Skip to content
BibleKenya

TRADUCTION BILBE EN KINYANGA

Yohana 9

Yesu waramya kihumihumi

Yesu wakianga wetange mu munse, wasunga mwea uma kihumihumi itukire eributwa rae. Ebanafunsi bae bamushisha mbu: «Emuhani, mbeni emwea uno wabutwanga kihumihumi bushwanki? Mbeni maripishi esansambi sae abe s'ebabuti bae?»

Yesu wasako mbu: «Emwea uno ntwabutwanga kihumihumi bushwa n'esansambi sae abe s'ebabuti bae. Ina wabutwanga kihumihumi kongo ebukwakare bwa Ongo bwasungwa kuri ebea mu buingo bwae. Rakomenwa ironja emurimo wa'ngu ewakunituma entambi kukiri kwacha, bushwa mbu ebutu buri kasiro, imbu butamukia tu emwea wakocha ikora. Ematungi akiri ani mu chuo kino, ani nge chaka ch'echuo.»

Yesu wakianga wamakinda ieba mbo, watura inte ekwansi, wasoo to na keto, watira mu meso ekihumihumi ncho n'imwire mbu: «Enda kashua emeso mu kishima cha Siroamu.» Siroamu, ngerieba mbu: Ewakutumwa. Nampo, ekihumihumi ncho ch'enda kashua emeso, chakuruka nti ngie kikaengi.

Ebarikangǎ kumushi nae n'ebea mbi babesenga bamusunganga tukongakongange, beba mbu: «Mbeni ntí emwea uno nge ingu urikanga ekwansi na nt'ukongakongange?»

Bima beba mbu: «Iwe ngo.» N'ebampe beba mbu: «Anga, ntí iwe, wamususa ho.»

Ina iwe kisine were bo: «Ani uno.»

Nampo, bamushisha mbu: «Mbeni emeso abe akurama buni?»

Wasako mbu: «Emwea ngu wabikirwa mbu Yesu wakusoo keto kikeke n'itira cho mu meso ani, n'inire mbu nendi kashua emeso mu kishima cha Siroamu. Nani nenda, n'eshua, nampo nabucha ikae.» Bamushisha tu mbu: «Emwea ngo uri kuni?» Wasako bo mbu: «Ntinosi.»

eBafarisayo barorotange ekihumihumi

Nampo baria emwea ngu wabesenga kihumihumi kuri eBafarisayo. N'erotu ndu rwakianga Yesu wasoo eketo n'iramya emeso emwea ngo, rwabesenga otu rwa Sabato. Bushwa nancho, eBafarisayo nabo bámushisha kuba buni nge bwakurama emeso ae. Nae were bo mbu: «Wakunitira ho keto kikeke mu meso, nani n'enda kashua emeso, na ngie nikaengi.»

Bafarisayo bima beba mbu: «Ewakuronja mbyo, ntwatuka kuri Ongo, bushwa mbu wanoa eMyomba y'erotu rw'eSabato.» Ina ebampe beba mbu: «Mbeni emwea w'ensambi wamukocha ishea kiteerere buri kino?» Bushwa nancho, bibanya mo. eBafarisayo bashisha tu emwea ngu wakurama emeso mbu: «Emwea ingu wa makuramya emeso, mbeni na ǒngo weba buni bushwa nae?»

Nae wasako mbu: «Ani nasunga mbu emwea ngo mutahwa wa Ongo.» Ina ebakwakare b'eBayuta ntíbasimiranga mbu wabesenga kihumihumi na ngie ukaengi. Bushwa nancho, babikira ebabuti bae, n'ishisha bo mbu: «Mbeni uno nge mwana winu muriira, ingu webange banu mbu wabutwanga nti kihumihumi? Kuba iira, buni nge bwakurama we?» Ebabuti bae basako mbu: «Bate tosi mbu uno mwana witu, na wabutwanga kihumihumi. Ina ntítosi echakumusaire muribucha rae ikae, na ntítosi emwea ingu wakumuramya emeso ae. Mumushishe bushwa mbu iwe mwea musima, wamukocha ieba iwe kisine.» Ebabuti bae bebanga mbo bushwa mbu babesenga basubahange ebakwakare b'eBayuta. Ebakwakare mbo babesenga bamasimirana mbu kinsi mwea ewasimira mbu Yesu nge Kirisitu, wasehenswa mu sinangoki yabo. Kincho nge chasingwanga ebabuti bae beba mbu: «Mumushishe iwe kisine bushwa mbu iwe mwea wasengeha.» Nampo, ebakwakare b'eBayuta babikira remeta abi ewabesenga kihumihumi, n'imwire mbu: «Eba eriira mu makako a Ongo! Bate tosi mbu ewakukuramya emeso mwea wa nsambi.»

Nae wasako bo mbu: «Ani ntínosi kuba emwea ngo mwea wa nsambi. Ina nosi ho kikai kima, nabesenga kihumihumi, ina ngie nikaengi.»

Kuruma nampo, bamushisha tu mbu: «Mbeni wakukuronjee nki? Buni nge bwa kukuramya we emeso?» Nae wasako bo mbu: «Namakinda rero ibuture emyasi njo, ina ntímushima irukira. Mbeni banu musondange tu mbu n'ibuturi emyasi njo? Mbeni na banu musondange ibese banafunsi bae?»

Nampo, bamukamba n'imwire mbu: «Ǒngo nge mwanafunsi w'emwea ngo! Bate banafunsi ba Musa. Tosi mbu Ongo webanga na Musa, ina ntítosi ekwasaire emwea ngo!»

Nae wasako bo mbu: «Ani nashishara nguru! Ntíbanu mosi ekwakusaire we, ina iwe ngwa kuniramya emeso. Tosi mbu, Ongo watarukiranga emahemo ebea b'ensambi, ina urukiranga kinsi mwea ngu wamisa n'ironja ebyashima we. Tutangarukiranga n'otu ruma mbu kuri mwea ingu wakuramya meso a mwea ingu wabutwanga nti kihumihumi. Emwea uno wamabesengi ntíwakutuka kuri Ongo, watamukochange ironja kikai.»

Bamusako mbu: «Ǒngo mwea wa nsambi itukire er'ibutwa rabe! Ǒngo uri na buni bukwakare bwituhana bate?» Kuruma nampo, bamuhensa mo.

Ekihumihumi chasimira Yesu

Yesu warukira emwasi mbu emwea ngu wabesenga kihumihumi wamahenswa. Wenda kamusonda. Wakumanana nae, wamushisha mbu: «Mbeni usimira eMwana w'eMwea?» Emwea ngo wamusako mbu: «eNyere Kuritu, niiri kuba eMwana w'eMwea ng'inye kongo namusimira.» Yesu wamwire mbu: «Ǒngo umakinda imusunga, na iwe nge webange nabe.»

Emwea ngo weba mbu: «eNyere Kuritu, nasimira.» Nampo, w'indama mu makako a Yesu mu rimusimanike.

Kuruma nampo, Yesu weba mbu: «Nakweya mu chuo kino kahukumu, kongo ebihumihumi byakae, n'ebakaengi babesi bihumihumi.» Bafarisayo bima imbi babesenga hima nae bakianga bamarukira ebinwa mbyo, bámushisha mbu: «Mbeni ǒngo webange mbu na bate hotu bihumihumi?» Yesu wasako bo mbu: «Mumabesengi bihumihumi, kongo banu musira nsambi. Ina bushwa mbu banu mwebange mbu banu mukaengi ishu, bushwa nacho esansambi sinu banu mukiri ho nato.»

TRADUCTION BILBE EN KINYANGA. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.