Biblica® IBhayibhili Elingcwele LesiNdebele Elifinyelelekayo
AmaHubo 112
Dumisani uThixo.
Ubusisiwe umuntu owesaba uThixo,
othokoza kakhulu ngemilayo yakhe.
Abantwabakhe bazaba lamandla elizweni;
isizukulwane soqotho sizabusiswa.
Inotho lenzuzo kusendlini yakhe,
lokulunga kwakhe kumi laphakade.
Lasebumnyameni kuyavela ukukhanya kwabaqotho,
emuntwini olomusa, olesihawu lolungileyo.
Ubuhle buzakwehlela kuye ophanayo loweboleka ekhululekile,
oqhuba zonke izinto zakhe ngemfanelo.
Ngeqiniso kayikunyikinyeka;
umuntu olungileyo uzakhunjulwa lanininini.
Akayikwesaba imibiko emibi;
inhliziyo yakhe ichumile, yethembele kuThixo.
Inhliziyo yakhe ikhululekile, akalakwesaba;
ekucineni uzakhangela izitha zakhe ngokunqoba.
Uhlakazele izipho zakhe kubayanga ezindaweni zonke,
ukulunga kwakhe kumi laphakade;
uphondo lwakhe luzaphakanyiselwa phezulu ngenhlonipho.
Umuntu omubi uzakubona lokhu afuthelane,
uzagedla amazinyo akhe, acikizeke emzimbeni;
izinkanuko zababi zizaphetha ziyize.
Biblica® IBhayibhili Elingcwele LesiNdebele Elifinyelelekayo. Copyright © 2003, 2006, 2022 Biblica, Inc. Licensed under CC BY-SA 4.0. “Biblica” is a trademark registered in the United States Patent and Trademark Office by Biblica, Inc. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.