TRADUCTION BILBE EN KINYANGA
Yohana 5
Yesu waramya mwea wa rumbosa
Kuruma n'ebinwa mbyo, Yesu wenda ku Yerusaremu mu kibimbi ch'eBayuta. Na ku Yerusaremu nko, kwihi n'erubi rw'erubungu ndu rwabikirwa mbu «Rubi rwa Mburi», habesenga kishima kiri na birindo bya ndubi isano. Ekishima ncho chabikirwa mu Kieburania mbu Betesaita. Bakoni bingi babesenga biorongi mu sa ndubi s'ebirindo mbyo. Habesenga bihumihumi, birema n'ebea b'erumbonsa. [ Babesenga barindirengi emecha atenjiwe, bushwa mbu maraika wa Nyere Kuritu wabesenga uhitange meta mingi mu kishima ncho n'itenja emecha. N'emukoni waroso ngu wabesenga ukimengi mu mecha na nti amatenjiwa, wabesenga uramange emakoni ati ngi ari nae.] Nampo, habesenga mwea uma ntwamasamba myaka makumi ashatu na munane. Yesu wamusunga nti wamioro kwansi mu kipoi, wasiba mbu wamasamba matu mingi. Wamushisha mbu: «Mbeni ushima irama?»
Emukoni ngo wamusako mbu: «eNyere Kuritu, nsira mwea ngu wamunikimisha mu kishima etambi nji itenjiwange emecha. Nikianga namasonda ikime, umpe mwea ntwama nisondore.»
Yesu wamwire mbu: «Simana, tinge ekipoi chabe, enda.»
Hiha-hiha emwea ngo warama, watinge ekipoi chae n'ibucha ienda.
Erotu ndo rwabesenga otu rwa Sabato. Bushwa nancho, eBayuta bere emwea ngu wakurama mbu: «Runotu otu rwa Sabato, n'emyomba yitu yakuhangisa iriya ekipoi chabe.»
Wasako bo mbu: «Ewakuniramya ngwakuniire mbu: ‹Tinge ekipoi chabe na enda.›»
Nampo, bamushisha mbu: «Inye mwea ngwakukwire mbu: ‹Tinge ekipoi chabe na enda!›» Ina ntwasibanga ewakumuramya, bushwa mbu Yesu wabesenga wamatuka ehari ekikembe ch'ebea.
Kuruma nampo, Yesu wakumana emwea ngo mu Numba ya Ongo, wamwire mbu: «Kae, umarama. Ang'ironja tu nsambi, kongo kikai chema nguru kitakwiyeri.»
Hiha-hiha, emwea ngo wenda kuri ebakwakare b'eBayuta, were bo mbu Yesu ngwakumuramya. Bushwa nancho, ebakwakare b'eBayuta babucha isongere Yesu, bushwa mbu waramyanga mwea erotu rw'eSabato. Ina Yesu wasako bo mbu: «Tita wani ukorange ematu ati, nani nikorange hotu bumbo.»
Bushwa n'ekinwa ncho, ebakwakare b'eBayuta babucha isonda buni bwamushura bo Yesu. Babesenga baronjange mbo ntí bushwa ho mbu Yesu wabesenga unowange emyomba y'eSabato, ina echasingwa nguru, nti bushwa mbu wabesenga webange mbu Ongo ng'ishe. Murieba rae mbo, rashea mbu wirengekanyange na Ongo.
Ebukwakare bwa Musike wa Ongo
Nampo, Yesu were tu eBayuta mbu: «Nibwirengi muriira mbu, Musike wa Ongo watakochi ironja kikai kiti-kiti mu bwenge bwae wisime. Uronjanga ho mbi ebikoranga Ishe. N'ebiti mbi bironjange Ishe, Musike wae nae uronjanga hotu byo. Bushwa mbu Tita washima Musike wae, umusheange ebiti mbi bikorange we. Wasemushea bikai bikiri irenga bino, kongo mushishara nguru. Imbu bukianga Tita wafura ebakwi, n'ikuruchie bo ekaramo, ngebumbo hotu Musike we uninkange ekaramo kuri mbi básasa we. Ngebumbo, Tita watahukumu mwea uti-uti, ina wamaninka Musike wae ebukwakare buti bwerihukumu ebea. Munse njo, ebea bati basesubaha Musike wa Ongo imbu bwasubaha bo Tita. Emwea uti-uti ngu ntwasubaha Musike wa Ongo, emwea ngo ntwasubaha Tita ngu wakumutuma.
«Muriira nibwirengi mbu: emwea ngu urukirange ekinwa chani n'isimira ngu ewakunituma, twashee ekaramo k'ematu ati. Emwea ngo watahukumiwi, ina wamahonoka eroku n'ishee ekaramo. Muriira nibwirengi mbu kweyange matu, n'ematu ngo ameya, ingi asekia ebakwi barukira emurenge wa Musike wa Ongo. Nambi baserukira o, baseshee karamo k'ematu ati. Imbu buri Tita na bukwakare wininkana ekaramo, nge bumbo bwamaninka we Musike wae bukwakare bwininkana ekaramo. Wamaninka hotu Musike wae bukwakare w'erihukumu ebea, bushwa mbu iwe Mwana w'eMwea. Angi mushishara bushwa n'ebinwa bino! Bushwa mbu kwaseya matu ngi ebakwi bati baserukira emurenge w'eMwana w'eMwea, nabo basefuka n'ituka mu masinda abo. Ebea mbi babesenga bakorange byakonda, baseninkwa karamo k'ematu ati, ina mbi babesenga bakorange bibí, básehukumiwa.
Ebakariho b'ebukwakare bwa Yesu
«Kusira kikai kiti-kiti nchi chamukocha ironja ani mu bukwakare bwani. Nihukumungi ebea itukana nambu bukiange Tita waniire. N'ehukumu yani y'iira, bushwa mbu ntangaronja mbu bwashima ani kisine, ina nironjange imbu bwashima Tita wani ingu wakunituma. Na kuba nabese kariho kani kisine, ebukariho bwani mbo butakochi isimirwa mbu bwiira. Ina kuri ekariho kani, na nosi mbu ebukariho bwae bushwa nani bwiira. Mukutuma ntumwa kuri Yohana Murubiki, nae wakweba eriira bushwa nani. Ani ntínarae mu bukariho bwa mwea, ina nibwirengi ebiti bino, kongo mushukara. Yohana Murubiki wabesenga buri eritara ndi risakange n'ishea echaka mu mwirimya, nabanu mukumoere echaka ncho mu ntambi nkeke. Ina ebukariho bwani bukiri irenga imbu bwa Yohana. Nge imbu bwanininkanga Tita mbu niberereshe bo. Emurimo wani ngo washea mbu, Tita ngwakunituma. Na Tita ngu wakunituma, iwe ngwamabese kariho kani kuri banu. Banu mutunga rukiranga nensi emurenge wae, abe isunga ebwasusa we. N'ekinwa chae kitangǎrika mu mitima inu, bushwa mbu banu ntímunisimira ani ngu nakutumwa nae kuri banu. Banu mwisumyange mwinsonsomora eMitiro Yashurukara, bushwa mbu banu muhakange mbu mumushee muyo ekaramo k'ematu ati. Emitiro yashurukara njo nge kariho kani! Ina banu ntímushima ieya kuri ani kongo mushee ekaramo.
«Ani ntínarae mu busime butukange kuri ebea. Ina nosi imbu banu ntímushima Ongo. Ani nameya mu bukwakare bwa Tita, ina mutina inikoke. Ina kuba umpe mwea weya mu bukwakare bwae wisine, iwe mukumukoke. Banu mushima itatwa na babinu, ina mutungasonda ebusime mbu butukange kuri Ongo wisine. Buni ke nge bwamukocha banu inisimira? Kiro muhaka mbu nasebusongere kuri Tita. Musa nge wǎbusongereyo bushwa mbu nge winyihire banu. Kuba muriira mumasimirange ebinwa bya Musa, nani hotu mumanisimirange, bushwa mbu Musa waandikanga emyasi yani. Ina kuba ke ntímusimira emitiro ya Musa, buni ke nge bwamusimira banu ebinwa byani?»
TRADUCTION BILBE EN KINYANGA. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.