Skip to content
BibleKenya

Miwera

LUKA 21

Ikabo di mwali mokwali ogwa na moomi

(Boindja pongono a Mal 12, 41-44)

Yesu angɔdjɔ miso, ko aɛnɛ badieli ndenge eisaka bo palanga ta etanda e mabondja. Aenɛ mwali omɔti o bogwa mokwali aisaka ta etanda e mabondja palanga pata ibae djikɛkɛkɛkɛ. Iboa abala bo: «Naotɔndeakani sooti bo: ibondja dipi mokwali mwali iyoo o bogwa inɔi mabondja mapi bato basusu. Modjɔ mo mabondja mapa bato basusu maidaaka na tɛtɔ ta dii ibo; endelo iyo, na bopu bo nde, api palanga dji nde djisusu djidaaki na nde tina e bohelama.»

Yesu abadjebedji bo tepelo ebukeanadea

(Boindja pongono a Mat 24, 1-2; Mal 13, 1-2)

Iboa ndambo e bato basakoa tepelo ko babala bo, edii iyeye enɔi bopele modjɔ mo etongama na mabanga mapele ko edaaka na leka lopele lopama na Ndjakomba tina e bobɔngedja tepelo. Yesu asɔmbedja bo: «Oɛnɛkɛɛdeani midjɔ imia misusu, ta masu ma kɛkɛdea adoe midjɔ imia misusu mibehadea pɛpɛ nongo ibanga imɔti didikabi dibaki diko di mina du.»

Midjɔ mikɔɔmɔbi boso bo suka e ngondo

(Boindja pongono a Mat 24, 3-14; Mal 13, 3-13)

Bamowadja bo: «Molehi, ehole ndani ekɔɔmɔbi modjɔ momina? Embete ndani einedjabi bo midjɔ mimina mimei mbuti?» Yesu abasɔmbedja bo: «Kebani, bato basakaopɛngodjani. Modjɔ mo bato banɛnɛ badoabi na kombe e mbi ko babalabi bo: “Mbi nadii Masiya!” Ko “ehole eimei mbuti!” Endelo pɛpɛ bobasusani. Ehole eokabi ino gala dji bitumba ko na wusuwusu, pɛpɛ bobangani midjɔ mimina mitungi bodoa boso, endelo ediiti suka e ngondo.»

Iboa abala na bu bo: «Ekomi emɔti eanabi bila na ekomi ekina ko bokumu na bokumu boanabi pongono; Pamba inɛnɛ kpɔtɔ ikumanabi, mɔlɔ ko na ndja; edaabi na midjɔ mi sɔmɔ ko bimbete bibokamoa bienɛnɛbi ta busa. Endelo boso bo midjɔ misusu imia, baopeabini, baonɔngedjabini, baokababini tina e boosambedjani ta ndako dji miɔngɔnɔ ko baisabini ta bɔlɔkɔ; bakɛɛbi na nu ta boso bo bakondji ko na bagupɛlɛnɛlɛ tina e kombe e mbi. Modjɔ momina, moopabini enɔli e bobala tati tina e mbi. Djebani bo, pɛpɛ bosayekeani na eka ebwani na nu bosamba. Modjɔ mo mbi naopabini bokongo ko na konga emɔti baloni ba bino bahɔnetebi botɛlɛmelani. Okabamabini nongo na baboti ba bino, bangi bino baami, denga di bino ko na binanu, bakina bakɛɛbi ngabi ta tei e bino. Baokeabini swɛ na bato basusu tina e kombe e mbi. Endelo moswe momɔti ta melo mi bino motabungedjamabi. Na ingbangba di bino, obolodjabini bomɔ.»

Yelusalɛmɛ ebehadea

(Boindja pongono a Mat 24, 15-21; Mal 13, 14-19)

«Ehole eenɛbi no Yelusalɛmɛ ehikami na mbulu bahindo, iboa djebani bo, bobedjama bo yu boeimei mbuti. Iboa, ibia badaabi ta Yudhea botiabi ta ngomba; ibia badaabi ta tei e ngando enɛnɛ baetiabi, ibia badaabi ta gbie basɔmbetebi o tei. Modjɔ mo edaabi masu ma sambi, bɛngi midjɔ misusu mikomama1 mikokedjame. Ndjokwa na bali badaabi na meemi, na bia banungeabi! Modjɔ mo edaabi na saya enɛnɛ ta ngondo, ko gbɛkɛ diko di bato ibibi. Bagwabi na mopata, bapeamabi bɔlɔkɔ ta bikomi bisusu, bikomi badalakakabi Yelusalɛmɛ tee mbunoko ehole e bobo bikomi ekokedjame.»

Bodoa bo Mwana o moto

(Boindja pongono a Mat 24, 29-31; Mal 13, 24-27)

«Bimbete bienɛmɛbi ta modakabusa, ko ta songe ko na ndjɔtɔ2. Ta kpɔtɔ, bikomi badaabi na bɔɔ, babangabi ngilimo djinɛnɛ dji dua ko na mbonge. Bato bagwaabi na bɔɔ iyana ta bolɛdjɛ midjɔ mikɔɔmɔbi ta kpɔtɔ isusu, modjɔ mo ngulu djisusu dji diko djikumanabi. Iboa baenɛbi Mwana o moto bodoa ta itute na ngulu esusu ko na ekumu3. Ehole ebangabi midjɔ mimina bokɔɔmɔ, sabɔngedjani ko angɔdjɔni molo, tina e bosikoli bo bino boimei mbuti.»

Eleho epama tina e mole mo pigi

(Boindja pongono a Mat 24, 32-35; Mal 13, 28-31)

Ngɔngɔ djimina Yesu abatɔndea ekuanedji emɔti bo: «Indjani mole mo pigi ko mele mikina misusu: ehole eɛnɛbi ino kasa dji yeene djitɔi, okadjebeni ino bɛnɛ bo yanga eimei. Ndenge emɔti, ehole eenɛbi ino midjɔ mimina bokɔɔmɔ, djebani bo Bokumu bo Ndjakomba boimei mbuti. Naotɔnndeini sooti bo: bato ba mbota iyeye batasiabi pɛpɛ baenɛ midjɔ mimina misusu bokɔmɔ. Diko na kpɔtɔ binɔɔbi, endelo mibalo mi mbi mitanɔɔbi.»

Tɛtɔ ebokeba

«Tomakebani! Ta mɛti na bo, milema mi bino midae pɛpɛ boluma na bokoso bo boyaka ko na milangoa, na bokɛsɛdji bo bomɔ, busa bua boimaneabini gbundumo, ondingo modjanga modjɔ mo busa bomina bodoabi ta dii ibia basusu badii ta tei e kpɔtɔ djisusu. Iboa pɛpɛ bowɛɛni, angɔnɔni ehole esusu; iboa, odiadeani ngulu e bolonga midjɔ misusu mibwani boimea ko ohɔnɔdeani boema boso bo Mwana o moto.»

Na moi, Yesu alehaka ta tepelo; endelo mɔkɔmɔkɔ, akɛɛkɛ asama ta ngomba ekabee bo ngomba e mele mi Olive. Ehumahuma bato badoaka ta dii iyo ta tepelo tina e bomohokamedja.

Source notes (3)
  1. Footnote Kuanedja a Ose 9.7.
  2. Footnote Kuanedja a Isa 13.10; Edjek 32.7; Yl 3.3-4.
  3. Footnote Dan 7.13.

Miwera. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.