Biblica® IBhayibhili Elingcwele LesiNdebele Elifinyelelekayo
AmaHubo 111
Dumisani uThixo.
Ngizambabaza uThixo ngenhliziyo yami yonke
enkundleni yabaqotho lasemhlanganweni.
Mikhulu imisebenzi kaThixo;
isemicabangweni yabo bonke abathokoza ngayo.
Zilenkazimulo lobukhosi izenzo zakhe,
lokulunga Kwakhe kumi kuze kube laphakade.
Wenzile ukuthi izimanga zakhe zikhunjulwe;
uThixo ulomusa lesihawu.
Uyabapha ukudla labo abamesabayo;
uyasikhumbula isivumelwano Sakhe lanini.
Ubatshengisile abantu bakhe amandla emisebenzi yakhe,
ngokubapha amazwe ezinye izizwe.
Imisebenzi yezandla zakhe ithembekile, ilungile;
zonke iziqondiso zakhe ziyathembeka.
Zimi kaziguquki nini lanini,
zenziwa ngeqiniso langobuqotho.
Wathumela abantu bakhe insindiso;
wasingcwelisa isivumelwano Sakhe okwanininini
lingcwele liyesabeka ibizo lakhe.
Ukumesaba uThixo kuyikuqala kwenhlakanipho
bonke abalandela iziqondiso zakhe balokuzwisisa okuhle.
Kungokwakhe ukudunyiswa kwaphakade.
Biblica® IBhayibhili Elingcwele LesiNdebele Elifinyelelekayo. Copyright © 2003, 2006, 2022 Biblica, Inc. Licensed under CC BY-SA 4.0. “Biblica” is a trademark registered in the United States Patent and Trademark Office by Biblica, Inc. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.