Nahali Bible
गिनती 9
दिहरी वार फसहान तिवार
जेवी इस्राएली माणहे मिस्र देसा माय रेन निकेल आवा, तेवी दुसरा वोरह्यान पेल्ला मोयना माय बोगवान सिनाय जेंगला माय मुसाह केयो, “इस्राएली माणहे फसह तिवाराह तान ठेरायेल टेमा पोर माणाया किरे। मतलब ज्या मोयनान चोवदावे दिह्याह हांज पोर तुमू ताह आखी रिती एने नेम माय माणाया किरज्यो।” तेवी मुसा फसहान तिवार केरनेन केरता इस्राएली माणहाह केय दिनो। एने ता पेल्ला मोयनान चोवदावे दिह्याह हांज पोर सिनाय जेंगला माय फसह तिवार केऱ्या; एने जा जा उकुम यहोवा मुसाह आपेल इतो, तिहेस केरीन इस्राएली माणहे केऱ्या।
पुण थोड़ाक माणहे देड़ाह आथेलनेन वोजेसे एठा एय जायेल एता, ते दिह फसहान तिवार नाह केर सेकना; ता ते दिहस मुसा एने हारूनान जागे गीया। एने मुसाह केणे बाज गीया, “आमु माणहान देड़ाह सापलीन एठा एय जायेल हेते; पुण आमु काहा रोकाय रिज्यो, एने इस्राएली माणहा हेऱ्या यहोवान चेड़ावो ठेरायेल टेमा पोर काहा नाय चेड़ावज्यो?”
मुसा ताह केयो, “थुबो, मी होमेल लेव काय यहोवा तुमरी बाराम काय उकुम आपेह।”
तेवी बोगवान मुसाह केयो, इस्राएली माणहाह के, “केदी तुमरे माय रेन नाहते तुमरी वोसीन एगदो माणुह देड़ आथेलनेन कारेण एठो एय जायेल हे, नाहते सिटेस फिरने जात रेय, तीबी ता यहोवान केरता फसह तिवार माणावे। ता तो तिवार दिहरा मोयनान चोवदावे दिह हांज पोर माणावे; एने फसहान बोलीन जेनवारान माह बिगेर खमीर वालो रूटो एने कोड़वा बाजीपाला हेऱ्या खाय। 2एने ता माय रेन जारीक बी वेगोस वोर नाय वोचणे जुवे, एने एगदो कुण बी जेनवारान आड़ तोड़ने नाय जुवे; ता फसहान तिवाराह आखी रितीन गेत माणावे। पुण जो माणुह चोखालो रेय, एने फिरने निह गीयो एय, पुण फसहान तिवार नाय माने, ताहार ताह तान माणहा माय रेन आंगे केराय जाय, ता माणहाह यहोवान चेड़ावो ठेरायेल टेमा पोर नाह लेन आवणेन वोजेसे सोतान पापान बार उखेलने पोड़ी।”
केदी एगदो परदेसवालो तुमू हेऱ्यो रेन यहोवान केरता फसहान तिवार माणावणे हुदेह, ते तो तीच रिती एने नेमान गेत ताह माने; देसावालो एने परदेसवालो दुयून केरता तुमरी एकुच रिती रेय।
रेण्या जागा पोर आक्ठावालो वादेल
(निर्गमन 40:34-38)
जे दिह रेणेन जागो, जो पुरावान तोम्बु बी केवाथे, उबो केराय गीयो, ते दिह वादेल ता पोर सावाय गीयो; एने हांज पोर तो तोम्बु पोर आक्ठान गेत देखानो एने वेगोस वोर देखाती रेनो। एने दाड़ीन दिह तोहलोस एया केरतालो; मतलब दिह्या वादेल सावाय रेतालो, एने राती आक्ठो देखातालो। एने जुलबूखे तो वादेल तोम्बु पोर रेन उठ जातालो, तुलबुखे इस्राएली माणहे चाल देताला; एने जी जागे वादेल थोब जातालो, ताच इस्राएली माणहे पाड़ावो टाकताला। यहोवान उकुम मानीन इस्राएली माणहे चाल देताला, एने यहोवान उकुम मानीन ता पाड़ावो बी टाकताला; एने जोला दिह तो वादेल तोम्बु पोर थोब रेतालो, तोलाक दिह वोर ता पाड़ावो टाकीन रेताला। जुलबुखे वादेल जुलूम दिह वोर तोम्बु पोर सावाय रेतालो, तुलबुखे बी इस्राएली माणहे यहोवान उकुम मानताला, एने ओंगाण नाह जाताला। एने केदी केदी तो वादेल थोड़ास दिह वोर तोम्बु पोर रेतालो, तेवी ता यहोवाच ने उकुम मानीन पाड़ावो टाकीन रेताला; एने पोशा ता यहोवान उकुम मानीच ने चाल देताला। एने केदी केदी तो वादेल हांज पोर रेन वेगोस वोर रेतालो; एने जुलबूखे तो वेगोस उठ जातालो, तेवी ता चाल देताला, एने केदी तो रात दिह सावाय रेतालो, ते जुलबूखे वादेल उठ जातालो, तेवीच ता जाताला। केदी तो वादेल दुय दिह, नाहते एक मोयनो, नाहते वोरीह बोर, जाह वोर तोम्बु पोर थोब रेतालो, ताह वोर इस्राएली माणहे तान पाड़ावा पोर रेताला एने नाह जाताला; पुण जुलबूखे वादेल उठ जातालो तुलबुखे ता जाताला। यहोवान उकुम मानीन ता तान पाड़ावो टाकताला, एने यहोवाच ने उकुम मानीन ता चाल पोड़ताला; जो उकुम यहोवा मुसान द्वारा आपतालो, ताह ता मान्या केरताला।
Source notes (2)
- Cross-reference निर्गमन 12:1-13
- Cross-reference निर्गमन 12:46; योहान 19:36
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.