Nahali Bible
रोमीयो 10:9
Verse 9 is marked below, with the whole chapter around it. Read from the start
एय बाय बोणहा, मारा मोनान अबिलाषा एने तान केरता बोगवाना से मारी विन्ता हे काय ताह सुटकारो जुड़ी। काहाकाय मी तान गोवाय दिथो काय ताह बोगवानान बोक्ती माय रेतेह, पुण खेरला ईकेल पोर एकलीदार हेऱ्या नाह। काहाकाय ता बोगवानान देरमीपोणा से एंजाणल्या बोणीन, एने सोतान देरमीपोणान स्थापना केरनेन कोसीत केरती लेन, ता सोताह बोगवानान देरमीपोणान काबाम नाह केऱ्या। काहाकाय आखाह बुरहो केरनारान केरता देरमीपोणान निमीत्त मसी नेमान निवेरनो हे।
आखान केरता सुटकारो
काहाकाय मुसो ज्य लिखेल हे काय जा माणहे ता देरमीपोणा पोर जो नेमा केरीन हे, चालेह, तो तास केरीन जीवतालो रेय। पुण जो देरमी पोण बोरहा केरीन हे, तो इहकेरीन किथे, “तु तारा मोना माय ज्य मा किहे काय हेरगा पोर कुण चेड़ी?” मतलब मसीह उतार लावणेन केरता। नाहते “बुराया माय कुण उतरी?” मतलब मसीह मुरेल माय रेन जिवाड़ेन उपेर लावणेन केरता। पुण ती काय किथे? “ज्य काय वचन तारे आहने हे, तारा मुया माय एने तारा मोना माय हे,” ज्य तास बोरहान वचन हे, जो आमु पारचार केरतेह, काय केदी तु तारा मुया केरीन यीशुह मालीक जाणीन कबुल किरहे, एने तारा मोना केरीन बुरहो केरी काय बोगवान ताह मुरेल माय रेन जीवाड्यो, ताहार तारो सुटकारो एय। काहाकाय देरमीपोणान केरता मोन से बुरहो केराय जाथे, एने सुटकारान केरता मुया केरीन कबुल केराय जाथे। काहाकाय पुस्तेक ज्य किथे, “जो कुण ता पोर बुरहो केरी तो लाजवाय नाय।” यहुदि एने युनानी माय काय फारेक ना सोतो, ज्यानकेरता काय तो आखान मालीक हे एने तान आखाह नाव लेणारान केरता मालदार हे। काहाकाय पुस्तेक किथे, “जो कुण मालीकाह मोदेक ने केरता आयड़ेह तो वोच जाय।”
पुण जा पोर ता बुरहोस नाह केऱ्या, ता तान नाव किहीक लेती? एने जान बाराम ता होमल्यास नाह ता पोर किहीक बुरहो केरती? एने ता पारचार केरनारा बिगेर किहीक होमेलती। एने ता पारचार किहीक केरती जाह वोर काय मोकलाय नाय जाती, जिहकेरीन लिखेल हे, “हाजाल्यु वातुन हाजाली खोबरीह केणारान पाय कोहला हाजा हेते!” पुण ता आखा हाजाली खोबरी पोर द्यान नाह देना, यशाया किथे, “एय मालीक, कुण आमरी खोबरी पोर बुरहो किरेल हे?”1 बुरहो होमेलने से एने होमेलनो मसीन वचन से ईथे।
पुण मी केथु, काय ता नाह होमल्या? होमलेल ते खेरीच एता; काहाकाय लिखेल हे, “तान नांद आखी देरती पोर, एने तान वचन दुनियान कोपरे कोपरे वोर पोच जायेल हे।”
मी पोशो केथु, काय इस्राएली नाह जाणताला? पेल ते मुसो किथे,
“मी तान द्वारा जी जाती ना सोती,
तुमरा मोनाम जलन पायदा केरूह;
मी एक फोगी जातीन द्वारा तुमरे माय राग पायदा केरूह।”
ओवतो यशाया मोटली ईमोत केरीन किथे,
“जा माहु नाह होदताला, ता माहु सापड़ाव लियेल हेते;
एने जा मार बाराम फुसताला बी नाह, ताह मी देखानो।”
पुण इस्राएलान बाराम तो किथे, उकुम नाह माणनाराह एने हुम्बा बोलनारे माणहान उगे “मी आखो दिह मारा आथ पोसारेल रिनो।”
Source notes (1)
- Cross-reference यशाया 53:1
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.