Skip to content
BibleKenya

TRADUCTION BILBE EN KINYANGA

Yohana 2

Yesu wabindura emecha ibese ndifai

Kwakianga kwameta matu abi, kwabesa kibimbi ch'iherucha murubungu rwa ku Kana, ku Ngariraya. Nina wa Yesu wabesenga mpo. Yesu nae wabikirwanga mu kibimbi ch'iherucha ncho hima n'ebanafunsi bae. Endifai yakianga yamasira, nina wa Yesu wamushisha mbu: «Basira tu ndifai.»

Ina Yesu wamusako mbu: «Ekoyo, ǒngo unisondange mo nki! Entambi yani ntinensi yeya.»

Nampo, nina wa Yesu were ebakori mbu: «Mukore ebiti mbi bisebwere we.»

Himpo habesenga marea mutuba ingi atunganyiwa mu makoi. Emarea ngo, eBayuta babesenga barianga mu o mecha erikwishuurura. Na kumunda n'erirea rima nti mwamukime mirangi buna iyana a mecha. Yesu were ebakori mbu: «Murisie emarea ano mecha.»

Nabo bárisia o. Kuruma nampo Yesu wamwire mbu: «Mutuku ke mu mecha ano na murishii emukwakare ingu wasimanire ekibimbi.»

Ebakori barishie ewasimanire ekibimbi. Warora mu mecha ngi amabunduka ibese ndifai. Emukwakare ngo ntwasibanga ekwasaa endifai njo, ina ebakori mbi ebakurishanga emecha ngo, babesenga bosi ekwakusaa o. Nampo wábikira emuheruchi, n'imwire mbu: «Ebea bati baninkangǎ ebea mbi ebakubikirwa ndifai yakonda kasa, na bamakindi itamira, ntibaninkwa ke eyashubuka. Ina ǒngo ukuranga endifai inji yakonda iya n'enompena.»

Ngebumbo bwakianga Yesu waronja ekiteerere ch'ebishisharo raroso murubungu rwa ku Kana mu chuo cha ku Ngariraya. Nampo washea ebusime bwae, n'ebanafunsi bae bamusimira.

Kuruma n'ebinwa mbyo, wenda ku Kaperenaumu hima na nina, na bato bae n'ebanafunsi bae. Nabo barika nko matu makeke.

Yesu wahensa ebanonki mu numba ya Ongo

(Mat 21.12-13; Mar 11.15-17; Ruk 19.45-46)

Erotu rw'ekibimbi ch'ePasaka y'eBayuta rwakianga rurikeya, Yesu wenda ku Yerusaremu. Wakumana bea mu Numba ya Ongo nti bachuyange nkambu, mburi na pisho, n'ebampe mbi babesenga b'enganyange ebehe nti barika mu matara abo. Nampo, wárʉka kashushu ka muri n'ibucha ihensanya ebati ituka mu Numba ya Ongo hima n'esamburi, n'esankambu sabo. Kuruma nampo wabunduranya ematara ambi ebabesenga b'enganyange behe n'itaa byo ekwansi. Were imbi ebabesenga bachuyange esapisho mbu: «Mukutu ebikai mbyo hano. Angi muronja eNumba ya Tita ibese numba ichuishie bikai!»

Ebanafunsi bae basubukia ebinwa mbi byaandikwanga mu Mitiro Yashurukara mbu: «Enchimi yani bushwa n'eNumba yabe, isakange kumunda nani buri kasha.»1

Nampo, eBayuta bamushisha mbu: «Mbeni kini kiteerere nge kiseronja ǒngo mwishea mbu ǒngo uri n'ebukwakare bwironja ebinwa mbyo?»

Yesu wasako bo mbu: «Mukakure eNumba ya Ongo ino, nani n'ǔmba yo mu matu ashatu.»

eBayuta bamwire mbu: «eNumba ya Ongo ino yumbwanga mu myaka makumi anye na mutuba, buni nge busekia umba yo mu matu ashatu?»

Ina eNumba ya Ongo nji yabesenga yebange Yesu, yabesenga nti emubi wae. Yesu wakianga wamafuka, ebanafunsi bae basubukuia mbu wabesenga webange bushwa n'ekinwa ncho, basimira eMitiro Yashurukara n'ebinwa mbi by'ebanga we.

Yesu wosi ebiri kumunda n'emitima

Yesu wakianga uri ku Yerusaremu mu kibimbi ch'ePasaka, bea bingi bamusimira bushwa mbu bakusunga ebiteerere by'ebishisharo byakuronja we. Ina Yesu twasimiranga bo bushwa wabesenga osi bo. Nae ntwaraenga iturirwa mwasi na mwea uti-uti, bushwa mbu iwe wisine wabesenga osi ebiri mu mitima y'ebea.

Source notes (1)
  1. Footnote Soma Sab 69.10.

TRADUCTION BILBE EN KINYANGA. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.