गिनती 10

चांदीन दुय बिरा

1पुशो यहोवा मुसाह केयो, 2“चांदीन दुय बिरा गेड़ीन बाणाव; तु तान वापेर मोंडलीह टुलो केरने, एने पाड़ावाह ओंगाण जाणेन केरता कामे लागाड़ज्ये। 3एने जुलबूखे ता दुय बिरा वाजाड़ाय जाती, तुलबुखे आखी मोंडली मेल मिलापवाला तोम्बुन बायणा पोर तार जागे टुलो एय जाय। 4एने केदी एकुस बिरो वाजाड़ाय जाय, ताहार आदिकारी माणहे जा एजार इस्राएली माणहान मुखी एदमी हेते, तार जागे टुलो एय जाय। 5जुलबूखे तुमू हाह रोकीन पेल्‍ली वार फुकहो, ताहार पुर्व दिशान पाड़ावा वाला जाती। 6जुलबूखे तुमू दिहरी वार फुकहो, ताहार दक्षिण दिशान पाड़ावा वाला जाती। ताह जाणेन ज्‍यीस निसाणी रेय। 7एने जुलबूखे माणहाह टुलो केरीन पोंचो केरनो रेय, तेवी बी फुकज्यो, पुण जाणेन इसारो मा किरहे। 8एने हारूनान सोरा जा चाकऱ्या हेते, ता ता बिराह फुक्या केरती।

“ज्यी वात तुमरी पिढ़ी पिढीन केरता कायेम ने रिती रेय। 9जुलबूखे तुमू तुमरा देसा माय एगदा दोमणार दुसमोना हेऱ्या लेड़नेन जाहो, तेवी चेतावणीन केरता बिराह फुकज्यो, तेवी तुमरो बोगवान यहोवाह तुमरी एर आवी, एने तुमू तुमरा दुसमोना हेऱ्या रेन वोचाड़ाय जाहो। 10एने तुमरा खुसीन दिह्या माय एने तुमरा ठेरायेल तिवारा माय, एने मोयनान सुरवाती माय, तुमरी होमबोली एने मेल मिलाप बोली हेऱ्या ता बिराह फुकज्यो; ज्या केरीन तुमरा बोगवानाह तुमरी एर आवी; मी यहोवा तुमरो बोगवान हे।”

इस्राएली माणहान सिनाय जेंगलाम रेन जाणो

11दुसरा वोरह्यान दुसरा मोयनान विह दिह्या पोर वादेल वाचान तोम्बु पोर रेन सेटो एय गीयो, 12तेवी इस्राएली माणहे सिनाय जेंगला माय रेन निकलीन चाल पोड़ना; एने वादेल पारान नावान जेंगला माय थोब गीयो।

13एने तान जाणो यहोवान ता उकुमान गेत जो तो मुसाह आपेल इतो, चालु एनो। 14एने आखान पेल ते यहुदिन पाड़ावान जेंडान जाणो एनो, एने ता टुलो बोणीन चाल देना; एने तान सेनापोती अम्मीनादाबान बिटोख नहशोन इतो। 15एने इस्साकारान गेराणान सेनापोती सुवारान बिटोख नतनेल इतो। 16एने जबुलूनान गेराणान सेनापती हेलोनान बिटोख एलीआब इतो।

17तेवी रेणेन तोम्बु उताराय गीयो, एने गेर्शोनी एने मरारी जा रेणेन तोम्बुह उखेलताला, चाल देना।

18पोशो रूबेन ने पाड़ावान जेंडान जाणो एनो, एने ता बी टुलो एन चाल देना; एने तान सेनापोती शदेऊरान बिटोख एलीसुर इतो। 19एने शिमोनान गेराणान सेनापोती सुरीशद्यान बिटोख शलुमीएल इतो। 20एने गादान गेराणान सेनापोती दुएलान बिटोख एल्यासाप इतो।

21तेवी कहाती वोस चोखाली वोस्तुह उखलीन चाल देना, एने ताह पोचता वोर गेर्शोन एने मरारी तोम्बुह उबो केर देना।

22पोशो एप्रेमान गेराणान पाड़ावान जेंडान जाणो एनो, एने ता बी टुलो एन चाल देना; एने तान सेनापोती अम्मीहुदान बिटोख एलीशामा इतो। 23एने मनश्शेन गेराणान सेनापोती पदासुरान बिटोख गम्लीएल इतो। 24एने बिन्यामीन गेराणान सेनापोती गिदोनीन बिटोख अबीदान इतो।

25ओवतो दानान गेराणान पाड़ावो जो आखाह रेन पासाण इतो, तान जेंडान जाणो एनो, एने ता बी टुलो एन चाल देना; एने तान सेनापोती अम्मीशद्यान बिटोख अहीआजर इतो। 26एने आशेरी गेराणान सेनापोती ओक्रानान बिटोख पगीएल इतो। 27एने नप्तालीन गेराणान सेनापोती एनान ने बिटोख अहीरा इतो। 28एने इस्राएली माणहे इह केरीन आप आपणा टोलान पारमाणे जाताला, एने ओंगाण वोड़ताला।

29मुसा तान हाहरोक रूएल मिद्यानीन बिटोख होबाबाह केयो, “आमु ती जागे जाणेन चाल पोड़नाह जान बाराम यहोवा कियेल हे, ‘मी तो तुमूह आपुह।’ केरीन तु बी आमु हिऱ्यो चाल, एने आमु तारो हाजो केरहु; काहाकाय यहोवा इस्राएलीन बाराम हाजोच कियेल हे।”

30पुण होबाब ताह केयो, “मी नाह आव सिकेत; मी मार देस एने मार गेरल्या माय पुशो जात रेह।”

31पुशो मुसा केयो, “आमुह मा सुड़े, काहाकाय आमुह जेंगला माय काहरी काहरी पाड़ावो केरनु हे, ज्यो तुवाहच खुबेर हे, तु आमुह मार्गदर्शन किरज्ये। 32केदी तु आमु हिऱ्यो आवहे, ताहार खेरीस जो हाजो काम यहोवा आमु पोर केरी, तिहेस केरीन आमु बी तार हेऱ्या तोहलोच केरहु।”

माणहान जाणो

33पोशा इस्राएली माणहे यहोवान बोयड़ा पोर रेन तीन दिह्यान वाट देरीन चालना; एने ता तीन दिह्यान वाटे यहोवान वायदान पेटी तान केरता विहेवणेन जागो होदतेन तान ओंगाण ओंगाण चालते रिनो। 34एने जुलबूखे ता पाड़ावान जागे रेन जाताला, तेवी दिह बोरीन यहोवान वादेल तान उपेर सावाय रेतालो। 351

एने जुलबुखे ताह पेटी लेन जाणो एतालो तुलबुखे मुसा इह केरीन केतालो, “एय यहोवा, उठ, तारा दुसमोन वेरासेर एय जाय, एने तारा दुसमोन तार ओंगाण रेन नाह जाती।” 36जुलबूखे तो थोब जातालो तुलबुखे मुसा केया केरतालो, “एय यहोवा, एजार एजार इस्राएली माणहा माय वोलीन आव लाग।”