Skip to content
BibleKenya

TRADUCTION BILBE EN KINYANGA

Yohana 3:17

Verse 17 is marked below, with the whole chapter around it. Read from the start

Yesu na Nikondemu

Kwarikanga mwea uma erina rae nge Nikondemu, mukwakare w'eBayuta, ingu wabesenga uma mu kikembe ch'eBafarisayo. Otu ruma mu mutu, Nikodemu wendere Yesu n'imwire mbu: «eMuhani, bate tosi mbu Ongo ngwamakutuma katuhana, bushwa mbu kusira mwea ingu wamukocha ishea biteerere bya bishisharo imbu busheange ǒngo byo kuba Ongo nt'urinae.»

Yesu wamusako mbu: «Muriira nikwirengi mbu: kusira mwea ingu wamukime mu Bwami bwa Ongo kuba ntwabutwa r'emeta abi.»1

Nikondemu wamushisha mbu: «Mbeni buni nge bwamukia emwea ngie mukungu wábutwa r'emeta abi? Mbeni, wamukocha tu ikuruka mu bura bwa nina kongo wábutwa tu?»

Yesu wamusako mbu: «Muriira nikwirengi mbu: kuba emwea ntwabutwa mu mecha na mu Mutima, watamukocha ikime mu Bwami bwa Ongo. Echabutwa na mwea nti cha mubi, nanchi chabutwa n'eMutima Washurukara nti ch'eMutima. Anga ushishara imbu bwamakwire ani mbu rakomenwa kuri banu ibutwa r'emeta abi. Eriuhu rifufengǎ ekwashima ro, na ǒngo nt'urukira nambu bufufunge ro, ina utusibi inku kwasaire ro abe kwendange ro. Bumbo nge burikanga byo kuri kira mwea ngu ewabutwa mu Mutima.»

Ngerikia Nikodemu washisha mbu: «Mbeni ebinwa bino byamukochekana buni?»

Yesu wamusako mbu: «Ǒngo muhani mukiri mu chuo cha ku Isiraeri, mbeni ntíǒngo osi ebinwa bino? Muriira nikwirengi mbu: Bate twebange ebyosi bate. Na bate ba kariho byambi ebyasunganga bate, ina banu ntímusimira ebukariho bwitu. Kuba ntímusimira entambi ibwerengi ani ebinwa by'echuo, mbeni buni nge bwamusimira banu kuba nabwire ebinwa bya mu mbingu? Kusira mwea ngu watayanga mu mbingu kuba nti eMwana w'eMwea ingu wahitanga ituka mu mbingu. Imbu bwakianga Musa watarisha ensoka inji yaronjiwanga n'emiringa hiyo n'emuti mu bweru, ngebumbo hotu rakomenwa eMwana w'eMwea watarishiwe, kongo kinsi ngu wamusimira washei ebuingo bw'ematu ati. Bushwa mbu Ongo washimanga nguru echuo, wasibura Musike wae ngomo, kongo kinsi mwea ngu wamusimira watarimini, ina washei ebuingo bw'ematu ati. Ongo ntwatumanga Musike wae mu chuo mbu wahukumu cho, ina kongo washukaya cho. Ewasimira Musike wa Ongo ntwáhukumiwa, ina entíwamusimira wamakinda ihukumiwa, bushwa mbu ntwakusimira eMusike ngomo wa Ongo. Ebirishange ehukumu nge bino: echaka chameya mu chuo, ina ebea bashima emwerimya irenga echaka, bushwa n'emikorere yabo yema. Kinsi mwea ngu ukorange byema utinanga ienda ehari echaka, kongo emikorere yae itasungwi n'ebea. Ina kinsi ngu uri muriira, wendanga hari echaka, kongo emikorere yae yasungwa n'ebea bati mwishea mbu ikorwange imbu bwashima Ongo.»

Yesu na Yohana Murubiki

Kuruma nambyo, Yesu hima n'ebanafunsi bae benda ku Yundea. Warika hima nabo nko na nt'urubikange ebea.2 Yohana nae wabesenga urubikange ebea murubungu rwa ku Ainoni, kwihi n'erubungu rwa ku Sarimu, bushwa mbu kǔnko kwabesenga mecha mingi. Ebea babesenga bámwenderengi, nae nt'urubikange bo. Mu matu ngo, Yohana wabesenga nti tinensi warierwa mu mwiyororo.

Kwasaa buhaka munkati n'ebanafunsi ba Yohana na Muyuta uma bushwa n'entungo sabo s'erikwishuurura. Nampo, bendere Yohana n'imwire mbu: «Rabi3, mbeni usubukia emwea ngu wabesenga nabe muo mwiri wa ku Yorondani, ingu ewakwebanga ǒngo bushwa n'emyasi yae? Eo kae ke iwe ngie urubikange, n'ebea bati bamwederengi!»

Yohana wasako bo mbu: «Kusira ngu wamubese na kikai kuba ntwakuninkwa cho na Ongo. Banu bisine nge bakariho bani mu mbi byakweba ani mbu: ‹Ani ntí nge Kirisitu, ina namatumwa imusondore.› Euri n'emumina ngu wakuheruka nge muheruchi. Ani niri ho buri mira w'emuheruchi, na nasimana kumushi nae na namashima irukira emurenge wae. Muriira, emurimo uno namoere o nguru. Na ngebumbo rakomenwa ebusime bwae butaye, n'ebwani buhite.

«Ewatuka mu mbingu uri hiyo n'ebiti. Nangu uri muchuo ntw'echuo, nae webange binwa by'echuo. Ewatuka mu mbingu uri hiyo n'ebiti. Iwe nge kariho byambi ebyakusunga we n'irukira, ina kusira ngu eusimirange byo. Kinsi wasimira ekariho kae, iwe washea mbu Ongo nge mine riira. Ewatumwa na Ongo, webanga binwa bya Ongo, bushwa mbu Ongo umurisianga eMutima wae euti. Tita Ongo washima Musike wae, nae wamaria ebikai biti mu mine yae. Ingu wasimira Musike wa Ongo, uri n'ekaramo k'ematu ati. Ingu watina isimira Musike wa Ongo watashei ekaramo. Warika, na ntí Ongo wamusubuke.»

Source notes (3)
  1. Footnote Mu kikiriki, erieba mbu «r'emeta abi», rameba tu mbu «ituka ekwiyo»
  2. Footnote Soma Yoh 4.1-2.
  3. Footnote Soma Yoh 1.38.

TRADUCTION BILBE EN KINYANGA. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.