Skip to content
BibleKenya

TRADUCTION BILBE EN KINYANGA

Yohana 1:5

Verse 5 is marked below, with the whole chapter around it. Read from the start

Kinwa wabunduka mwea

Mu ntangiro y'ebikai biti, iwe Kinwa wabesenga nt'uri rero ko. Kinwa wabesenga hima na Ongo, na Kinwa wabesenga nge Ongo. Mu ntangiro, Kinwa wabesenga hima na Ongo. Ebikai biti byabumbwanga ietere Kinwa ngo. Kusira nchi chabumbwanga kuba ntíietere iwe. Kumunda na Kinwa ngo nge mwabesenga ebuingo. N'ebuingo mbo nge bwabesenga echaka kuri ebea. Echaka ncho kisakanga munkati n'emwerimya, n'emwerimya ntwakochanga irimya cho.

Kwasaanga mwea ingu watumwanga na Ongo, erina rae nge Yohana1. Yohana weya buri kariho k'echaka ncho, kongo ebea bati basimira cho ietere we. Ntí Yohana ngwabesenga echaka ncho, ina weyanga kabese kariho kacho. Kinwa ngo nge wabesenga echaka ch'eriira. Muriya racho mu chuo, chashea chaka kuri ebea bati.

Kinwa wabesenga mu chuo, n'echuo chabumbwanga ietere iwe. Ina echuo ntíchamuteereranga. Wakweya mu chuo chabo, ina banarwae ntíbakumukoke. Ina ebati imbi ebamukokenga n'imusimira, waninka bo ebukwakare bw'ibese bana ba Ongo. Ntíbakubutwa ibese bana ba Ongo mu bususe bwa mwea, abe mwisasa ra mubi, abe mwisasa ra mwea, ina Ongo wisine ngwamaronja bo ibese bana bae.

Kinwa wakuronjiwa ibese mwea, wakurika hima nitu ntwarisa nchumo n'eriira. Twakusunga ebusime bwae, ebusime mbo eMusike wae ngomo waninkwanga bo na Tita. Yohana webanga n'ebea shu-shu bushwa nae, wakua mu murenge mukiri mbu: «Uno nge webayo ani nakiyayo n'ebange mbu: ‹Emwea ngu weyange kuruma nani wanirenga, bushwa mbu iwe wabesenga hoko kubusondori n'eributwa rani.›»

Bate bati twakushee muhango w'enchumo nyingi inji irinae, ntutuninkange mukisa mwingi nguru. Bushwa mbu Ongo watuninkanga eMyomba ietere Musa, ina enchumo n'eriira byakweya ietere Yesu Kirisitu. Kusira mwea ingu wamasunganga Ongo, ina eMusike wae ngomo. Nae wisine nge Ongo eurikanga hima na Tita. N'eMusike ngo ng'wakutushea we.

Ebukariho bwa Yohana Murubiki

(Mat 3.1-12; Mar 1.1-8; Ruk 3.1-18)

Buno nge bukariho bwa Yohana kuri ebakuhani n'eBarawi imbi batumwanga n'eBayuta ituka ku Yerusaremu kamushisha kuba iwe ng'inye.

Yohana ntwatinanga isako, ina weba eriira mu makako ebea bati mbu: «Ntíani nge Kirisitu.»

Nampo ebakuhani n'eBarawi bámushisha mbu: «Ǒngo ke ng'inye? Mbeni ǒngo nge Eria?» Na Yohana mbu: «Anga, ntíani nge Eria». Bamushisha tu mbu: «Mbeni ǒngo nge mutahwa ngo2?» Nae wasako mbu: «Anga.»

Ngerikia bamwire mbu: «Mbeni ǒngo ke ng'inye? Twiri kongo twenda ka ture ebakututuma. Mbeni weba buni bushwa nabe ǒngo kisine?»

Yohana wasako mbu:

«Ani nge murenge ingu ukuange mu bweru mbu:

‹Muombore ense ya Nyere Kuritu,›»

imbu bwebanga emutahwa Isaya.

Ebea mbi batumwanga kuri Yohana, babesenga Bafarisayo. Bashisha Yohana tu mbu: «Kuba ke ntíǒngo nge Kirisitu, abe Eria, abe emutahwa ngo, bushwa nki ke ǒngo urubikange ebea?»

Yohana wasako bo mbu: «Ani nirubikange mu mecha, ina munkati ninu kuri mwea ingu ntwosi banu, eweyange kuruma nani. Ani ntínakomenwa nakuba iyobora emirí y'ebirato byae.»3

Ebinwa mbyo byetanga ku Betania, muo mwiri w'erusi Yorondani, impi habesenga harubikengi Yohana ebea.

Yesu nge Chana ch'eMburi cha Ongo

Ebutu bwakianga bwamacha, Yohana wasunga Yesu tweyange kuri we, weba mbu: «Mukai, uno nge Chana ch'eMburi cha Ongo eukutongi esansambi s'echuo! Uno nge webayo ani nakiyayo n'ebange mbu: emwea ngu weyange kuruma nani, waraisha inirenga, bushwa mbu iwe wabesenga hoko kubusondori n'eributwa rani. Ani ntínakumusiba, ina nakweya karubika ebea mu mecha kongo wásibwa n'ebea ba ku Isiraeri.»

Yohana weba tu mbu: «Nakusunga eMutima wa Ongo uhitange ituka mu mbingu buri pisho n'irika hiyo nae. Ani ntínakumusiba, ina ewakunitumanga karubika ebea mu mecha wakuniirenga mbu: ‹Ingu usesunga ǒngo eMutima wa Ongo wahita n'irika hiyo nae, emwea ngo ng'urubikange mu Mutima Washurukara.› Nakwisungire ebinwa mbyo, nani kariho mwieba mbu uno nge Musike wa Ongo.»

Ebanafunsi baroso ba Yesu

Ebutu bwakianga bwamacha, Yohana wasungwa tu mpo nt'uri na banafunsi bae babi. Warekia wasunga Yesu wetange, weba mbu: «Mukai, uno nge Chana ch'eMburi cha Ongo.»

Ebanafunsi babi mbo bakianga bamarukira ebinwa mbyo, bamisa Yesu. Yesu wikebera, wasungabo nti bamumisange. Washisha bo mbu: «Mbeni banu musondange inki?»

Bamusako mbu: «Rabi, ngerieba mbu muhani, mbeni kuni nge kurikange ǒngo?»

Nae wasako bo mbu: «Mweye kasunga ho.»

Nampo benda, basunga impi harikangǎ we, n'irika hima nae erotu ndo. Rabesenga buna ntambi ikumi sa murisisi.

Nderea, musikyabo Simoni Petero, wabesenga uma mu bea babi mbi barukiranga ebinwa bya Yohana n'imisa Yesu. Nderea wakumana kasa Simoni musikyabo, n'imwire mbu: «Twamasunga Masia, ngerieba mbu Kirisitu.» Kuruma nampo, Wárisha Simoni kuri Yesu.

Yesu wámukae n'imwire mbu: «Ǒngo nge Simoni, musike wa Yohana4. Basekubikira mbu Kefa. Erina Kefa ririburi ho Petero, ngerieba mbu ikoi.»

Firipo na Natanaeri bamisa Yesu

Ebutu bwakianga bwamacha, Yesu wasonda ienda ku Ngariraya. Warekia wakumana Firipo, wamwire mbu: «Nimise.» Firipo wabesenga mubutirirwa wa ku Betesaita, kurwabo Nderea na Petero. Kuruma nampo Firipo wákumana Natanaeri n'imwire mbu: «Twamasunga ingu wakianga Musa waandika emyasi yae mu kitabu ch'eMyomba, n'ebatahwa nabo bebanga bushwa nae. Iwe nge Yesu wa ku Nasareti, musike wa Yosefu.»

Natanaeri wamushisha mbu: «Mbeni ku Nasareti kwamutuka kikai chahunda?»

Firipo wamusako mbu: «Iya kasunga.»

Yesu warekia wasunga Natanaeri weyange hari we, weba mbu: «Mukai, uno mu Isiraeri w'iira ingu usira nabukongobanya kumunda nae!»

Natanaeri wamushisha mbu: «Mbeni umanisiba buni?»

Yesu wamusako mbu: «Firipo warekia nensi twakubikira, nakukusunga mu ntambi nji yabesenga ǒngo hitina r'emuti w'etini.»

Natanaeri wamwire tu mbu: «eMuhani, ǒngo Musike wa Ongo, ǒngo Mwami w'eBaisiraeri.»

Yesu wamusako mbu: «Mbeni usimira bushwa nameba mbu nakukusunga hitina r'emuti w'etini? Ukusunga binwa bingi irenga mbyo.» Yesu weba tu mbu: «Muriira nibwirengi mbu: mǔsunga embingu ntyamoboka n'ebamaraika ba Ongo nti batayange n'ihita ieya nampi hari eMwana w'eMwea!»

Source notes (4)
  1. Footnote Yohana ingu washembwa hano nge Yohana Murubiki
  2. Footnote mutahwa ngo eBayuta b'ematu ngo, babesenga barindirengi emutahwa ingu ewakomenwanga iture bo emwasi weriya ra Kirisitu. Kirisitu mu Kieburania nge «Masia.»
  3. Footnote Eku Bayuta, ekahungu ho nge kabesenga kaboronga emiri y'ebirato y'emuhani wae n'iranga yo.
  4. Footnote Yohana: Mu Kikiriki, Mitiro mima iri mu rina ra «Yona» impi haandikwa «Yohana.»

TRADUCTION BILBE EN KINYANGA. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.