Biblica® नेपाली समकालीन सर्वसुलभ संस्करण
भजनसंग्रह 149
याहवेहको प्रशंसा गर!1
याहवेहको निम्ति एउटा नयाँ गीत गाओ,
उहाँको प्रशंसा उहाँका विश्वासयोग्य जनहरूका सभामा छ।
इस्राएल आफ्ना सृष्टिकर्तामा आनन्दित होओस्;
सियोनका मानिसहरू तिनीहरूका राजामा रमाऊन्!
तिनीहरूले नाच्दै उहाँको नामको प्रशंसा गरून्;
र उहाँको निम्ति खैँजडी र वीणाको सङ्गीत बजाऊन्!
किनकि याहवेह आफ्ना प्रजासित प्रसन्न हुनुहुन्छ;
उहाँले नम्रहरूलाई विजयको मुकुट पहिर्याइदिनुहुन्छ।
उहाँका विश्वासयोग्य जनहरूले यस्तो सम्मानमा आनन्द मनाऊन्;
र तिनीहरूले आनन्दको निम्ति आ-आफ्ना ओछ्यानमा गाऊन्!
तिनीहरूका मुखमा परमेश्वरको प्रशंसा होस्,
र तिनीहरूका हातमा दुईधारे तरवार होस्,
ताकि राष्ट्रहरूका विरुद्धमा तिनीहरूले बदला लिनका निम्ति,
र जाति-जातिहरूलाई दण्ड दिन;
तिनीहरूका राजालाई साङ्लाहरूले,
र तिनीहरूका भारदारलाई फलामका साङ्लाहरूले बाँध्न;
तिनीहरूका विरुद्ध लेखिएका मृत्युदण्ड दिन सकून्—
यही नै उहाँका सबै विश्वासयोग्य जनहरूको महिमा हो।
याहवेहको प्रशंसा गर!
Source notes (1)
- Footnote मूल भाषामा हल्लेलूयाह ; 9 पदमा पनि
Biblica® नेपाली समकालीन सर्वसुलभ संस्करण. Copyright © 1998, 2006, 2021, 2024 Biblica, Inc. Licensed under CC BY-SA 4.0. ” Notice of copyright must appear on the title or copyright page of the work as follows: [Technology consultant will insert copyright and trademark statements from above. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.