakora ǒngo? Batitanku bitu, barisanga Mana2, imbu bwaandikwa eMitiro Yashurukara eyeba mbu: ‹Wakʉrɨsha bo mu mukati ewakutuka mu mbingu.›»
Yesu wasako bo mbu: «Muriira nibwirengi mbu: Musa ntwakubuninka emukati wa mu mbingu, ina Tita ng'ubuninkange emukati w'eriira wa mu mbingu. Bushwa mbu emukati ngu uninkanange Ongo, io nge watuka mu mbingu n'irisha ekaramo mu chuo.»
Nampo, bamwire mbu: «eNyere Kuritu, tuninke emukati ngo kirotu.»
Yesu were bo mbu: «Ani nge mukati w'ekaramo. Ewanirisia, watakwiyo tu rwaka, nangu ewanisimira, watakwiyo tu mbusha. Ina itukana nambu bwakubwire ani mbu: mumanisunga, ina nakiro mbo nenki ntímusimira. Ebea bati mbi banininka Tita, beyange kuri ani. Nani ntamutina na uma mubo. Bushwa mbu namatuka mu mbingu kongo nakia erisasa rangu ewanituma. Ina ntíisasa rani. N'erisasa rangu ewarenituma, ngerieba mbu anga nariminya kiro n'uma mu'mbi banininka we, ina nimufure mu rotu rwahende. Muriira, erisasa ra Tita ngerieba mbu kira mwea ngu ewasunga eMwana n'imusimira washei ekaramo k'ematu ati, nani nǎmufura erotu rwa hende.»
Nampo eBayuta babucha ishunana bushwa mbu Yesu wameba mbu iwe nge mukati ngu ewakutuka mu mbingu. Nabo beba mbu: «Mbeni uno ntí musike wa Yosefu? Mbeni ntítosi ishe na nina. Buni ke nge bwamukia weba mbu wakutuka mu mbingu?»
Yesu wasako bo mbu: «Kiro mushunana banu mu banu. Kusira mwea ngu wamukocha ieya kuri ani, kuba ntwakubikirwa na Tita ngu wakunituma, nani nǎmufura murotu rwahende. Raandikwa buno mu Mitiro y'ebatahwa mbu: ‹Ebea bati basehanwa na Ongo.›3 Kinsi mwea ngu urukirange Tita n'imisa emahano ae, weyange kuri ani. Ntíieba mbu kuri mwea uti-uti ngu wakusunga Tita kuba ntí'ngu ewakutuka kuri Ongo. Iwe ngwakusunga Tita. Muriira nibwirengi mbu: kinsi ngu wanisimira, wamashee ekaramo k'ematu ati. Ani nge mukati w'ekaramo. Batitanku binu barisanga bio bitukange mu mbingu mu bweru, ina bakwa. Ina hano hari mukati ewakutuka mu mbingu. Ewara mu o, watakwiyo. Ani nge mukati w'ekaramo ngu wakutuka mu mbingu. Emwea wamarisa emukati uno, watakwiyo. N'emukati ngu ewaseninkana ani nge mubi wani, ingu usesiburwa, kongo echuo chashée ekaramo.»
Nampo eBayuta babucha buhaka bwasuma ibo mu bo, beba mbu: «Buni nge bwamukia emwea uno wakocha ituninka emubi wae mbu turise o?»
Bushwa nancho, Yesu were bo mbu: «Muriira nibwirengi mbu: kuba ntímurisa emubi w'eMwana w'eMwea, n'iomo enchama yae, mutubesi n'ekaramo k'ematu ati. Kinsi mwea ngu warisa emubi wani n'iomo echama yani, ntwamashee ekaramo k'ematu ati, nani nasemufura murotu rwa hende. Musibanga mbu emubi wani bio b'iira, n'enchama yani nge biti byeriomo byeriira. Kinsi mwea ngu warisa emubi wani n'iomo enchama yani, uo uri kumunda nani, nani niri kumunda nae. Tita ngu ewakunituma, nge shemine karamo, nani nakushéé karamo katuka kuri we. Ngebumbo hotu, kinsi mwea ngu wanirisa, wamashee ekaramo ituka kuri ani. Uno nge mukati ngu wakutuka mu mbingu. Io nt'uriburi mukati ngu warisanga batitanku binu mu bweru na bakwa. Kinsi ngu warisa mu mukati uno, wasebese n'ekaramo k'ematu ati.»
Yesu webanga ebinwa mbyo, mu ntambi nji yabesenga ihanange we mu sinangoki ya ku Kaperenaumu.
Bingi munkati n'ebanafunsi bae, barekia barukira ebinwa mbyo, beba mbu: «Ebinwa bino byasuma. Mbeni inye ngwamukocha irisia byo?» Yesu wateerera mbu ebanafunsi bae básunga bubi bushwa n'ekinwa ncho. Washisha bo mbu: «Mbeni ekinwa kino chabusubucha? Mbeni risebese buni kuba musunga eMwana w'eMwea, utayange inku kwabesenga we raroso? eMutima wa Ongo ngurishangǎ ekaramo. Emubi utamukocha kikai kiti-kiti. Ebinwa mbi ebyakubwire ani nge Mutima wa Ongo n'ekaramo. Ina kuri bampe munkati ninu ntíbasimira.» Yesu wakweba mbo, bushwa mbu wasibanga itukire kare-kare entíbamusimira nangu ewǎmusibura. Yesu weba tu mbu: «Kincho nge chakusingwa nabwire mbu kusira mwea wamweya kuri ani kuba ntwakwenjiwa na Tita.»
Bushwa n'ebinwa mbyo, bingi munkati n'ebanafunsi bae bamusia, nabo ntíbendanga tu hima nae. Nampo Yesu washisha ebanafunsi bae ikumi na babi mbu: «Mbeni nabanu musondange ienda hotu?»
Simoni Petero wamusako mbu: «eNyere Kuritu, mbeni twendi tu kwanye? Ǒngo webange binwa biri n'ekaramo k'ematu ati. Bate twasimira, niteerera mbu ǒngo nge Mushuururwa wa Ongo.»
Yesu wasako bo mbu: «Ani kisine nge nakuburondora banu ikumi na babi, ina nakiro mbo, uma mu banu iwe mushumbu.» Wameba bo bushwa na Yuta musike wa Simoni Isikarioti, bushwa mbu iwe ngwasemusibura, nakiro mbu iwe uma mu banafunsi bae ikumi na babi.
Source notes (3)
- Footnote Shayiri: Iyo mbuto yasusanyiwa na bʉshɨ
- Footnote Mana Mana yabesenga buri mukati washamuka ingu wabesenga ukirengi ituka mu mbingu, muririsha eBaisiraeri mu bweru. ik
- Footnote Soma Isa 54.13.
TRADUCTION BILBE EN KINYANGA. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.