Nahali Bible
गिनती 8
दिवा पेटाड़नेन रिती
पुशो बोगवान मुसाह केयो, “हारूनाह ज्य के, जुलबूखे बी तु दिवा पेटाड़हे, तुलबुखे सातु दिवान उजोड़ दिवो मेलनेन जागे जुवे।” केरीन हारून तिहेच केरीन किऱ्यो, जो उकुम यहोवा मुसाह आपेल इतो, तिहेच केरीन तो दिवाह दिवो मेलनेन जागे मिल्यो काय उजालो किरे। एने दिवो मेलनेन जागान बाणावोट ओहली एती, ज्य पायान जागे रेन ते फुलान जागे वोर गेड़ायेल होनान बाणावाय जायेल एतो; जिह केरीन यहोवा मुसाह देखाड़ेल इतो, तिहेस केरीन तो दिवो मेलनेन जागो बाणायेल इतो।
लेवीन चोखो एणो एने अर्पण
पुशो यहोवा मुसाह केयो, “इस्राएली माणहान विच माय रेन लेवीह आंगे केरीन चोखा केर। ताह चोखालनेन केरता तु इही केर, चोखालो पाणी ता पोर हितेड़ दे, ओवतो ता आखा सेरीरान लेट्या सुरा केरीन काटाड़े, एने फाड़का दोवती, एने इही केरीन ता सोताह चोखा केरती। तेवी ता एक डांड्याह एने ता हेऱ्य तेला माय कुहणेल फिटान एन बेटी लेय लेय, एने तु पापबोलीन केरता एक दिहरो डांड्यो लिज्ये। एने तु लेवीह मेल मिलापवाला तोम्बुन सामने पोचाड़ज्ये, एने इस्राएल ने आखी मोंडलीह टुलो किरज्ये। तेवी तु लेवीह यहोवा फाय आहने लेन आवज्ये, एने इस्राएली माणहे आप आपणा आथ ता पोर मिले, तेवी हारून लेवीह यहोवान सामने इस्राएली माणहान उगे रेन आलाड़ेल बेट केरीन चेड़ावे, काय ता यहोवान सेवा केरनारे ठेराय। तेवी लेवी आपणा आथ ता डांड्यान मुंडी पोर मिले; तेवी तु लेवीन पाप डापणेन केरता एक डांड्यो पापबोली एने दिहरो होमबोली केरीन यहोवान केरता चेड़ावज्ये।”
एने लेवीह हारून एने तान सोरान ओंगाण उबा किरज्ये, एने ताह आलाड़ेल बेटीन केरता यहोवाह चेड़ावज्ये। इह केरीन तु लेवी वोसीह इस्राएली माणहान विच माय रेन आंगे किरज्ये, एने लेवी मारास ठेराती। एने तु जुलबूखे लेवीह चोखा केरीन आलाड़ेल बेटीन केरता चेड़ाव दिहे, तान पासाण ता मेल मिलापवाला तोम्बुन सेवा केरनेन केरता माय आया किरे। काहाकाय ता इस्राएली माणहा माय रेन माहु पुरी रिती से चेड़ायेल हेते; मी ताह आखा इस्राएली माणहा माय रेन एक एक बायकुन जेठाला सोरान बोदले मारा बाणाव लियेल हे। 2एने इस्राएली माणहान जेठाला सोरा, माणहान रेय नाहते जेनवारान, आखा मारा हेते; काहाकाय मी ताह तुलबुखे मार केरता चोखाला ठेरायो, जुलबुखे मी मिस्र देसान आखा जेठाला सोराह मारेल इतो। एने मी इस्राएली माणहान आखा जेठाला सोरान बोदले लेवीह लियेल हे। ताह लेन मी लेवी हारून एने तान सोराह इस्राएली माणहा माय रेन दान केरीन आप दियेल हे, काय ता मेल मिलापवाला तोम्बु माय इस्राएली माणहान बोदले सेवा एने पाप डाप्या किरे, ओहलो नाय एणे जुवे काय ता चोखाला जागान आहने आवी, तुलबुखे ता पोर एगदी मोटली वेला आव पुड़े।
लेवीन बाराम यहोवान ज्यो उकुम सापड़ावीन, मुसा एने हारून एने इस्राएली माणहान आखी मोंडली ता हेऱ्या तिहेस केरीन केऱ्यी। लेवी ते सोताह पापा माय रेन चोखा केऱ्या, एने तान फाड़काह दोव टाक्या; एने हारून ताह यहोवान सामने आलाड़ेल बेटीन बोदले चेड़ावो चेड़ाया, एने ताह चोखालनेन केरता तान पापाह डाप देना। एने तान पासाण लेवी हारून एने तान सोरान सामने मेल मिलापवाला तोम्बु माय आप आपणी सेवा केरने बाज गीया; एने जो उकुम यहोवा मुसाह लेवीन बाराम आपेल इतो, ता तिहेस केरीन केऱ्या।
पुशो यहोवा मुसाह केयो, “जो लेवीह केरनु हे, तो ज्य हे, पोचीह वोरह्यान वोयावाला रेन ते ताह रेन वोदार वोयावाला हेते, ता मेल मिलापवाला तोम्बु माय काम केरनेन केरता टुलो एया किरे; जेवी एगदो पाचाह वोरह्यान एय जाय, ताहार ता ती सेवा केरनेन केरता नाय आवी, एने काम नाय किरे; पुण ता तान बायबांडला हेऱ्या मेल मिलापवाला तोम्बुन जागे देखरेख ने काम केऱ्या किरे, पुण तो सोता काल्लोस काम नाय किरे। लेवीह जो काम होपाय जाय, तान बाराम तु ता हिऱ्यो इहीस केरीन किरज्ये।”
Source notes (2)
- Cross-reference निर्गमन 25:31-40; 37:17-24
- Cross-reference निर्गमन 13:2
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.