Skip to content
BibleKenya

TRADUCTION BILBE EN KINYANGA

Yohana 4

Yesu n'emumina Musamaria

Yesu wasiba mbu eBafarisayo ngie bari n'emwasi mbu iwe uri na banafunsi bingi irenga Yohana na urubikange bo. Muriira, Yesu wisine ntwarubikanga mwea, ina ebanafunsi bae nge babesenga barubikange. Nampo, Yesu watuka ku Yundea n'ikuruka ku Ngariraya. Muriya rae nko, rakomenwanga weteri ku Samaria.

Weya kwihi n'erubungu ruma rwa ku Samaria erwabikirwa mbu Sikari, indu rwabesenga kwihi n'erishwa ndi rakianga Yakobo waninka musike wae Yosefu. Nampo habesenga kishima kitukure mecha na nti cha Yakobo. Yesu warika mu kirindo ch'ekishima ncho, bushwa mbu wabesenga wamaruha n'eruendo. Rabesenga ngie buna ntambi mutuba samumwishi.

Nampo, mumina uma Musamaria weya katuko mecha. Yesu wamwire mbu: «Nininke mecha iomo.»

Entambi njo, ebanafunsi bae babesenga bamenda murubungu kachura bio.

Ngebumbo, emumina Musamaria ngo were Yesu mbu: «Mbeni buni nge bwamukia ǒngo Muyuta unkonga mecha nani Musamaria?» eBayuta babesenga batakoanenga n'eBasamaria.

Yesu wamusako mbu: «Umasibange ekikai nchi chamukuninkange Ongo, n'isiba kuba inye ngukukongange emecha eriomo, umamukongange, nae wamukuninkange emecha ekaramo.»

Emumina ngo wamwire mbu: «Emukwakare, ǒngo usira na kikai kitukure mo mecha, n'ekishima kino chareha nguru. Mbeni kuni nge kwaseshee ǒngo emecha ekaramo? Titanku witu Yakobo ngwatuninkanga ekishima kino, nae wabesenga omonga mu mecha acho hima n'ebana bae, n'ebituana byae. Mbeni ǒngo wisungange mbu ǒngo nge mukwakare irenga Yakobo?»

Nampo Yesu wamusako mbu: «Kinsi mwea ngu womo mu mecha ano, ukiri hotu wakwa mbusha. Ina kinsi ngu was'omo emecha ngi asemuninka ani, watakwiyo tu mbusha. Emecha ngi asemuninka ani, asebese kumunda nae buri nchoko nji ihichange emecha ekaramo k'ematu ati.»

Emumina ngo wamwire mbu: «Emukwakare, nininke ke emecha ngo, kongo ntakwiyo tu mbusha, n'ieya katuko tu mecha mu kishima kino.»

Yesu wamwire mbu: «Enda kabikira moke wabe, mwiye nae hano.»

Emumina ngo wamusako mbu: «Nsira wabume.»

Nampo Yesu wamwire mbu: «Umeba iira mbu ǒngo usira wabume. Bushwa mbu akosi ǒngo uri na babume basano, na ngu urinabe mu matu ano ntíwabe. Umeba iira.»

Ngerikia emumina ngo wamwire mbu: «Emukwakare, nasunga ke mbu ǒngo mutahwa. Batitanku bitu babesenga basimanikenga Ongo murou runo, ina banu eBayuta mwebange mbu ku Yerusaremu nge kusenda kwendange bate kasimanike ko Ongo.»

Yesu wamusako mbu: «Ekoyo, nisimire. Kuseya matu ngi atasimaniki banu Tita murou runo abe ku Yerusaremu. Banu eBasamaria musimanikenga Ongo ngu entíwosi banu, ina bate Bayuta tusimanikenga Ongo ewosi bate, bushwa mbu Ongo waseshukayayo ebea ietere eBayuta. Ina kuseya matu, nao ameya rero. Ebea mbi basimanikengi Tita Ongo muriira, basenda bamusimanikengi mu Mutima na muriira. Bushwa mbu Tita Ongo washima ebea mbi ebamusimanikengi munse njo. Ongo nge Mutima. N'ebea mbi bamusimanikengi bahwa imusimanike mu Mutima na muriira.»

Emumina ngo wamwire mbu: «Nosi mbu Masiya ingu wabikirwa mbu Kirisitu, weyange. N'entambi yaseya we wasetuture ebinwa biti.» Yesu wamusako mbu: «Ani ngu nebange nabe, nge iwe.»

Entambi iya-iya, ebanafunsi ba Yesu bakuruka, nabo bashishara nguru murisunga Yesu webeshanange n'emumina. Ina kusira na uma munkati nabo ngu washishanga emumina ngo kuba usondange nki, abe ishisha Yesu kuba bushwanki webeshanange n'emumina ngo.

Nampo, emumina ngo wasia erirea rae r'emecha, wakuruka murubungu, were ebea mbu: «Mwiye kasunga emwea ngu wamaniture ebiti mbi byamakoranga ani! Mbeni ntí nge Kirisitu?»

Ebea bakianga bamarukira mbo, batuka murubungu ndo, benda kuri Yesu.

Ebea mbo, bakianga bakiri mu munse, ebanafunsi ba Yesu bamukonga mbu: «eRabi1, risa kasa bio!»

Ina wasako bo mbu: «Ani niri na bio mbi entíbyosi banu.»

Nampo, ebanafunsi babucha ishishana mbu: «Mbeni kuri mwea ngu wakumurishie bio?»

Yesu were bo mbu: «Ebio byani, ironja ebyashima ewakunituma n'ibereresha emurimo wae. Banu nge mwebanga mbu: ‹Kwasia myeri inye ho muriya mu matu emukene.› Ina ani nibwirengi mbu, musimanye emeso, mukai emashwa imbu buri o. Emirime yamako, na yakomenwa ke ikao yo. Eukaongi wamakinda ishee ebihembo byae, nae usonjange emukene bushwa n'ekaramo k'ematu ati, kongo emweki n'emukaori, bamoa mongo. Bushwa mbu ekinwa kino iira: ‹Mwea uma wekange na umpe ukaongi.› Ani nakubutuma murishwa kakao imbi entíbyakunube banu. Bampe bea nge bakunubenga ro, na banu mumarire mu murimo wabo.»

Basamaria bingi ba murubungu ndo básimira Yesu bushwa n'ebinwa by'emumina ngo wakianga webange mbu: «Wakuniture ebiti mbi byaronjanga ani.» eBasamaria bakianga bameya hari Yesu, bamukonga mbu warike hima nabo. Nae warika hima nabo matu abi. Bea bingi nguru basimira Yesu bushwa n'ebinwa mbi byabesenga by'ebange we. Bere emumina ngo mbu: «Twasimira ke, ntíbushwa n'ebinwa mbi byakututure ǒngo ho, ina bushwa mbu twamirukire bate bisine, na tosi muriira mbu uno nge Rukombora w'echuo.»

Yesu waramya musike wa mukwakare uma

Kwakianga kwameta matu abi, Yesu watuka nko, wenda ku Ngariraya. Yesu wisine wabesenga wameba mbu emutahwa watasimirwanga mu chuo chabo. Ina wakianga wameya ku Ngariraya, bisa kuro bamukoke, bushwa mbu nabo babeseyo ku Yerusaremu mu kibimbi ch'ePasaka, bakusunga ebinwa biti mbi byakuronja we nko.

Yesu wakuruka tu ku Ngariraya murubungu rwa ku Kana, impi hakianga wabundura emecha ibese ndifai. Nanko kwabesenga mukwakare uma wa mu bwami, musike wae wabesenga mukoni murubungu rwa ku Kaperenaumu. Wakianga wamarukira mbu Yesu wameya ku Ngariraya murituka ku Yundea, emukwakare ngo wendere Yesu, wámukonga mbu wendi ku Kaperenaumu karamya musike wae, ingu uri mu nsanganareke. Yesu wamwire mbu: «Banu mutukochi isimira kuba ntímusunga biteerere na twengeko.» Emukwakare wa mu bwami ngo wamusako mbu: «eNyere Kuritu, nikuhemange, iya mumwani emwanani nti tinensi wakwa.»

Yesu wamwire mbu: «Kuruka ku kwabe, musike wabe wamarama.»

Emwea ngo wasimira ekinwa nchi chameba Yesu, nampo wenda. Wakianga uri mumunse, murikuruka kukwae, ebakori bae bakumanana nae n'imuture emwasi mbu emwana wabe wamarama.

Nampo washisha bo mbu: «Mbeni ini ntambi nge yakubucha emwana kwirukira ishu?» Nabo bamusako mbu: «Emwana wakurama ekaburura mu mwiyoro, mu ntambi sirinda sa mumwishi.»

Ishe w'emwana ngo wateerera mbu emwana wae wakurama itukire entambi nji yakukianga Yesu weba mbu: «Musike wabe wamarama.» Nampo, emukwakare ngo hima n'enumba yae iti, basimira Yesu.

Kino nge chabesenga kiteerere ch'emeta abi nchi chakianga Yesu washea. Rabesenga mu matu ngi akianga Yesu wakuruka ku Ngariraya murituka ku Yundea.

Source notes (1)
  1. Footnote Soma 1.38.

TRADUCTION BILBE EN KINYANGA. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.